Tukura ang Imo Kabuhi nga Nakasentro sa Pag-alagad kay Jehova
1 Ginpaanggid ni Jesus ang iya mga tagpalamati sa duha ka sahi sang manunukod. Ang isa nagtukod sang iya dalanon sang kabuhi sa igang sang pagkamasinulundon kay Cristo kag nakabatas sang mga bagyo sang pagpamatok kag kapipit-an. Ang isa naman nagtukod sa balas sang makagod nga pagkadimasinulundon kag wala makabatas sang nag-abot ang pag-ipit. (Mat. 7:24-27) Nagakabuhi sa katapusan sining sistema sang mga butang, nagaeksperiensia kita sing madamong bagyo sang kalisdanan. Sa malayo ang gal-um sang dakung kapipit-an nagahugpong sing madasig. Makabatas bala kita tubtob sa katapusan nga mabakod gihapon ang aton pagtuo? (Mat. 24:3, 13, 21) Nagadepende ini sa kon paano naton karon ginatukod ang aton kabuhi. Busa, hilingagawon nga pamangkuton ang aton kaugalingon, ‘Ako bala nagatukod sing mabakod sang akon Cristianong pagkabuhi nga nakasentro sa matinumanon nga pag-alagad sa Dios?’
2 Ano ang buot silingon sang pagtukod sang aton kabuhi nga nakasentro sa pag-alagad kay Jehova? Nagakahulugan ini sang paghimo kay Jehova nga sentro mismo sang aton kabuhi. Nagalakip ini sang pagpadaku sa Ginharian subong ang aton panguna nga ginakabalak-an. Nagalakip ini sang pagtuman sa Dios sa tanan nga hilikuton sa aton adlaw-adlaw nga kabuhi. Nagakinahanglan ini sang aton tinagipusuon nga pagtuon sa Biblia subong indibiduwal, pamilya, kag kongregasyon kag sa aton ministeryo sa latagon, nagahimo sini nga mga prioridad naton. (Manugw. 12:13; Mat. 6:33) Ining masinulundon nga dalanon nagaresulta sa kaangay sang igang nga pagtuo, nga indi mapukan walay sapayan sang bisan anong mga bagyo sang kalisdanan nga mahimo magaabot.
3 Makalilipay nga makita ang minilyon ka tawo nga nagatukod sing masinaligon sang ila kabuhi kag sang ila paglaum para sa palaabuton nga nakasentro sa pag-alagad sa Dios, subong sang ginhimo ni Jesus. (Juan 4:34) Ginasunod nila ang dalayon nga iskedyul sang teokratikong mga hilikuton kag nagaagom sing bugana nga mga pagpakamaayo subong resulta. Isa ka iloy ang nagapaathag kon paano nila sang iya bana napadaku sing madinalag-on ang ila duha ka anak nga lalaki sa pag-alagad kay Jehova: “Ginpuno namon ang amon kabuhi sing kamatuoran—pagtambong sa tanan nga kombension, paghanda kag pagtambong sa mga miting, kag paghimo sa pag-alagad sa latagon nga isa ka regular nga bahin sang amon kabuhi.” Ang iya bana nagdugang: “Ang kamatuoran indi bahin sang amon kabuhi, ini amo ang amon kabuhi. Ang tanan pa nga butang nasentro sa sini.” Ginhimo man bala nimo ang pag-alagad kay Jehova subong prioridad sa inyo pamilya?
4 Maghimo Sing Praktikal nga Semanal nga Iskedyul: Ang organisasyon ni Jehova nagabulig sa aton sa pagsunod sing isa ka maayong espirituwal nga rutina paagi sa paghimos sing lima ka miting sa isa ka semana. Ang mga Cristiano nga nagatukod sang ila kabuhi nga nakasentro sa pagsimba kay Jehova nagaplano sang ila sekular kag pamilya nga hilikuton agod matambungan ining tanan importante nga mga miting. Wala nila ginatugutan ang indi tanto ka importante nga mga butang nga magabalabag sa ila tayuyon nga pagtambong.—Filip. 1:10; Heb. 10:25.
5 Ang hamtong nga mga Cristiano nakahangop nga kon paano ang regular nga pagkaon sa pat-od nga tion sa kada adlaw importante, ang paghimo sing pat-od nga iskedyul para sa personal kag pamilya nga pagtuon, lakip na ang paghanda para sa mga miting kinahanglanon man. (Mat. 4:4) Makatalana ka bala sing dimagkubos 15- ukon 20-minutos kada adlaw para sa personal nga pagtuon? Ang sekreto amo ang indi pagtugot nga masal-utan sang iban nga mga butang ang tion nga gintalana para sa pagtuon. Himua ini nga isa ka mapuslanon nga batasan. Ayhan kinahanglan nga magbugtaw ka sing mas temprano kada aga sangsa ginahimo nimo karon. Ang 17,000 ka katapo sang bug-os kalibutan nga pamilya Bethel nagabangon sing maaga agod mahambalan ang teksto sa isa ka adlaw. Siempre pa, ang pagbugtaw sing maaga nagakinahanglan sing pagtulog sa gab-i sa rasonable nga oras agod sugdan ang masunod nga adlaw nga maayo ang pamatyag kag nakapahuway.
