“Paiwaga ang Inyo Kapawa”

¹ Ang kalibutan sa palibot naton yara sa kadudulman sa moral kag espirituwal nga paagi. Ginapadayag sang kapawa sang kamatuoran ang “di-mabungahon nga mga buhat” sang kadudulman agod malikawan ining makamamatay nga mga kasandaran. Gani, naglaygay si apostol Pablo sa mga Cristiano: “Padayon kamo sa paglakat subong mga anak sang kapawa.”​—⁠Efe. 5:​8, 11.

² Ang “bunga sang kapawa” tuhay gid sa kadudulman sang kalibutan. (Efe. 5:9) Agod mapatubas ini nga bunga, kinahanglan nga mangin tumalagsahon nga mga halimbawa kita sa Cristiano nga pagkabuhi, ang sahi sang mga tawo nga ginakahamut-an ni Jesus. Dapat man naton ipakita ang mga kinaiya subong sang bug-os tagipusuon, kahanuot, kag kapagsik nga pagsakdag sa kamatuoran. Ini nga bunga dapat ipakita sa aton adlaw-adlaw nga pagkabuhi kag sa aton ministeryo.

³ Mag-iwag sa Tanan nga Higayon: Si Jesus nagsugo sa iya mga disipulo: “Paiwaga ang inyo kapawa sa atubangan sang mga tawo.” (Mat. 5:16) Bilang pag-ilog kay Jesus, ginapabanaag naton ang kapawa ni Jehova paagi sa pagbantala tuhoy sa Ginharian sang Dios kag sa iya mga katuyuan. Nagaiwag kita subong mga sulu kon magduaw kita sa mga puluy-an sang mga tawo kag kon ginapalapnag naton ang kamatuoran sa trabaho, sa eskwelahan, sa aton mga kaingod, ukon bisan diin man nga may higayon kita.​—⁠Filip. 2:⁠15.

⁴ Si Jesus nagsiling nga ang iban magadumot sa kapawa. (Juan 3:20) Gani wala nagaluya ang aton buot kon indi luyag sang kalabanan nga mag-iwag sa ila “ang kapawa sang mahimayaon nga maayong balita tuhoy kay Cristo.” (2 Cor. 4:4) Mabasa ni Jehova ang tagipusuon sang katawhan kag indi niya luyag nga makaupod sang iya katawhan ang mga nagabuhat sing pagkadi-matarong.

⁵ Kon ginasunod naton ang mga dalanon ni Jehova kag ginaagom ang espirituwal nga kapawa, mapabanaag naton ini sa iban. Kon makita nila paagi sa aton paggawi nga ‘nagaangkon [kita] sing kapawa sang kabuhi,’ nian mapahulag man sila sa paghimo sing kinahanglanon nga mga pagbag-o agod mangin mga manugdala sing kapawa.​—⁠Juan 8:⁠12.

⁶ Paagi sa pagpaiwag sang aton kapawa, nagahatag kita sing kadayawan sa aton Manunuga kag nagabulig sa mga sinsero nga makilala sia kag matigayon ang paglaum nga kabuhi nga walay katapusan. (1 Ped. 2:12) Sanglit may kapawa kita, gamiton naton ini agod buligan ang iban nga makita ang dalan paguwa sa espirituwal nga kadudulman kag magpatubas sang mga buhat nga iya sang kapawa.