Lab-uta ang Tagipusuon sang Imo Estudyante
1 Antes magkayab sa langit, ginsugo ni Jesus ang iya mga disipulo nga tudluan ang iban nga “tumanon” ang tanan nga butang nga ginsugo niya. (Mat. 28:19, 20) Agod ‘matuman’ sang isa ang mga sugo ni Cristo, ang impormasyon dapat maglab-ot sa iya tagipusuon. (Sal. 119:112) Paano mo mapahulag ang tagipusuon sang ginatun-an mo sing Biblia?
2 Mangamuyo sing Panuytoy ang Dios: Ang paghimo sing mga disipulo hilikuton sang Dios. Ang iya pagpakamaayo, indi ang aton mga ikasarang, amo ang kinahanglanon para sa kadalag-an. (Binu. 16:14; 1 Cor. 3:7) Sa amo, ang pagpangayo sing bulig ni Jehova paagi sa pangamuyo agod matudlo ang kamatuoran sa iban kinahanglanon.—Isa. 50:4.
3 Hantupa Kon Ano ang Ginapatihan sang Estudyante: Ang paghibalo kon ano ang ginapatihan sang mga tawo kag kon ngaa nagapati sila sa sini makahatag sa aton sing paghangop sa kon ano ang dapat isiling agod malab-ot ang ila tagipusuon. Ngaa naganyat ang estudyante sa isa ka partikular nga panudlo? Ano ang nagkumbinsi sa iya nga patihan ini? Ini nga ihibalo makabulig sa aton sa paghambal sing mahantupon.—Binu. 17:22, 23.
4 Magtukod sing Isa ka Makatarunganon, Makasulatanhon nga Argumento: Ang kamatuoran dapat mahantupan sang estudyante. (Binu. 17:24-31) Dapat kita maghatag sing maayo nga rason para sa aton paglaum. (1 Ped. 3:15) Apang, himua ini pirme sa malulo kag mapailubon nga paagi.
5 Pabakura Ini Paagi sa mga Ilustrasyon: Ang mga ilustrasyon wala lamang nagapahapos nga mahangpan ini sang estudyante kundi nagapukaw man ini sing mga emosyon. Nagaapektar ini sang hunahuna kag tagipusuon. Masami ini gingamit ni Jesus. (Mar. 4:33, 34) Sa pagkamatuod, agod mangin epektibo, ang ilustrasyon dapat nga nagakaigo sa punto nga ginahambalan, kag dapat ini may kahilabtanan sa kabuhi sang estudyante.
6 Ipakita ang mga Kapuslanan sang Pagbaton sa Kamatuoran: Luyag mahibaluan sang mga tawo ang kapuslanan sang pag-aplikar sang ila natun-an. Buligi ang imo estudyante nga mahangpan ang kaalam sang ginsiling ni Pablo sa 2 Timoteo 3:14-17.
7 Indi maluyahan sing buot kon ang iban wala nagahulag sa imo pagpanudlo. Indi tanan nga tagipusuon mabinatunon. (Mat. 13:15) Apang, ang iban nga mga indibiduwal nangin mga tumuluo. (Binu. 17:32-34) Kabay nga ang inyo mga panikasog nga lab-uton ang mga tagipusuon sing maayong balita magabulig sa madamo pa nga batunon kag “tumanon” ang ginsugo ni Jesus.