Madinalag-on nga Pagpanaksi sa Telepono

¹ Ang aton tulumuron subong mga Saksi ni Jehova indi lamang ang pagpakigbahin sa pagbantala sing maayong balita kundi man ang paglab-ot sa tanan nga aton masarangan paagi sa mensahe sang Ginharian. (Binu. 10:​42; 20:24) Samtang ang pamalaybalay nga hilikuton amo gihapon ang panguna nga paagi sa paglab-ot sa mga tawo, nahisayran naton nga indi naton masugilanon ang tanan bisan pa sa kalalangan sining sistematiko nga paagi. Gani agod ‘matuman sing bug-os ang aton ministeryo,’ nagagamit kita sing iban pa nga mga paagi​—⁠pati na ang pagpanaksi sa telepono​—⁠agod makita ang tulad-karnero nga mga indibiduwal.​—⁠2 Tim. 4:⁠5.

² Sa madamo nga duog, ang mga tawo nagapuyo sa mga apartment nga estrikto kaayo ang seguridad, sa mga tinukod nga madamo nga pamilya ang nagaistar, ukon sa mga komunidad nga may guardia sa gawang, diin mabudlay himuon ang aton kinaandan nga paagi sang pagpamalaybalay agod malab-ot ang mga tawo. Apang, madamo nga manugbantala ang madinalag-on gid sa paglab-ot sa sining mga tawo paagi sa telepono. Bisan pa indi ini mahimo nga mahapos diri sa Pilipinas, posible makakuha sing mga numero sang telepono sa direktoryo sang telepono para sa mga direksion sa sulod sang teritoryo sang inyo kongregasyon. Subong man, madamo sang nagapanaksi sa dalan, mga parke, ukon mga shopping mall ang nakakuha sang mga numero sang telepono sang mga nasugilanon nila.

³ Nagapangalag-ag ka bala sa paglakip sang pagpanaksi sa telepono sa imo ministeryo? Ang isa ka utod nga lalaki nagabaton: “Indi ko luyag nga may magtawag sa akon sa balay nga nagabaligya sang bisan ano nga butang, gani indi ako ugyon sa sini nga sahi sang pagpanaksi.” Apang, sa tapos sang duha lamang ka pagtawag sa telepono, sia nagsiling: “Naluyagan ko gid ini! Wala gid ako maghunahuna nga matabo ini, apang naluyagan ko gid ini! Ang mga tawo wala nagadali sa telepono, kag matigayon mo ang tanan nga kinahanglan mo. Epektibo gid ini!” Ang isa ka utod nga babayi may amo man nga reaksion: “Wala gid ako anay nalipay sa pagpanaksi sa telepono. Ang matuod, indi ko ini luyag himuon. Apang gintilawan ko ini kag nasapwan ini nga tuman ka mabungahon. Nakahimo ako sing 37 ka pagduaw liwat paagi sa pagpanaksi sa telepono kag nakatigayon sing mas madamo nga pagtuon sangsa masarangan ko!” Kon handa ka nga tilawan ang pagpanaksi sa telepono, mahimo ka man magmadinalag-on.

⁴ Pag-organisar Para sa Pagpanaksi sa Telepono: Ang hilikuton sa pagpanaksi sang kongregasyon ginadumalahan sang manugtatap sa pag-alagad. Depende sa kinahanglanon, mahimo tangduan sang hubon sang mga gulang ang isa pa ka gulang ukon ang isa ka sangkol nga ministeryal nga alagad sa pagbulig sa iya sa pag-organisar sang pagpanaksi sa telepono.

⁵ Diin mo makuha ang mga numero sang telepono? Kon ang tinukod nga estrikto kaayo ang seguridad may listahan sang mga telepono, mahimo nimo makuha didto ang mga numero. Kon wala naman, ayhan mahimo nimo kopyahon ang mga ngalan sang mga residente gikan sa direktoryo sa lobby kag pangitaon ini sa kinaandan nga libro sang telepono.

