Dugangi ang Imo Kalipay sa Pagbantala
1 Kalipay sa pagpaambit sing maayong balita—nabatyagan mo bala ini sa imo ministeryo? Kon indi kita maghalong, bangod sang malaut nga kalibutan sa palibot, mahimo nga mangin mahuluy-on kita sa pagbantala, sa amo madula ang aton kalipay. Ang pagpanghikot sa di-masinapakon nga teritoryo mahimo man magpaluya sang aton buot. Anong praktikal nga mga tikang ang mahimo naton agod madugangan ang aton kalipay sa pagbantala?
2 Mangin Positibo: Ang paghupot sing positibo nga panimuot makabulig gid. Ang isa ka paagi amo ang pagpamalandong sa aton pinasahi nga pribilehiyo nga mangin mga “masigkamanugpangabudlay sang Dios.” (1 Cor. 3:9) Upod man naton si Jesus sa pagtuman sining hilikuton. (Mat. 28:20) Kag ginasuportahan niya kita upod ang kasuldadusan sang mga anghel. (Mat. 13:41, 49) Sa amo, makasalig kita nga ginatuytuyan sang Dios ang aton mga panikasog. (Bug. 14:6, 7) Gani bisan ano man ang reaksion sang mga tawo sa aton hilikuton, may daku nga pagkasadya sa langit!
3 Maghanda Sing Maayo: Ang maayo nga paghanda nagadugang man sang aton kalipay. Ang paghanda para sa ministeryo wala gid man nagakinahanglan sing madamo nga hilikuton. Pila man lang ka minuto ang kinahanglan agod mabinagbinag ang isa ka mahambalan nga punto gikan sa aton bag-o nga mga magasin ukon sa tanyag nga literatura para sa bulan. Magpili sing isa ka presentasyon gikan sa “Kon Ano ang Isiling Tuhoy sa mga Magasin,” sa Ang Aton Ministeryo sa Ginharian, ukon mangita sa Reasoning nga libro sing isa ka epektibo nga introduksion. Kon nabudlayan ka sa pagpamatok nga masami ginapautwas sang mga tagbalay, maghanda sing sabat sa ila pagpamatok kag iliso ang igtalupangod sa makapukaw sang interes nga tema. Ang Reasoning nga libro makabulig gid sa paghimo sini. Ang paggamit sining mga bulig makahatag sa aton sing kompiansa nga kinahanglanon naton sa pagbantala nga may kalipay.
4 Mangamuyo Sing Hanuot: Ang pangamuyo kinahanglanon para sa nagadugay nga kalipay. Sanglit ginahimo naton ang hilikuton ni Jehova, kinahanglan kita makitluoy sa iya sang iya espiritu, nga ang isa ka bunga amo ang kalipay. (Gal. 5:22) Si Jehova magahatag sa aton sing kusog nga makapadayon sa pagbantala. (Filip. 4:13) Ang pagpangamuyo tuhoy sa aton ministeryo makabulig sa aton nga matigayon ang husto nga pagtamod sa mga butang kon may negatibo kita nga mga eksperiensia. (Binu. 13:52; 1 Ped. 4:13, 14) Kon nahadlok kita, ang pangamuyo makabulig sa aton nga makapadayon nga maisugon kag malipayon.—Binu. 4:31.
5 Mangita Sing mga Kahigayunan: Sa pagkamatuod, mas makalilipay ang aton ministeryo kon makapakigsugilanon kita sa mga tawo kag makapanaksi sa ila. Ang pagpamalaybalay sa lainlain nga oras, ayhan sa kahapunanon ukon temprano pa sa gab-i, mahimo magresulta sa kapin nga kadalag-an. Pirme ka may masugata nga mga tawo kon nagalakat ka sa kalsada, nagapamalaklon, nagasakay sa bus, ukon nagalagawlagaw sa parke. Ngaa indi maghanda sing isa ka malip-ot nga introduksion sa pagpakigsugilanon kag palapitan yadtong daw mainabyanon? Ukon mahimo nagatrabaho ka sing sekular ukon nagaeskwela sa pangpubliko nga eskwelahan, sa diin nagapakigsugilanon ka sa iban adlaw-adlaw. Ayhan makapanaksi ka paagi lamang sa pagpautwas sing isa ka Makasulatanhon nga tema nga makapukaw sing interes. Daku gid ang mahimo sang bisan diin man sa sini nga mga panikasog agod madugangan pa ang kalipay sang isa sa pagbantala.
6 Sanglit ang kalipay nagabulig sa aton sa pagbatas, daw ano ka importante nga mahuptan ini! Sa paghimo sini, magaani kita sing daku nga padya kon ining indi na masulit nga hilikuton matapos na. Ini mismo nga palaabuton makadugang sang aton kalipay sa pagbantala.—Mat. 25:21.