Hanasa ang Inyo Kabataan nga Mangin mga Ministro
1. Ano ang ginapalig-on sang Salmo 148:12, 13 nga himuon sang mga ginikanan?
1 Ginaagda ni Jehova ang mga pamatan-on nga magdayaw sa iya. (Sal. 148:12, 13) Gani, indi lang tudluan sang Cristianong mga ginikanan ang ila kabataan sa mga kamatuoran sa Biblia kag sa kasuguan sang Dios parte sa moral. Hanason man nila sila nga mangin ministro sang maayong balita. Paano ini mahimo sing madinalag-on?
2. Ano ang epekto sang maayong halimbawa sang ginikanan sa iya kabataan?
2 Maayong Halimbawa: Ginsilingan ni Gideon ang iya 300 ka tinawo: “Tolok kamo sa akon, kag maghimo sing subong.” (Huk. 7:17) Kinaandan na nga ginaobserbahan kag ginailog sang mga kabataan ang ila mga ginikanan. May isa ka amay nga nagatrabaho sa gab-i. Kon magpauli sia sa Sabado sang aga, imbes nga matulog, ginaupod niya sa ministeryo ang iya kabataan bisan pa kapoy sia katama. Bisan wala sia sing ginahambal, ginatudluan niya sila nga unahon ang ministeryo. (Mat. 6:33) Nakita bala sang inyo kabataan nga malipayon kamo sa pagpakigbahin sa nanuhaytuhay nga porma sang pagsimba, subong sang pagpangamuyo, pagbasa sing Biblia, pagkomento, kag pagbantala? Siempre pa, indi ka makapahamtang sing himpit nga halimbawa. Pero mangin mas mahapos sa kabataan nga batunon ang inyo mga panikasog nga tudluan sila sa pagsimba kay Jehova kon makita nila kamo nga maukod sa pag-alagad sa Iya.—Deut. 6:6, 7; Roma 2:21, 22.
3. Paano mabuligan sang mga ginikanan ang ila kabataan sa pagpahamtang kag paglab-ot sang espirituwal nga mga tulumuron?
3 Espirituwal nga mga Tulumuron: Wala sing kakapoy nga ginatudluan sang mga ginikanan ang ila kabataan sa paglakat, sa paghambal, sa pagsuksok sing bayo, kag iban pa. Sa pagdaku sang mga kabataan, may bag-o na naman sila nga mga tulumuron. Kon Cristiano ang ila mga ginikanan, ginabuligan nila ang ila kabataan sa pagpahamtang kag paglab-ot sang espirituwal nga mga tulumuron suno sa ila edad kag mga ikasarang. (1 Cor. 9:26) Ginatudluan mo bala ang imo kabataan sa pagkomento sing kinaugalingon kag paghanda sang ila bahin sa Teokratikong Eskwelahan Para sa Ministeryo? (Sal. 35:18) Ginahanas mo bala sila sa lainlain nga aspekto sang pagministeryo? Ginapatudok mo bala sa ila ang tulumuron nga magpabawtismo kag magsulod sa bug-os tion nga pag-alagad? Ginabuligan mo bala sila nga makig-upod sa malipayon kag makugi nga mga kauturan para mapalig-on sila?—Hulu. 13:20.
4. Kon hanason sa ministeryo sang mga ginikanan ang ila kabataan samtang bata pa, ano ang ila mabenepisyuhan?
4 Nagsiling ang salmista: “O Dios, gintudloan mo ako kutub sa akon pagkapamatan-on, kag tubtub karon ginpahayag ko ang imo makatilingala nga mga binuhatan.” (Sal. 71:17) Hanasa ang inyo kabataan nga mangin ministro samtang bata pa sila. Kon maghamtong na sila, makabenepisyo gid sila bangod ginbuligan ninyo sila nga magpahamtang sing espirituwal nga pundasyon!—Hulu. 22:6.