“Paiwaga ang Inyo Kapawa”

1. Ano nga pribilehiyo ang dapat naton ipaambit?

¹ Halin sa pagbutlak kag pagtunod sang adlaw, ang katahom sang kapawa nagadayaw kay Jehova nga Dios. Apang may isa ka sahi sang kapawa nga luyag ni Jesus nga tigayunon sang iya mga disipulo—ang “kapawa sang kabuhi.” (Juan 8:12) Ang pagtigayon sining espirituwal nga kapawa isa ka pinasahi nga pribilehiyo apang may upod ini nga mabug-at nga responsibilidad. Si Jesus nagsiling: “Paiwaga ang inyo kapawa sa atubangan sang mga tawo,” sa amo makabenepisyo man ang iban. (Mat. 5:16) Ini nga kapawa dapat naton ipaambit sa mga tawo karon bangod labi na gid nga nagadulom sa espirituwal ang kalibutan! Kaangay ni Cristo, paano naton mapaiwag ang aton kapawa?

2. Paano ginpakita ni Jesus nga importante ang pagpaambit sang espirituwal nga kapawa?

² Paagi sa Pagbantala: Gingamit ni Jesus ang iya tion, kusog, kag ginapanag-iyahan para ipahibalo ang kapawa sang kamatuoran sa mga tawo sa puluy-an, plasa, kag kabukiran—diin man sila makita. Nahibaluan niya ang daku nga balor sang paghatag sing espirituwal nga kapawa sa iban. (Juan 12:46) Para madamo pa gid nga tawo ang mabuligan, ginhanda ni Jesus ang iya mga disipulo nga mangin “kapawa sang kalibutan.” (Mat. 5:14) Ginapaiwag nila ang ila kapawa paagi sa paghimo sing maayo sa ila isigkatawo kag sa pagpaambit sing espirituwal nga kamatuoran.

3. Paano naton mapakita nga ginaapresyar gid naton ang kapawa sang kamatuoran?

³ Para sa katawhan sang Dios, isa ka daku nga responsibilidad ang ‘padayon nga paglakat subong mga anak sang kapawa,’ amo nga nagabantala sila kon diin may tawo. (Efe. 5:8) Bisan ang pagbasa lang sang Biblia ukon iban pa nga Cristianong publikasyon sa ulubrahan ukon eskwelahan mahimo na umpisahan sang paghambalanay parte sa Biblia. Ginhimo ini sang isa ka pamatan-on nga utod nga babayi amo nga nakasugod sia sing pagtuon sa Biblia kag nakapahamtang sing libro sa iya 12 ka klasmeyt!

4. Paano naton ‘mapaiwag ang aton kapawa’ paagi sa maayo nga paggawi?

⁴ Paagi sa Maayong Buhat: Ang pagpaiwag sang aton kapawa nagalakip man sang aton adlaw-adlaw nga paggawi. (Efe. 5:9) Ang aton Cristianong paggawi masami nga matalupangdan sa ulubrahan, eskwelahan, ukon iban pa nga publiko nga lugar, kag mahimo ini magresulta sa pagpaambit naton sang mga kamatuoran sang Biblia. (1 Ped. 2:12) Halimbawa, ginpatawag sang isa ka maestra ang ginikanan sang isa ka lima ka tuig nga bata bangod sang iya maayo nga batasan. Nagsiling ang maestra, “Wala gid ako sing nakita nga bata nga may matarong nga prinsipio kaangay sini!” Huo, ang aton pagbantala kag maayo nga paggawi nagaganyat sa mga tawo sa “kapawa sang kabuhi” kag nagahatag sing kadayawan sa aton Dios.