Mangin Makabuluyok sa Imo Pagpanudlo
1. Ano ang nalakip sa epektibo nga paggamit sang Pulong sang Dios sa pagministeryo?
1 Ang epektibo nga mga ministro, kaangay ni apostol Pablo, nakahibalo nga ang ‘paggamit sing husto sa pulong sang kamatuoran’ wala lamang nagalakip sing pagkutlo gikan sa Balaan nga Kasulatan. (2 Tim. 2:15) Samtang ginagamit naton ang Pulong sang Dios, paano kita mangin “makabuluyok” sa aton pagpanudlo?—Binu. 28:23.
2. Paano naton makumbinsi ang mga tawo nga magsalig sa Pulong sang Dios?
2 Ipatalupangod ang Pulong sang Dios: Una, ipatalupangod ang Biblia sa tagpalamati sa paagi nga makumbinsi sia nga nagaunod ini sing kaalam gikan sa Dios. Ang aton pagsalig sa Pulong sang Dios mahimo makapahulag sa aton tagpalamati nga talupangdon sing maayo ang ginasiling sang Kasulatan. (Heb. 4:12) Mahimo kita magsiling: “Nasapwan ko nga makabulig gid kon usisaon naton ang panghunahuna sang Dios sa sini nga butang. Talupangdon naton kon ano ang ginasiling sang Biblia.” Kon posible, ipatalupangod ang Pulong sang Dios paagi sa pagbasa sini.
3. Paano naton mabuligan ang tagpalamati nga mahangpan ang ginbasa nga teksto?
3 Ikaduha, ipaathag ang gingamit nga teksto. Madamo nga tawo ang nabudlayan sa paghangop sa teksto nga una pa lang nila nabatian ukon nabasahan. Kinaandan na nga ginapaathag naton kon paano ini naaplikar sa ginahambalan. (Luc. 24:26, 27) Ipadaku ang mga tinaga nga nagasakdag sa panguna nga punto. Pamangkuta ang tagpalamati agod mapat-od nga nahangpan niya ang teksto.—Hulu. 20:5; Binu. 8:30.
4. Ano ang ikatlo nga tikang agod mangin makabuluyok ang aton pagpanudlo?
4 Mangatarungan Paagi sa Kasulatan: Ikatlo, tinguhai nga lab-uton ang ila hunahuna kag tagipusuon. Buligi ang tagbalay kon paano niya maaplikar ang teksto. Ang pagpangatarungan paagi sa Kasulatan mahimo makabuyok sa isa ka tawo nga bag-uhon ang iya panghunahuna. (Binu. 17:2-4; 19:8) Halimbawa, pagkatapos mabasa ang Salmo 83:18, mahimo kita mangatarungan kon ngaa importante ang paghibalo sa ngalan sang isa ka tawo agod mangin suod sa iya. Nian, mahimo kita mamangkot, “Ang paghibalo bala sa ngalan sang Dios makabulig agod magsalig pa gid kita nga pamatian ang aton mga pangamuyo?” Mapadayag ang praktikal nga kapuslanan sang teksto kon iangot mo ini sa kabuhi sang tagbalay. Ining makabuluyok nga pagpanudlo gikan sa Pulong sang Dios magapahulag sa mga interesado nga simbahon si Jehova, ang matuod kag buhi nga Dios.—Jer. 10:10.