Bag-ong Programa sang Sirkito nga Asambleya

Ang isa ka kahulugan sang kahadlok amo ang “daku nga pagtahod kag pagkapunaw, ilabi na sa Dios.” Ginalaragway sini ang maayo nga kahadlok nga ginpatuhuyan sa Kasulatan subong “pamuno sang kaalam.” (Sal. 111:10) Sa pagpatuhay, may isa pa ka sahi sang kahadlok nga nagahugakom sa kalibutan ni Satanas sa palibot naton. Paano naton malikawan ini nga sahi sang kahadlok samtang ginapalambo ang matinahuron nga kahadlok kay Jehova? Ining pamangkot ginasabat sang bag-ong programa sang sirkito nga asambleya para sa 2002 nga tuig sa pag-alagad. Ang tema amo ang “Kahadluki Ninyo ang Dios kag Hatagi Sia Sing Himaya.” (Bug. 14:7) Mahangpan naton ang madamong paagi nga ang kahadlok ni Jehova nagabulig sa aton subong mga indibiduwal kag subong isa ka organisasyon.

Bisan pa ang kahadlok mahimo magpahangop sing kabalaka ukon pagkawalay kaisog kag pagpangalag-ag sa pag-atubang sa mabudlay nga mga kahimtangan, ang Biblia nagasiling: “Malipayon ang tagsatagsa nga nagakahadlok kay Jehova.” (Sal. 128:1) Ipakita sa aton sang programa sang asambleya kon paano naton maatubang sing madinalag-on ang mga hangkat sa matuod nga pagsimba. Makita naton kon paano buligan ang mga bag-uhan nga mapalambo ining maayo nga kahadlok sa Dios, nga magapahulag gid sa ila nga alagaron sia upod ang ila bug-os nga tagipusuon, kalag, hunahuna, kag kusog. (Mar. 12:30) Ang nahauna nga adlaw magahinakop paagi sa pamulongpulong sang manugtatap sa distrito nga “Labi Pa nga Magsuod sa Inyo mga Hinigugma.” Ipaathag niya kon paano kita makapabilin nga alisto sa mga panikasog sang Yawa nga ipahilayo kita kay Jehova, sa aton pamilya, kag sa aton Cristianong mga kauturan.

“Kahadluki Ninyo si Jehova, Indi ang mga Tawo” amo ang tema sang apat-ka-bahin nga simposium sa ikaduha nga adlaw. Ipaathag sini kon ngaa kag kon paano naton dapat dulaon ang bisan ano man nga kahadlok nga nagapugong sa aton nga matuman sing bug-os ang aton ministeryo ukon mahuptan ang aton integridad kag maayo nga konsiensia sa eskwelahan kag sa ulubrahan. Ang pamulongpulong publiko nga “Kahadluki Ninyo ang Dios kag Tumana ang Iya mga Sugo” napasad sa sunod-sunod nga mga hitabo nga ginlaragway sa Bugna kapitulo 14. Ang sirkito nga asambleya magahinakop paagi sa makapalig-on nga panuytoy nga “Magpadayon sa Paglakat nga Nagakahadlok kay Jehova.”

Ang Teokratikong Eskwelahan Para sa Ministeryo, modelo nga Miting sa Serbisyo, pamulongpulong sa bawtismo, kag sumaryo sang Pagtinuon sa Lalantawan amo ang dugang nga talalupangdon nga mga punto sa programa nga indi mo luyag mawasi. Agdaha ang imo mga estudyante sa Biblia sa pagtambong upod sa imo. Ang bisan sin-o nga luyag magpabawtismo dapat magpahibalo sa gilayon sa nagadumala nga manugtatap. Luyag naton tanan nga ipakita ang aton maayo nga kahadlok kay Jehova kag hatagan sia sing himaya paagi sa pagtambong sa tanan nga bahin sining talalupangdon nga programa!