⁶ Kon ang mga gulang nagaduaw sa mga masakiton ukon mga balatianon, sarang sila mangin maabtik sa pagpalig-on sa ila nga makigbahin sa pagpanaksi sa telepono. Ayhan ang isa ka gulang makahimo sing pila ka tawag samtang nagapanilag ang manugbantala. Pagkatapos sini ang manugbantala naman ang manawag. Madamo sang nagsugod sa sining paagi ang nagahinguyang sing pila ka minuto kada adlaw sa sining hilikuton, kag naluyagan gid nila ini.

⁷ Mga Panugda Agod Magmadinalag-on: Sang ginpalakat ni Jesus ang iya mga disipulo agod magbantala, “ginpadala [niya] sila sing tagduhaduha.” (Luc. 10:1) Ngaa? Nahibaluan niya nga paagi sa pagpangabudlay sing magkaupod mahimo sila makatuon kag makapalig-on sa isa kag isa. Amo man sa pagpanaksi sa telepono. Paagi sa pagpangabudlay nga magkaupod, makatuon kamo gikan sa isa kag isa, makabinagbinag sang natabo sa inyo, kag makahatag sing mga panugda para sa masunod nga pagpakighambal. Bisan sa tion sang pagtawag sa telepono, makabuligay kamo sa pagpangita sing nagakaigo nga impormasyon.

⁸ Agod mapauswag ang maathag nga panghunahuna kag konsentrasyon, maglingkod kon diin mahimo mo mapahamtang ang imo mga kinahanglanon sa pagpanaksi​—⁠Biblia, Reasoning nga libro, Ginapatuman nga brosyur, mga magasin, kag iban pa​—⁠sa atubangan mo. Isulat ang pila ka presentasyon, kag ibutang sa lugar nga makita mo. Mangin handa sa paghupot sing husto kag kompleto nga mga rekord, pati na ang petsa kag oras sang adlaw agod mahibaluan mo kon san-o tawgan ang interesado nga nasalapuan.

⁹ Ang mga tawo masunson mainandamon kon makabati sila sing indi kilala nga tingog sa telepono. Gani mangin mainayuhon, mainabyanon, kag mataktikanhon. Paagi lamang sa imo tingog nga mahibaluan sang tagbalay ang imo pagkatawo kag pagkasinsero. Magrelaks kag maghambal sing tinagipusuon. Maghambal sing malagday kag maathag kag nga may bastante nga tunog agod mabatian. Hatagi sing kahigayunan ang tagbalay sa paghambal. Ihatag ang imo bug-os nga ngalan, kag sambita kon diin ka nagapuyo. Indi naton luyag nga maghunahuna ang mga tawo nga naganegosyo kita paagi sa telepono. Sa baylo magsiling nga nagatawag ka sa tanan nga residente sa isa ka partikular nga tinukod, ipahangop sa iya nga sia ang tuyo mo gid nga tawgan.

¹⁰ Mga Presentasyon sa Telepono: Madamo sang mga introduksion sa pahina 9-15 sang Reasoning nga libro ang mahimo ibagay sa pagpanaksi sa telepono. Mahimo ka makasiling: “Nagtawag ako sa imo bangod indi ako makakadto kag makaduaw sa imo sing personal. Ang katuyuan kon ngaa nagtawag ako amo ang pagpangabay sang imo opinyon sa isa ka makawiwili gid nga pamangkot.” Nian ihatag ang pamangkot.

¹¹ Ang nahauna nga presentasyon sa ubos sang tig-ulo nga “Crime/Safety” mahimo magamit sa sining paagi: “Hello. Ang akon ngalan amo si ․․․․․․․․. Malapit lang ang amon balay. Luyag ko ipasalig sa imo nga wala ako sing ginabaligya ukon ginasurbe. Nagtawag ako bangod sang akon pagkabalaka sa personal nga kaluwasan. May madamo nga krimen sa palibot naton, kag apektado sini ang aton kabuhi. Sa banta mo, magaabot bala ang tion nga ang tanan nga tawo makadayandayan sa dalan sa gab-i kag makabatyag nga hilway sa peligro? [Pasabta sia.] Tuguti ako nga basahon kon ano ang ginsaad nga himuon sang Dios.”