6 Kon ikaw isa ka ulo sang pamilya, pangunahi ang pagplano kag paghimo sang iskedyul sang teokratikong hilikuton sang inyo pamilya. Ang iban nga mga pamilya magkaupod nga nagabasa sing Biblia, Yearbook, ukon iban pa nga publikasyon samtang nagapahunayhunay sila pagkatapos sang panihapon. Ang madamong ginikanan nga nakakita sa pagdaku sang ila kabataan nga mangin mabakod sa espirituwal nga mga Cristiano nagasiling nga ang isa ka butang nga nakabulig sa ila kadalag-an amo ang kinabatasan sang pamilya sa pagtalana sing isa ka gab-i kada semana nga sa sini magkaupod sila nga nagahinguyang sing tion sa pagpabakod sang ila espirituwalidad. Ang isa ka amay nagsiling: “Sa banta ko ang amon kabataan naglambo sa espirituwal ilabi na bangod sa amon tayuyon nga pagtuon sang pamilya kon Mierkoles sang gab-i, nga ginsugdan mga 30 ka tuig na ang nagligad.” Ang tatlo niya ka kabataan ginbawtismuhan tanan sing bataon pa, kag sang ulihi sila nga tatlo nagsulod sa bug-os tion nga pag-alagad. Dugang sa pagtuon subong pamilya, ang mga presentasyon sa pag-alagad sa latagon ukon mga bahin sa miting mahimo maensayo, kag ang iban pa nga makapapagros nga hilikuton sarang mahimo nga magkaupod.
7 Sa imo semanal nga iskedyul, ‘nagbakal [ka bala] sing tion’ para sa pagbantala sing Ginharian? (Col. 4:5) Ang kalabanan sa aton masako, nga may ginaatipan nga mga salabton sa pamilya kag sa kongregasyon. Kon indi kita maghimo sing pat-od nga mga kahimusan sa pagpakigbahin sa pagbantala kag sa pagpanudlo nga hilikuton kada semana, tuman kahapos nga matabunan sang iban pa nga mga butang ining kinahanglanon nga hilikuton. Ang tag-iya sang isa ka daku nga rantsuhan sang baka nagsiling: “Sadtong mga 1944 narealisar ko nga ang lamang nga paagi nga makaguwa ako amo ang pag-iskedyul sing isa ka pat-od nga adlaw para sa sini. Tubtob karon wala gihapon ako nagaobra sa isa ka adlaw sa sulod sang semana sang pag-alagad.” Nasapwan sang isa ka Cristianong gulang nga ang paghimo sing pat-od nga iskedyul sa pagpanaksi nakabulig sa iya nga makapromedyo sing 15 ka oras sa isa ka bulan sa pagbantala nga hilikuton. Kon may sekular sia nga hilimuon kon Sabado, ginaiskedyul niya ini pagkatapos sang iya pag-alagad sa latagon sa aga. Ikaw bala kag ang imo pamilya sarang makaiskedyul sing dimagkubos isa ka adlaw kada semana para sa pag-alagad sa latagon, ginahimo ini nga bahin sang inyo espirituwal nga dalanon sang kabuhi?—Filip. 3:16.
8 Usisaa ang Imo Rutina Sang Kabuhi: May mga butang nga nagaupang agod matukod naton ang aton kabuhi nga nakasentro sa pag-alagad kay Jehova. Ang dimapaktan nga mga sirkunstansia mahimo magabalabag sa aton naplano sing maayo nga iskedyul sa pagtuon, pagtambong sa mga miting, kag sa pag-alagad. Kag ginahimo sang aton Kaaway, nga si Satanas, ang tanan nga masarangan niya agod ‘mabalabagan ang aton banas’ kag maupangan ang aton mga plano. (1 Tes. 2:18; Efe. 6:12, 13) Indi pagtuguti ining mga balagbag nga magpaluya sang imo buot, agod mag-untat ka. Himua ang bisan ano man nga kinahanglanon nga mga pagpasibu agod matuman ang imo naiskedyul nga teokratikong hilikuton. Ang determinasyon kag pagkamapinadayunon kinahanglanon agod mahimo ang kon ano gid ang mapuslanon.
