Kon Paano Buyukon ang Iban
1 Natigayon ni apostol Pablo ang reputasyon subong isa ka makabuluyok nga ministro. (Binu. 19:26) Bisan si Hari Agripa nagsiling sa iya: “Sa malip-ot nga tion mabuyok mo ako nga mangin Cristiano.” (Binu. 26:28) Ngaa nangin makabuluyok gid ang ministeryo ni Pablo? Nangatarungan sia sing makatarunganon gikan sa Kasulatan, ginabagay ang iya mga argumento sa iya mga tagpalamati.—Binu. 28:23.
2 Bilang pag-ilog kay Pablo, dapat man kita mangin makabuluyok sa aton ministeryo. Paano? Paagi sa paggamit sing paghantop kon nagapakighambal kag nagapamati sa iban. (Hulu. 16:23) Tatlo ka importante nga tikang ang magabulig sa aton agod mahimo ini.
3 Magpamati Sing Maayo: Samtang nagahambal ang isa ka tawo, magpamati sa isa ka butang nga lunsay ninyo maugyunan nga magamit mo sa pagpakighambal sa iya. Kon nagpautwas sia sing pagpamatok, tinguhai nga hantupon ang rason sa likod sini. Magabulig ini agod mahibaluan kon ano gid ang iya ginapatihan, kon ngaa nagapati sia sa sini, kag kon ngaa nakumbinsi sia sa sini. (Hulu. 18:13) Mataktikanhon nga pahambalon sia.
4 Magpautwas Sing mga Pamangkot: Kon ang isa ka tawo nagapati sa Trinidad, mahimo ka mamangkot: “Nagapati ka bala sugod sang una pa sa Trinidad?” Sundan ini sing: “Nausisa mo na bala sing maayo ang ginasiling sang Biblia tuhoy sini?” Mahimo ka man mamangkot: “Kon ang Dios bahin sang isa ka Trinidad, indi bala mapaabot naton kuntani nga maathag ini nga ginhambal sang Biblia?” Ang mga sabat sa sini magabulig sa imo sa pagpangatarungan sa indibiduwal kon ano ang ginasiling sang Kasulatan.
5 Maggamit Sing Mabakod nga Pangatarungan: Ginpamangkot sang Saksi ang isa ka babayi nga nagapati nga si Jesus Dios: ‘Kon ginatinguhaan mo nga iilustrar nga ang duha ka tawo magkapareho, ano nga relasyon sa pamilya ang mahimo nimo gamiton?’ Nagsabat sia: “Mahimo ko gamiton ang duha ka mag-utod.” Nagsugpon ang utod: “Ayhan bisan ang kapid. Apang sa pagtudlo sa aton nga tamdon ang Dios subong Amay kag ang iya kaugalingon subong Anak, ano nga mensahe ang ginpaalinton ni Jesus?” Nahangpan sang babayi nga ang isa mas magulang kag may mas daku nga awtoridad. (Mat. 20:23; Juan 14:28; 20:17) Ang iya hunahuna kag tagipusuon nalab-ot paagi sa arte sang pagbuyok.
6 Siempre pa, indi tanan nagabaton sang kamatuoran, bisan pa daw ano man ka makatarunganon kag daw ano man ka sibu ang aton presentasyon. Apang kaangay kay Pablo, mangin makugi kita sa pagpangita sa mga bunayag sing tagipusuon sa aton teritoryo, nagabuyok sa ila nga batunon ang mensahe sang Ginharian.—Binu. 19:8.