Pagplano sing Una—Para sa Ano?
1 Ginapamensaran naton tanan sing maayo ang aton mga plano para sa palaabuton. Ang mga tawo nga may paglaum sa duta nagapaabot sa pagkabuhi sing dayon sa matarong nga bag-ong kalibutan sang Dios. Apang ang aton tinagipusuon nga paglaum mahimo maagaw bangod sang pila ka butang. Kinahanglan ang hanuot nga panikasog agod mahuptan ang aton kabuhi nga nahugod sa mga intereses sang Ginharian kag indi matublag sang makasululay nga mga kailigbon sang unod.—1 Juan 2:15-17.
2 Indi gid mahangpan sang kalibutan ang mga tulumuron sang espirituwal nga mga tawo. (1 Cor. 2:14) Samtang ang iban nga mga tawo nagahimakas agod matigayon ang kabantugan, gahom, ukon manggad, nagapanikasog kita nga matigayon ang espirituwal nga mga bahandi. (Mat. 6:19-21) Kon tinguhaan naton nga ipasibu ang aton panghunahuna sa pagtamod sang kalibutan tuhoy sa palaabuton, malab-ot gid bala naton ang aton espirituwal nga mga tulumuron? Sa dili madugay ang aton tagipusuon mahimo mahugod na lamang sa kalibutanon nga mga butang. Paano naton ini malikawan?
3 “Isuklob Ninyo si Ginuong Jesucristo”: Ang isa ka paagi agod mapat-od kon bala ginahuptan naton ang aton palaabuton nga nahugod sa mga intereses sang Ginharian amo ang pag-usisa sang mga butang nga aton ginahambalan. Pirme bala naton ginahambalan ang materyal nga mga butang kag ang kalibutanon nga mga intereses? Kon amo, dapat naton binagbinagon kon bala wala na nahugod sa espirituwal nga mga talaksan ang aton tagipusuon. Mahimo kinahanglan nga hatagan naton sing daku pa nga igtalupangod ang ‘pagsuklob kay Ginuong Jesucristo sa baylo nga magplano sing una para sa mga kailigbon sang unod.’—Roma 13:14.
4 Sarang ‘masuklob si Cristo’ sang mga pamatan-on paagi sa pagplano sing una para sa tion nga magasulod sila sa bug-os tion nga ministeryo. Isa ka pamatan-on nga luyag magregular payunir ang nagdaku sa isa ka kultura diin ang lapnag nga pamatasan amo ang para sa mga pamatan-on nga lalaki nga mangin malig-on sa pinansial. Gani, nangin masako sia sa negosyo tubtob nangin pakulahaw na lamang ang iya pagtambong sa mga miting kag pagpakigbahin sa ministeryo. Sang nagsalig sia sa mga pulong ni Jesus nga makita sa Mateo 6:33 kag gindula ang wala sing pasingadtuan nga rutina, nagsulod sia sa bug-os tion nga pag-alagad. Karon, upod ang maayo nga konsiensia, nagaalagad sia kay Jehova, subong sang ginsiling niya, ‘tubtob sa iya bug-os nga ikasarang.’
5 Ang Biblia nagasiling nga maalamon nga magplano para sa palaabuton. (Hulu. 21:5) Kabay nga himuon naton ini tanan nga ginauna gid sa aton hunahuna ang kabubut-on sang Dios.—Efe. 5:15-17.