Kon Ngaa Nagabalikbalik Kita
1. Ano nga pamangkot ang nagautwas tuhoy sa aton pagbantala?
1 Sa madamo nga duog, masunson naton nga matuptupan ang aton teritoryo. Walay sapayan sini, pirme kita nagabalikbalik sa amo gihapon nga balay, bisan pa ginasilingan kita sang tagbalay nga indi sia interesado. Ngaa ginaduaw gihapon naton ang mga wala nagapakita sing interes?
2. Ano ang panguna nga rason ngaa nagapadayon kita sa pagbantala?
2 Gugma kay Jehova kag sa mga Tawo: Ang panguna nga rason kon ngaa nagapadayon kita sa pagbantala amo ang aton gugma kay Jehova. Ginapahulag kita sini nga gugma sa pagsugid sa iban tuhoy sa aton Labing Gamhanan nga Dios. (Luc. 6:45) Ginapahulag kita sang aton gugma kay Jehova nga sundon ang iya mga sugo kag buligan man ang iban nga tumanon ini. (Hulu. 27:11; 1 Juan 5:3) Ang aton katutom sa sini nga hilikuton wala nasandig sa reaksion sang mga tawo. Bisan pa ginhingabot ang mga Cristiano sang una nga siglo, ‘wala sila nag-untat’ sa pagbantala. (Binu. 5:42) Kon indi mamati ang mga tawo sa aton, wala kita nagakaluyahan sing buot, sa baylo nagapadayon kita sa pagpadayag sang aton tudok nga gugma kag debosyon kay Jehova.
3. Paano ang gugma sa mga tawo makabulig sa aton nga magpadayon sa pagbantala?
3 Nagapadayon man kita sa pagbantala bangod ginahigugma naton ang aton mga isigkatawo. (Luc. 10:27) Indi luyag ni Jehova nga malaglag ang bisan sin-o. (2 Ped. 3:9) Bisan nga masunson nga ginatuptupan ang isa ka teritoryo, makasapo gihapon kita sang mga luyag mag-alagad kay Jehova. Halimbawa, sa Guadeloupe, bisan pa ang kadamuon sang mga Saksi ni Jehova 1 sa kada 56 ka tawo sa sini nga isla, 214 gihapon ang nabawtismuhan sang nagligad nga tuig. Halos 20,000 ang nagtambong sa Memoryal, buot silingon, 1 sa kada 22 ka tawo ang nakatambong sa Memoryal sa sina nga isla!
4. Sa ano nga mga paagi nagabag-o ang teritoryo?
4 Mga Pagbag-o sa Teritoryo: Padayon nga nagabag-o ang aton teritoryo. Kon sang una naton nga pagduaw wala sing interesado nga tagbalay, mahimo nga sa masunod nga pagduaw, ang iban nga katapo sang pamilya nga wala pa makabati sang aton mensahe mamati na sa aton. Ukon mahimo nga makasapo kita sing bag-o nga mga nagapuyo kag interesado sila. Ang mga kabataan sang nagapamatok nga mga ginikanan mahimo nga dalagku na kag nagkinaugalingon. Ini sila mahimo nga mamati sa aton mensahe.
5. Ano ang posible nga mga rason ngaa mamati na ang mga tawo?
5 Nagabag-o man ang mga tawo. Sang una, si apostol Pablo ‘manugpasipala kag manughingabot kag tampalasan nga tawo.’ (1 Tim. 1:13) Sing kaanggid, madamo sang mga nagaalagad kay Jehova karon nga sang una indi interesado sa kamatuoran. Ang pila nagapamatok pa gani anay sa maayong balita. Samtang nagabag-o ang mga kahimtangan sang kalibutan, ang pila ka manugpamatok ukon mga wala nagasapak sang una, mahimo nga mapahulag sa pagpamati karon. Ang iban mahimo nga mamati na pagkatapos makaagi sing mga trahedya, kaangay sang pagkapatay sang katapo sang pamilya, pagpahalin sa trabaho, problema sa kuarta, ukon pagbalatian.
6. Ngaa dapat kita magbantala nga may kapagsik?
6 Malapit na ang katapusan sining sistema sang mga butang, amo nga ginadalian ang aton hilikuton nga pagbantala kag pagpanudlo. (Isa. 60:22) Busa, nagapadayon kita sa pagbantala nga may kapagsik kag ginatinguhaan nga mahuptan ang positibo nga panimuot. Mahimo nga mamati ang aton masunod nga masugilanon. Kinahanglan nga magpadayon kita sa pagbantala! ‘Sa paghimo sini maluwas naton ang aton kaugalingon kag ang mga nagapamati sa aton.’—1 Tim. 4:16.