“Dapat Bala Ako Magsaylo?”

¹ Bilang sabat sa sugo ni Jesus nga “lakat . . . maghimo sing mga disipulo sa mga tawo sa tanan nga kapungsuran,” madamong dedikado nga alagad ni Jehova ang nagsaylo agod mag-alagad kon diin daku pa ang kinahanglanon. (Mat. 28:19) Ginailog nila si Pablo, nga nagsabat sa panawagan: “Tabok ka sa Macedonia kag tabangi kami.” (Binuhatan 16:9) Paano ini himuon sa praktikal nga paagi?

² Himua ang Isa ka Tikang sa Isa ka Tion: May talagsa lang bala ginapangabudlayan nga teritoryo sa inyo kongregasyon? Kon amo, mahimo ninyo ikonsentrar ang inyo mga panikasog sa sini nga mga lugar. Antes mamat-od sa pagkadto sa iban nga lugar, pamangkuta anay ang inyo mga gulang agod mahibaluan ninyo kon bala ginahunahuna nila nga nasangkapan kamo agod magsaylo. Mahimo man ninyo pamangkuton ang inyo manugtatap sang sirkito kon may nahibaluan sia nga isa ka malapit nga kongregasyon diin mapasangkad ninyo ang inyo ministeryo. Sa pihak nga bahin, sa tapos sang mahalungon nga pag-isip sa bili, mahimo nga luyag ninyo magtabang sa iban nga bahin sang pungsod ukon sa iban nga pungsod. Kon amo sini ang inyo handum, kaupod sang inyo hubon sang mga gulang, dapat ninyo sulatan ang sanga talatapan diin interesado kamo sa pag-alagad, nagabalay sang inyo teokratikong kahimtangan. Mahimo maalamon nga pamasyaran anay ang lugar antes mamat-od kon bala magsaylo sing permanente ukon indi.

³ Magmainandamon sa Pagsaylo: Madamo nga kauturan naton ang nagasaylo sa iban nga mga pungsod bangod nagapangita sila sing mas maayo nga kahimtangan sang pangabuhi ukon kaumpawan gikan sa pagpigos. Samtang, ang iban nangin biktima sang bentahuso nga mga indibiduwal nga nangako nga buligan sila nga mangin establisado sa bag-ong pungsod apang nagkuha lamang sang ila kuwarta kag dayon ginpabayaan sila. Sa pila ka hitabo ginatinguhaan pa gani sining mga indibiduwal nga piliton ang mga imigrante nga magtrabaho sing lapas sa nagakaigo nga prinsipio. Kon indi sila magpasugot, ginapabay-an na lamang sila sing isahanon sa pungsod nga ginkadtuan nila. Sa amo ang kahimtangan sang mga imigrante nangin malain pa sangsa didto sila sa ila tumandok nga pungsod. Mahimo pa gani sila magpabulig sa mga kauturan nga paistaron sila kag indi gani buligan sila, sa amo nagapabug-at sa iban nga Cristianong mga pamilya nga may kaugalingon na nga mga problema kag mga kabudlayan. Ang mga katapo sang pila ka panimalay nagbinulagay, kag ang mga pamilya nagluya sa espirituwal bangod sinang di-makatarunganon nga pagsaylo.​—⁠1 Tim. 6:​8-11.

⁴ Kon luyag ninyo magsaylo tungod sa personal nga kaayuhan, dumduma nga diin man kamo nagapuyo, may mga problema nga dapat atubangon. Mas mahapos atubangon ang mga problema sa lugar nga sunado na ninyo ang hambal kag kultura, sangsa magsugod sing bag-o sa di-pamilyar nga mga palibot.