‘Talan-awon Kamo sa Teatro’!
1 Si apostol Pablo nagsulat: “Kami nangin talan-awon sa teatro sa kalibutan, kag sa mga anghel, kag sa mga tawo.” (1 Cor. 4:9) Ano ang kahulugan sini, kag ano ang dapat nga epekto sini sa aton sa ministeryo naton karon?
2 Sa isa ka taga-Corinto, ang ekspresyon nga “talan-awon sa teatro” mahimo magpahanumdom sang katapusan nga talan-awon sa sambuwa sang mga gladiador sa Roma, diin ang ginpakamalaut nga mga tawo ginaparada sa atubangan sang linibo ka tumalan-aw antes sila patyon sing mapintas. Sing kaanggid, madamo nga tumalan-aw—mga tawo kag mga anghel—ang nakakita sang mga pag-antos nga ginbatas sang unang-siglo nga mga Cristiano bangod sang pagpanaksi sa Ginharian. (Heb. 10:32, 33) Madamo nga tumalan-aw ang natandog sa ila nagahupot-sing-integridad nga dalanon, subong nga madamo man ang natandog sa aton pagbatas sa modernong-adlaw nga arena. Kay sin-o kita talan-awon?
3 Sa Kalibutan kag sa mga Tawo: Kon kaisa ginabalita sang media ang mga hilikuton sang katawhan ni Jehova. Bisan pa ginapasalamatan naton ang maayong mga report nga matuod kag bunayag may kaangtanan sa aton hilikuton, nagapaabot man kita nga ipalapnag sang mga nagamulay sa aton ang malain nga mga report sa pulupanag-on. Walay sapayan sina, dapat naton padayon nga irekomendar ang aton kaugalingon subong mga ministro sang Dios “sa malain nga report kag sa maayo nga report.” (2 Cor. 6:4, 8) Nangin maathag sa bunayag-sing-tagipusuon nga mga tagpanilag nga kita amo ang matuod nga mga disipulo ni Jesucristo.
4 Sa mga Anghel: Ang espiritu nga mga tinuga nagatan-aw man sa aton. Ang Yawa kag ang iya mga demonyo nagabantay—apang nga “may daku nga kaakig,” nga nagatinguha nga padulugon ang “hilikuton sa pagpanaksi tuhoy kay Jesus.” (Bug. 12:9, 12, 17) Ang matutom nga mga anghel sang Dios nagabantay kag nagakasadya kon maghinulsol bisan ang isa ka makasasala. (Luc. 15:10) Ang paghibalo nga ginatamod sang mga anghel ang aton ministeryo subong ang labing hilingagawon, mapuslanon nga hilikuton nga ginahimo karon sa duta dapat magpabakod sa aton!—Bug. 14:6, 7.
5 Kon makasumalang ka sing pagpamatok ukon nagahunahuna ka nga ang imo ministeryo wala sing mga resulta, dumduma nga ikaw ang sentro sang igtalupangod sang bug-os nga uniberso. Ang imo matutom nga pagbatas nagasugid sing madamo tuhoy sa imo integridad. Sa ulihi, ang imo “maayong pagpakig-away sang pagtuo” magabulig sa imo agod ‘makapanguyapot sing malig-on sa kabuhi nga walay katapusan.’—1 Tim. 6:12.