Ang Pag-ipit sang mga Katubotubo kag ang Imo Pribilehiyo sa Pagbantala
1 Ang pag-ipit sang mga katubotubo isa ka daku nga impluwensia—sa ikaayo ukon sa ikalain man. Ang mga masigkaalagad kay Jehova nagaimpluwensia sing positibo nga nagapukaw sa aton sa maayong Cristianong mga buhat. (Heb. 10:24) Apang, mahimo kita ipiton sang indi Saksi nga mga katapo sang pamilya, mga kaupdanan sa trabaho, mga kabutho, mga kaingod, ukon iban pa nga mga kakilala sa paglakat sa dalanon nga supak sa Cristianong mga prinsipio. Mahimo sila maghambal sing ‘mayubiton sa [aton] maayong paggawi may kaangtanan kay Cristo.’ (1 Ped. 3:16) Paano naton mahuptan ang aton determinasyon nga magpadayon sa pagbantala walay sapayan sang negatibo nga pag-ipit sang mga katubotubo nga mahimo naton masumalang?
2 Mga Katapo sang Pamilya: Kon kaisa, ang bana kag amay nga indi isa sang mga Saksi ni Jehova indi luyag nga ang iya asawa kag mga anak makigbahin sa pangpubliko nga ministeryo. Amo ini anay ang natabo sa isa ka pamilya sa Mexico. Ang asawa kag pito ka anak nagsulod sa kamatuoran. Sang primero ang bana nagpamatok bangod indi niya luyag nga ang iya pamilya magbantala kag magtanyag sing mga literatura sa Biblia sa pamalaybalay. Para sa iya, nagapakanubo ini sa ila. Apang, ang iya asawa kag mga anak nagtindog sing malig-on sa ila desisyon nga mag-alagad kay Jehova kag magpakigbahin sing regular sa ministeryo. Sang ulihi, nakita sang bana ang kabilihanan sang pagbaton sa kahimusan sang Dios para sa hilikuton nga pagbantala, kag nagdedikar man sia kay Jehova. Napulog-lima ka tuig ang ginkinahanglan agod batunon niya ang kamatuoran, apang nahimo bala niya ini kon ang iya pamilya wala magpadayon sa ila pribilehiyo sa pagbantala?—Luc. 1:74; 1 Cor. 7:16.
3 Mga Kaupdanan sa Trabaho: Ang imo mga panikasog agod panaksihan ang mga kaupdanan sa trabaho mahimo nga indi maluyagan sang iban. Ang isa ka utod nga babayi nagsaysay nga sang nag-utwas sa opisina ang isa ka paghambalanay tuhoy sa katapusan sang kalibutan, ginyaguta sia bangod ginpanugda niya nga basahon nila ang Mateo kapitulo 24. Apang, pagligad sang pila ka adlaw, ang isa sang iya mga kaupdanan sa trabaho nagsiling sa iya nga ginbasa niya ang kapitulo kag naluyagan ini. Isa ka publikasyon ang napahamtang, kag ginhimo ang mga kahimusan para sa isa ka pagtuon sa Biblia upod sa ila sang iya bana. Ang nahauna nga pagtuon naglawig sing tubtob sa alas dos sang kaagahon. Pagkatapos sang ikatlo nga pagtuon, nagsugod sila sa pagtambong sa mga miting, kag wala madugay pagkatapos sina nag-untat sila sa pagpanigarilyo kag nakigbahin sa ministeryo. Natabo ayhan ini kon ang aton utod nga babayi wala manikasog nga ipaambit ang iya paglaum sa iban?
4 Mga Kabutho: Kinaandan na para sa Saksi nga mga pamatan-on nga makaeksperiensia sing pag-ipit sang mga katubotubo sa eskwelahan kag mahadlok nga basi pakanubuon sila sang iban nga mga pamatan-on bangod sang pagpakigbahin sa hilikuton nga pagbantala. Ang isa ka Cristianong tin-edyer sa Estados Unidos nagsiling: “Nahadlok ako sa pagpanaksi sa iban nga mga pamatan-on bangod basi yamuhaton ako.” Gani ginlikawan niya ang mga higayon nga makapanaksi sa iya mga kabutho sa eskwelahan kag sa teritoryo. Paano mo mapalambo ang kusog agod maatubang ang pag-ipit sang mga katubotubo? Magsalig kay Jehova, nga nagatinguha nga matigayon ang iya kahamuot. (Hulu. 29:25) Ipabugal ang imo ikasarang sa paggamit sang Pulong sang Dios sa imo ministeryo. (2 Tim. 2:15) Ang pamatan-on nga bag-o lang ginbalikwat nangamuyo kay Jehova, nga nagapangabay sa iya nga buligan sia nga mapalambo ang handum nga masugilanon ang iya mga kabutho. Nagsugod sia sa pagpanaksi sing di-pormal sa eskwelahan, nakatigayon sing maayong mga resulta, kag sang ulihi nagpakighambal sa tanan nga kilala niya. Sia naghinakop: “Ini nga mga pamatan-on nagakinahanglan kag maluyag sang paglaum para sa palaabuton, kag ginagamit kita ni Jehova agod buligan sila.”
5 Mga Kaingod: Mahimo nga may mga kaingod kita ukon iban pa nga kakilala nga naugot sa aton bangod sang kon sin-o kita kag kon ano ang aton ginatuuhan. Kon nahangawa ka sa ila ginahunahuna, pamangkuta ang imo kaugalingon: ‘Nahibaluan bala nila ang kamatuoran nga nagadul-ong sa kabuhi nga walay katapusan? Ano ang himuon ko agod malab-ot ang ila tagipusuon?’ Nakita sang isa ka manugtatap sa sirkito nga may maayong mga resulta kon magpanaksi sa mga isigkatawo sing tagdiutay apang sing regular. Makitluoy kay Jehova para sa kinahanglanon nga kusog kag kaalam agod padayon nga makita ang mga bunayag sing tagipusuon.—Filip. 4:13.
6 Mahimo mahamuot ang mga manugpamatok kon magpadala kita sa negatibo nga pag-ipit sang mga katubotubo, apang para bala ini sa kaayuhan gid nila—ukon sa aton? Si Jesus ginpamatukan anay sang iya mismo mga kasimanwa. Ginbatas pa gani niya ang masakit nga mga hambal sang iya mga utod sa iloy. Apang nahibaluan niya nga mabuligan lamang niya sila paagi sa pagsunod sa dalanon nga ginpahamtang sang Dios para sa iya. Busa, si Jesus “nagbatas sang amo nga nagasupak nga hambal sang mga makasasala batok sa ila mismo mga kaayuhan.” (Heb. 12:2, 3) Amo man sini ang dapat naton himuon. Mangin determinado nga himuon ang bug-os nga masarangan sa imo pribilehiyo nga ibantala ang mensahe sang Ginharian. Paagi sa paghimo sini, “maluwas mo ang imo kaugalingon kag ang mga nagapamati sa imo.”—1 Tim. 4:16.