Mga Ginikanan—Hanasa ang Inyo mga Kabataan Kutob sa Pagkalapsag
1 “Hanasa ang bata suno sa dalanon nga para sa iya; bisan kon magtigulang na sia indi sia magtalikod sa sini.” (Hulu. 22:6) Mga ginikanan, kon indi ninyo luyag nga ang inyo mga kabataan “magtalikod” sa dalan sang kamatuoran, san-o ninyo dapat sugdan ini nga paghanas? Sa pagkalapsag!
2 Sang nagsiling si Pablo nga si Timoteo gintudluan sang espirituwal nga mga butang “kutob sa pagkalapsag,” maathag nga ang buot niya silingon amo ang kutob sang lapsag pa sia. (2 Tim. 3:14, 15) Subong resulta, si Timoteo nagdaku nga isa ka maayo gid nga espirituwal nga tawo. (Filip. 2:19-22) Mga ginikanan, dapat man ninyo sugdan “kutob sa pagkalapsag” ang paghanas sa inyo mga kabataan agod ‘magtubo sila sa atubangan ni Jehova.’—1 Sam. 2:21.
3 Hatagi Sila sing Tubig nga Kinahanglan Nila Agod Magtubo: Subong nga ang diutay nga tanom nagakinahanglan sing dalayon nga suplay sang tubig agod magtubo nga isa ka daku nga kahoy, ang tanan sing pangidaron nga mga kabataan dapat man mahupog sang tubig sang kamatuoran sang Biblia agod magtubo nga mangin hamtong nga mga alagad sang Dios. Ang panguna nga paagi agod tudluan ang kabataan sing kamatuoran kag buligan sila nga magsuod kay Jehova amo ang regular nga pagtuon sang pamilya sa Biblia. Apang mga ginikanan, hatagi sing konsiderasyon kon daw ano ka lawig magapamati ang tagsa ka bata. Para sa magamay nga mga kabataan, ang masunson kag malip-ot nga mga sesyon sang pagtudlo mahimo nga mas epektibo sangsa pila lamang apang malawig nga mga sesyon.—Deut. 11:18, 19.
4 Indi pagpakadiutaya ang ikasarang sa pagtuon sang inyo mga kabataan. Sugiri sila sing mga sugilanon tuhoy sa mga karakter sa Biblia. Padrowinga sila sing mga eksena sa Biblia ukon ipaarte sa ila ang mga hitabo sa Biblia. Gamita sing maayo ang aton mga video kag mga audiocassette, pati na ang mga drama sa Biblia. Ibagay ang pagtuon sang pamilya sa edad kag ikasarang sa pagtuon sang inyo mga kabataan. Ang una nga paghanas mahapos lamang, sing tigdiutay; apang samtang nagadaku ang bata, ang paghanas sa iya dapat mangin mas masangkad kag progresibo. Himua nga buhi kag lainlaina ang pagtuon sa Biblia. Luyag ninyo nga ang inyo mga kabataan ‘magtigayon sing kahidlaw’ sa Pulong, gani himua ini nga makawiwili sa masarangan ninyo.—1 Ped. 2:2.
5 Tuguti Sila nga Makigbahin sa Kongregasyon: Magpahamtang sing progresibo nga mga tulumuron para sa inyo mga kabataan agod makigbahin sila sing bug-os sa kongregasyon. Ano ang mahimo nga nahauna nga tulumuron nila? Ang mga ginikanan nga may duha ka magagmay nga kabataan nagsiling: “Ginhanas sila una sa pagpungko sing mahipos sa Kingdom Hall.” Pagkatapos sini, buligi ang kabataan sa pagkomento sa mga miting sa ila kaugalingon nga mga tinaga kag himua nga tulumuron nila nga magpalista sa Teokratikong Eskwelahan Para sa Ministeryo. Sa pag-alagad sa latagon, ang maayong mga tulumuron nga dapat lab-uton amo ang pagdaho sing tract sa ganhaan, pagbasa sing kasulatan, paghatag sing presentasyon sa magasin, kag pagpakigsugilanon sa tagbalay sa mapuslanon nga paagi.
6 Magpahamtang sing Mapagsik nga Halimbawa: Adlaw-adlaw bala nga mabatian kamo sang inyo mga kabataan nga nagapamulong tuhoy kay Jehova kag nagapangamuyo sa iya? Makita bala nila kamo nga nagatuon sang iya Pulong, nagatambong sa mga miting, nagapakigbahin sa ministeryo sa latagon, kag nalipay sa paghimo sang kabubut-on sang Dios? (Sal. 40:8) Importante nga makita nila ini kag ginahimo ninyo ini nga mga butang sing magkaupod. Ang isa ka hamtong na nga anak nga babayi nagsiling tuhoy sa iya iloy, nga nagpadaku sa anom ka kabataan nga mangin matutom nga mga Saksi: “Ang ginadayaw gid namon amo ang halimbawa mismo ni Nanay—mas epektibo ini sangsa pulong.” Ang isa ka ginikanan nga may apat ka kabataan nagsiling: “‘Si Jehova amo ang una’ indi lamang isa ka kinaandan nga dinalan kundi kon paano kami nagakabuhi.”
7 Mga ginikanan, sugdi sing temprano ang paghanas sa inyo mga kabataan, nagatudlo sa ila sang kamatuoran gikan sa Pulong sang Dios, nagapahamtang sing progresibo nga mga tulumuron, kag nagahatag sing pinakamaayo nga halimbawa. Malipay kamo nga ginhimo ninyo ini!