Mga Pagpakamaayo Gikan sa Pagpakita sing Apresasyon sa Gugma ni Jehova—Bahin 2
1 Sa bahin sang nagligad nga bulan tuhoy sa sini nga tema, ginpatalupangod namon ang apat ka paagi nga sarang mapakita sa ministeryo ang aton apresasyon sa gugma ni Jehova. (1 Juan 4:9-11) Ginadugang namon diri ang lima pa ka paagi sa paghimo sini. Kon makigbahin kita sing bug-os sa pagbulig sa iban sa espirituwal, ginapakamaayo kita.
2 Di-pormal nga Pagpanaksi: Amo ini ang epektibo nga paagi sa pagpangita sa mga tawo nga ginagutom kag ginauhaw sa pagkamatarong kag sa pagpahamtang sing mapuslanon nga mga literatura sa ila. Mapuslanon nga ‘baklon ang nagakaigo nga tion’ kag magpanaksi sa tanan nga okasyon kag kay sin-o man nga masugilanon naton. (Efe. 5:16) Mahimo nga dapat kita magtipon sing kaisog agod makapanaksi sa sining paagi, apang kon ginaapresyar naton ang gugma sang Dios kag ang mga kinahanglanon sang mga tawo, magapanaksi kita sa tanan nga higayon.—2 Tim. 1:7, 8.
3 Ang isa ka misyonero ginpakamaayo sing bugana bangod sang pagpakighambal niya sa kaupod nga pasahero sa taksi. Ang tawo nagpakita sing interes. Ginhimo ang mga pagduaw liwat, kag ginsugdan ang pagtuon sa Biblia. Yadto nga tawo nagsulod sa kamatuoran kag nag-uswag tubtob sa punto nga nangin isa sia ka gulang sa kongregasyon!
4 Paghimo Sing Sulat: Ayhan indi ka makapamalaybalay bangod sang pisikal nga sablag ukon malain nga tiempo. Sarang kita makahimo sing sulat, nagahatag sing malip-ot nga panaksi paagi sa sulat sa mga indibiduwal nga kilala naton, sa mga namatyan sing hinigugma, ukon sa mga tawo sa teritoryo nga wala sa balay sang nagduaw kita. Malakip naton ang isa sang aton suno-sa-tion nga mga tract nga may makalilipay nga mensahe pasad sa Biblia kag nagapalig-on sa makabaton sini sa pagbalos kon may yara sia mga pamangkot. Kon magbalos sia, gamita ang imo personal nga direksion ukon ang direksion sang Kingdom Hall; palihug indi paggamita ang direksion sang sanga talatapan.
5 Pagpanaksi sa Telepono: Amo ini ang maayo nga paagi agod malab-ot ang mga tawo nga indi naton masugilanon sa pamalaybalay nga hilikuton. Kon himuon naton ini sing mainandamon, upod ang kaayo, taktika, kag kalantip, mahimo makatigayon kita sing maayo gid nga sabat. Ang Pebrero 2001 nga Ang Aton Ministeryo sa Ginharian, pahina 5-6, nagahatag sing praktikal nga mga panugda kon paano makatigayon sing labing maayo nga mga resulta.
6 Sang ang isa ka utod nga babayi nagpanaksi sa telepono, ginpamangkot niya ang babayi kon bala nahunahuna na niya kon ano nga palaabuton ang nagahulat sa iya kag sa iya pamilya. Ang babayi nagsiling nga nahunahuna na niya ini. Ginsugid niya nga bangod nadulaan gid sia sing paglaum, nagpakuribong na lang sia sa balay. Natandog sa matuod nga pagkabalaka sang utod nga babayi, ang babayi nagpasugot nga makigkita sa iya sa malapit nga tiendahan. Subong resulta, ang babayi gilayon nga nagbaton sing isa ka pagtuon sa Biblia!
7 Pag-abiabi sa mga Estranghero: Kon ginahigugma naton ang aton mga kaingod, mangin alisto kita sa pagtalupangod kay bisan sin-o man nga estranghero nga nagaduaw sa aton duog tilipunan kag pabatyagon sia nga ginaabiabi. (Roma 15:7) Ipakita sa iya nga yara sia sa tunga sang mga tawo nga hanuot gid nga interesado sa iya espirituwal nga kaayuhan. Ang aton matuod nga interes kag ang aton ginatanyag nga isa ka pagtuon sa Biblia mahimo magpahulag sa iya nga batunon ang aton bulig.
8 Ang Aton Maayo nga Paggawi: Paagi sa aton maayo nga paggawi, ginapunihan naton ang kamatuoran. (Tito 2:10) Kon ang mga tawo sa kalibutan magahambal sing dalayawon nga mga butang tuhoy sa aton subong mga Saksi ni Jehova, ginapadunggan nila ang aton Dios. (1 Ped. 2:12) Makabulig man ini sa iban sa pagsugod sa paglakat sa dalan padulong sa kabuhi.
9 Ngaa indi repasuhon ining lima ka paagi agod mapakita ang aton apresasyon sa daku nga gugma ni Jehova sa aton kag iaplikar ini? (1 Juan 4:16) Samtang ginahimo ninyo ini, maani ninyo ang madamo nga pagpakamaayo.