“Diin Ako Makakita sing Tion?”
1 Amo sini ang panganduhoy sang madamo sa aton, kay ang aton kabuhi puno sing mga hilikuton. Ang tion amo kuno ang labing hamili kag ang labing umalagi sa aton mga pagkabutang. Gani diin kita makakita sing tion para sa mga butang nga importante gid, subong sang pagbasa kag pagtuon sa Pulong sang Dios?—Filip. 1:10.
2 Ang yabi, indi amo ang pagpangita sing dugang pa nga tion, kundi ang pagpamat-od kon ano ang luyag naton himuon sa aton tion. Kita tanan may 168 ka oras sa isa ka semana, ang 100 sa sini mahimo ginahinguyang sa pagtulog kag sa pagtrabaho. Gani paano naton magamit sing mapuslanon gid ang nabilin nga mga oras? Ang Efeso 5:15-17 nagalaygay nga maglakat kita “indi subong sang di-maalam kundi subong sang maalam nga mga tawo, nga ginabakal ang nagakaigo nga tion” kag ‘ginahangop kon ano ang kabubut-on ni Jehova.’ Ginapakita sini ang kinahanglanon nga gamiton sing bug-os ang tanan nga kahigayunan nga himuon ang mga butang nga ginasiling ni Jehova nga importante.
3 Ginpaanggid ni Jesus ang aton adlaw sa iya ni Noe. (Luc. 17:26, 27) Ang mga tawo sadto masako sa matag-adlaw nga hilikuton sa kabuhi. Apang, nakakita si Noe sing tion sa pagtukod sing daku nga arka kag sa pagbantala. (Heb. 11:7; 2 Ped. 2:5) Paano? Paagi sa pag-una sa kabubut-on sang Dios kag sa pagtuman sa iya paagi sa paghimo sang mga butang sing “amo gid.”—Gen. 6:22.
4 Ano ang Dapat Unahon? Si Jesus nagsiling: “Ang tawo mabuhi, indi lamang sa tinapay, kundi sa tagsa ka pulong nga nagaguwa sa baba ni Jehova.” (Mat. 4:4) Kada semana, nagabaton kita sing espirituwal nga “pagkaon sa nagakaigo nga tion.” (Luc. 12:42) Nagakinahanglan ini sing isa ka regular nga iskedyul para sa personal nga pagbasa kag pagtuon agod mahangpan ini tanan kag agod bug-os nga makabenepisyo. Bilang pagpasalamat sa espirituwal nga pagkaon, wala naton ini ginatamod subong sang pagkaon nga ginaserbe sing padali, nga dapat ubuson sa gilayon subong sang padali nga pagkaon sang isa sa pisikal nga kalan-on. Sa baylo, ang nagakaigo nga apresasyon nagapahulag sa aton sa paghinguyang sing tion nga tun-an kag hangpon ang espirituwal nga mga butang.
5 Ang pagkuha sing espirituwal nga pagkaon makadul-ong sa kabuhi nga walay katapusan. (Juan 17:3) Takus ini nga unahon sa aton adlaw-adlaw nga iskedyul. Makakita bala kita sing tion para sa adlaw-adlaw nga pagbasa sing Biblia kag paghanda para sa Cristianong mga miting? Huo, makakita kita sing tion. Nian, mabaton naton ang “daku nga padya” bangod sang paghibalo kag paghimo sing kabubut-on sang Dios.—Sal. 19:7-11.