¹² Ang paggamit sing direkta nga paagi sa pagtanyag sing mga pagtuon sa Biblia sa telepono may madamong maayo nga resulta. Ang pagtuon mahimo mapasundayag sa sulod sang pila ka minuto. Magpangabay nga duawon sia sa iya balay agod padayunon ang pagtuon, ukon kon nagapangalag-ag sia, magpangabay nga padayunon ang pagtuon sa telepono sa iban nga adlaw.

¹³ Kon ginatapos mo ang isa ka paghambalanay, dumduma ang isa ka butang nga magadul-ong sa imo pagduaw sa iya sa balay niya ukon sa pagpadala sa koreo sang isa ka literatura. Kon nagapangalag-ag sia sa paghatag sa imo sang iya direksion, magpangabay nga matawgan sia liwat. Mahimo nga pagkatapos pa sang pila ka tawag nga mangin komportable sia nga agdahon ka sa iya balay.

¹⁴ Paghimo Sing Una nga Tikang: Ginsugdan sang isa ka 15-anyos nga utod nga babayi ang iya pag-alagad sang isa ka aga paagi sa pagtawag sa telepono. Nasugilanon niya ang isa ka babayi nga nagpasugot sa pagbaton sing Ihibalo nga libro. Sang gindul-ong sang utod nga babayi ang libro sa balay, luyag mahibaluan sang babayi kon paano nahibaluan sang pamatan-on ang iya numero sang telepono, kay wala ini sa listahan. Nagsala lang gali ang utod sa pag-dial! Ginbaton sang babayi ang pagtuon kag karon sia isa na ka di-bawtismado nga manugbantala.

¹⁵ Ang isa ka utod nga babayi nakakuha sing teritoryo sa telepono apang ginpaiway ang paghimo sini sing tatlo ka semana bangod sang kahangawa. Ano ang naghatag sa iya sing kaisog sa pagsugod? Nadumduman niya ang artikulo sa Enero 22, 1997 nga Awake! nga natig-uluhan sing “When I Am Weak, Then I Am Powerful.” Tuhoy ini sa isa ka Saksi nga nagabantala sa telepono walay sapayan sang mga sablag sa lawas. Ang utod nga babayi nagsiling: “Nangamuyo ako kay Jehova kag nangabay sing kusog. Nangabay ako nga hatagan niya ako sing nagakaigo nga mga tinaga agod mahatag ang akon presentasyon.” Ano ang resulta sang iya una nga adlaw sang pagpanaksi sa telepono? Sia nagreport: “Ginsabat ni Jehova ang akon pangamuyo. Namati sa akon ang mga tawo, kag naghimo ako sing kahimusan para sa isa ka pagduaw liwat.” Sang ulihi ang iya pagpanaksi sa telepono nagresulta sa isa ka pagtuon sa Biblia. Sia naghinakop: “Gintudluan ako liwat ni Jehova nga magsalig sa iya kag indi sa akon kaugalingon.”​—⁠Hulu. 3:⁠5.

¹⁶ Ang pagtanyag sing kamatuoran paagi sa telepono nangin isa ka madinalag-on nga paagi sa pagbantala sing maayong balita. Maghanda sing maayo, kag makigbahin sing tinagipusuon. Indi maluyahan sing buot kon indi makatigayon sing maayo nga resulta sa una nga pila ka tawag. Mangamuyo sing panuytoy ni Jehova, kag makigsugilanon sa iban nga nagabantala sa sining makakulunyag nga paagi. Upod ang handum nga wala sing isa ang malaktawan sa aton teritoryo, kabay nga himuon naton sing maid-id ang aton ministeryo nga may pagkahilingagawon.​—⁠Roma 10:​13, 14.