Ngaa Padayon nga Magbantala?

¹ Madugay na bala ginabantala ang Ginharian sa inyo komunidad? (Mat. 24:14) Kon amo, mahimo ka magbatyag nga natuptupan na sing nagakaigo ang teritoryo sang kongregasyon. Kag kon magbantala ka, ayhan ang kalabanan nga tawo nga masugilanon mo daw wala nagasapak sa mensahe sang Ginharian. Walay sapayan sini, talupangda ang ginbaton tuhoy sa matuod nga mga disipulo ni Jesus sa pahina 141 sang Tagna ni Isaias II nga libro: “Sa iban nga mga lugar, ang mga resulta sang ila ministeryo mahimo nga daw diutay lamang kon ipaanggid sa kadamuon sang hilikuton kag panikasog nga ginhimo. Walay sapayan sini, nagbatas sila.” Apang ngaa padayon nga magbantala?

² Dumduma si Jeremias: Ang aton matutom nga pagbatas sa hilikuton nga pagbantala dapat wala nasandig sa kon bala mamati ang mga tawo sa aton ukon indi. Si Jeremias nagbantala sing 40 ka tuig sa amo gihapon nga teritoryo bisan pa diutay lang ang namati sa iya kag madamo ang nagpamatok sa iya mensahe. Ngaa nagpadayon si Jeremias? Bangod ginhimo niya ang ginapahimo sang Dios sa iya kag ang iya ihibalo sa kon ano ang mahanabo sa palaabuton nagtiklod sa iya sa paghambal.​—⁠Jer. 1:17; 20:9.

³ Amo man sini ang aton kahimtangan. “Ginsugo [kita ni Jesus] sa pagbantala sa mga tawo kag sa paghatag sing maid-id nga panaksi nga ini ang Isa nga gintangdo sang Dios nga mangin hukom sang mga buhi kag sang mga patay.” (Binu. 10:42) Ang mensahe nga dala naton mahimo magkahulugan sing kabuhi kag kamatayon sa mga makabati sini. Ang mga tawo hukman pasad sa ila reaksion sa maayong balita. Bangod sini, ang aton katungdanan amo ang paghimo kon ano gid ang ginasugo sa aton. Bisan indi magpamati ang mga tawo, kahigayunan naton nga ipakita ang kadalumon sang aton gugma sa ila kag ang aton debosyon kay Jehova paagi sa padayon nga paghimo sa kon ano ang dapat naton himuon. Apang may dugang pa.

⁴ Nagabenepisyo Kita: Ang paghimo sang kabubut-on sang Dios, bisan ano man ang reaksion sa teritoryo, nagahatag sa aton sing nasulod nga paghidait, kaayawan, kag kalipay, nga indi makita sa iban pa nga paagi. (Sal. 40:8) Ang aton kabuhi may matuod nga katuyuan. Sa aton labi nga pagpakigbahin sa ministeryo, ang aton tagipusuon kag hunahuna labi nga nakonsentrar sa paglaum kag kalipay nga mabuhi sa bag-ong kalibutan sang Dios. Ang pagpamalandong sa sining Makasulatanhon nga mga saad nagapauswag sang aton espirituwalidad kag nagapabakod sang aton kaangtanan kay Jehova.

⁵ Bisan pa indi naton makita ang gilayon nga mga resulta sa aton hilikuton nga pagbantala, ang binhi sang kamatuoran mahimo matanom sa tagipusuon sang isa ka indibiduwal nga magapanugdo sa gintalana nga tion ni Jehova. (Juan 6:44; 1 Cor. 3:6) Wala sing nakahibalo sa aton kon pila pa ang magatuon sa Ginharian paagi sa mga panikasog sang katawhan ni Jehova, ayhan sa aton lugar ukon sa bug-os nga kalibutan.

⁶ Sing labi pa ka hilingagawon, dapat naton sundon ang instruksion ni Jesus: “Magpabilin kamo nga nagabantay, magpabilin kamo nga nagamata, kay wala kamo makahibalo kon san-o ang gintalana nga tion. Apang, ang ginasiling ko sa inyo ginasiling ko sa tanan, Magpabilin kamo nga nagabantay.” (Mar. 13:​33, 37) Gani, nian, kabay nga padayon naton nga ibantala ang maayong balita sang Ginharian, ginapahalipay ang tagipusuon ni Jehova samtang nagapakigbahin kita sa pagpakabalaan sa iya daku kag balaan nga ngalan.