Maghanda sa Pagtuon sang Tagna ni Isaias!
1 “Ang matutom nga mga sumilimba makasalig nga si Jehova . . . indi magatugot nga ang kalibutan ni Satanas magadugay sing isa pa ka adlaw sangsa ginapangayo sang hustisya.” Daw ano ka makapalig-on nga pinamulong! Gikan diin ini ginbalikwat? Sa Ang Tagna ni Isaias—Kapawa Para sa Tanan nga Tawo I. Ang tagna bala ni Isaias nagahatag sa aton sing rason agod maghinakop sing subong sina ka makapalig-on? Huo! Sa sina nga tulun-an sang Biblia, ang tema sang kaluwasan mabaskog kag maathag nga ginpadaku. (Isa. 25:9) Amo kon ngaa makapalig-on gid para sa aton nga tun-an ini nga bahin sang Pulong sang Dios sa Pagtinuon Sang Kongregasyon sa Libro. Yara bala kita agod tun-an ini kada semana? Ngaa dapat nga yara kita?
2 Sa Isaias 30:20, si Jehova ginatawag nga aton “Dakung Instruktor.” Ang tagsa ka Cristiano dapat magpamati sing maayo samtang nagahambal si Jehova sa aton paagi sa mga pahina sang iya Pulong kag paagi sa pasad-sa-Biblia nga mga publikasyon nga ginaaman sang “matutom kag mainandamon nga ulipon.” (Mat. 24:45; Isa. 48:17, 18) Matuod gid ini sa libro nga Tagna ni Isaias I. Paano ka makabenepisyo sing labi gid gikan sa pagtuon sa sini?
3 Maghanda Agod Makapakigbahin: Magtalana sing nagakaigo nga tion kada semana agod maghanda para sa pagtinuon sa libro. Basaha ang tagsa ka gintangdo nga parapo. Pamensari ang tagsa ka naimprinta nga mga pamangkot. Markahi ang mga sabat sa imo libro. Ang ginbalikwat nga mga bersikulo gikan sa Isaias gin-imprinta sa madukot nga letra. Basaha ini sing maayo. Tuhoy sa iban pa nga mga kasulatan nga ginsambit, tan-awa ini agod mahibaluan mo kon ano ang kaangtanan sini sa materyal. Pamalandungi ang imo ginatun-an. Nian ipaambit ang mga resulta sang imo paghanda sa imo grupo sang pagtinuon sa libro.
4 Dapat buligan sang utod nga nagadumala sang pagtinuon sa libro ang tanan nga nagatambong nga gamiton sing maayo ang Biblia kag apresyahon ang praktikal nga kabilihanan sang materyal nga ginatuptupan. Kon ikaw ang una nga gintawag sa pagkomento, maghatag sing isa ka simple, direkta nga sabat. Kon nahimo na ina sang isa, mahimo mo mapasangkad sing detalyado ang punto nga ginahambalan. Ayhan mapakita mo kon paano ginasuportahan sang yabi nga kasulatan ang tema. Tinguhai nga magkomento sa imo kaugalingon nga tinaga, kag magkalipay sa pagpakigbahin sa paghinun-anon.
5 May kalangkag nga usisaon naton sing magkaupod ang hamili nga mensahe sang tulun-an ni Isaias. Magapalig-on ini sa aton nga magkabuhi kada adlaw nga nagapaabot sing malipayon sang pagluwas ni Jehova!—Isa. 30:18.