9 Indi naton dapat pagtugutan ang kalibutanon nga mga impluwensia kag ang makapabugtoy nga epekto sang aton dihimpit nga unod nga isal-ot ang indi espirituwal nga mga hilikuton nga magaubos sing labi kag labi pa sang aton tion kag igtalupangod. Kinahanglan ang pag-usisa sa kaugalingon, nga nagagamit sing mga pamangkot subong sang: ‘Ang akon pagkabuhi amat-amat bala nga nangin ditimbang ukon nagburon, kon sa aton pa? Ginasugdan ko bala nga itukod ang akon kabuhi nga nakonsentrar sa nagataliwan nga mga butang sining kalibutan? (1 Juan 2:15-17) Daw ano kadamo nga tion ang ginahinguyang ko sa personal nga mga paghimud-os, paglakbay, paghampang, ukon iban pa nga kalingawan—lakip na ang pagtan-aw sing telebisyon ukon pagbasa sing pahapyaw sa Internet—kon ipaanggid sa tion nga ginahinguyang sa espirituwal nga mga hilikuton?’
10 Kon namutikan mo nga ang imo kabuhi nagumon sa nagadugang pa nga dikinahanglanon nga mga hilikuton, ano ang dapat himuon? Subong sang ginpangamuyo ni Pablo nga ang iya mga kauturan “magpasibu,” ukon “mapahisanto sing nagakaigo,” ngaa indi mangayo sing bulig kay Jehova agod makakonsentrar liwat sa pag-alagad sa iya? (2 Cor. 13:9, 11, fnt.) Nian determinado nga himua ang imo pamat-od kag maghimo sing kinahanglanon nga mga pagpasibu. (1 Cor. 9:26, 27) Si Jehova magabulig sa imo nga malikawan ang pagliso sa tuo ukon sa wala sang matinumanon nga pag-alagad sa iya.—Ipaanggid ang Isaias 30:20, 21.
11 Magpabilin nga Masako sa Makalilipay nga Pag-alagad sa Dios: Minilyon ang mabinalak-on gid nga nagapangita sing kalipay apang natukiban nila nga samtang nagahingapos ang ila kabuhi, ang materyal nga mga butang nga maukod nila nga ginpangita wala gali makahatag sa ila sing dayon nga kalipay. Ini “pagpanikasog [lamang] sa hangin.” (Manugw. 2:11) Sa pihak nga bahin, ginahuptan naton ang aton kabuhi nga nakasentro kay Jehova, ‘ginabutang sia pirme sa aton atubangan,’ maagom naton ang daku nga kaayawan. (Sal. 16:8, 11) Ini bangod si Jehova ang rason nga kita nagakabuhi. (Bug. 4:11) Kon wala sia, ang Daku nga Manughatag sing Katuyuan, ang kabuhi wala sing pulos. Ang pag-alagad kay Jehova nagapuno sang aton kabuhi sing mapuslanon, may katuyuan nga hilikuton nga nagabenepisyo sa aton subong man sa iban sing dayon, huo, sa walay katapusan.
12 Importante nga indi kita dapat magpulupatawhay lamang kag dulaon ang aton pagbatyag sing pagkahilingagawon nahanungod sa madasig-nagahinampot nga katapusan sang kalibutan ni Satanas. Ang aton adlaw-adlaw nga pagkabuhi naimpluwensiahan sang aton pagtamod tuhoy sa palaabuton. Ang mga tawo sang panahon ni Noe, nga wala anay magpati nga may yara tugob-globo nga anaw, ‘wala magsapak,’ nagsentro sang ila adlaw-adlaw nga pagkabuhi sa personal nga mga paghimud-os—pagkaon, pag-inom, kag pagminyo—tubtob nga ‘gin-anod sila tanan’ sang anaw. (Mat. 24:37-39) Karon, makita sang mga nagasentro sang ila kabuhi sa sining kalibutan ang ila mga paglaum para sa palaabuton nga magakapugday sa atubangan nila sa pinakadaku nga kalaglagan nga maeksperiensiahan sang tawo, “ang adlaw ni Jehova.”—2 Ped. 3:10-12.
13 Padayon, nian, nga tukura ang imo kabuhi nga nakasentro sa buhi nga Dios, si Jehova, kag himua ang iya kabubut-on. Wala sing pagkabutang nga matipon mo sa sining kabuhi nga may masaligan nga Tagsakdag subong kay Jehova. Indi sia mahimo nga magbutig—tumanon niya ang iya mga saad. (Tito 1:2) Indi sia mahimo nga mapatay—wala sing butang nga gintipon kay Jehova ang madula. (Hab. 1:12; 2 Tim. 1:12) Ang matinumanon kag may pagtuo nga pagkabuhi nga ginatukod naton karon amo lamang ang ginsuguran sang kabuhi nga magapadayon sa walay katubtuban sa makalilipay nga pag-alagad sa aton malipayon nga Dios!—1 Tim. 1:11; 6:19.
[Kapsion sa pahina 3]
“Ang kamatuoran indi bahin sang amon kabuhi, ini amo ang amon kabuhi. Ang tanan pa nga butang nasentro sa sini.”