“Alagda si Jehova nga May Kasadya”
1. Ano ang isa ka tuburan sang daku nga kalipay sang mga alagad ni Jehova?
1 “Magkasadya kamo pirme sa Ginuo,” sulat ni apostol Pablo. “Sa liwat magasiling ako, Magkasadya kamo!” (Filip. 4:4) Ang pribilehiyo nga magpaambit sing maayong balita kag magbulig sa tulad karnero nga mga tawo agod simbahon si Jehova isa ka tuburan sang daku nga kalipay. (Luc. 10:17; Binu. 15:3; 1 Tes. 2:19) Apang, ano ang aton himuon kon indi kita malipayon kon kaisa sa aton ministeryo?
2. Paano ang pagsentro sang igtalupangod sa ginhalinan sang aton asaynment makaamot sa aton kalipay?
2 Ordenado Sang Dios nga Hilikuton: Dumduma nga ang aton asaynment nga magbantala naghalin kay Jehova. Huo, daku gid naton nga kadungganan nga mangin “mga masigkamanugpangabudlay sang Dios” sa pagbantala sing mensahe sang Ginharian kag paghimo sing mga disipulo! (1 Cor. 3:9) Kaupod naton si Cristo Jesus sa sining indi na gid masulit nga hilikuton. (Mat. 28:18-20) Ang mga anghel nadalahig man sing aktibo kag nagapangabudlay kaupod naton sa daku nga pagpangani sa espirituwal nga nagakatabo karon. (Binu. 8:26; Bug. 14:6) Ang Kasulatan, upod sa mga eksperiensia sang katawhan sang Dios, naghatag sing indi mapanghiwala nga pamatuod nga ginasakdag ni Jehova ini nga hilikuton. Busa, kon nagabantala kita, ginahimo naton ini “subong pinadala sang Dios, sa panan-aw sang Dios, upod ni Cristo.” (2 Cor. 2:17) Makalilipay gid ini!
3. Ano ang papel sang pangamuyo agod mahuptan naton ang aton kalipay sa pag-alagad sa Dios?
3 Ang pangamuyo importante agod mahuptan naton ang aton kalipay sa pag-alagad sa Dios. (Gal. 5:22) Bangod mahimo lamang naton ang hilikuton sang Dios paagi sa iya kusog, kinahanglan magpakitluoy kita para sa iya espiritu, nga ginahatag niya sing bugana sa mga nagapangayo sa iya. (Luc. 11:13; 2 Cor. 4:1, 7; Efe. 6:18-20) Ang pagpangamuyo tuhoy sa aton ministeryo magabulig sa aton nga mahuptan ang husto nga pagtamod kon makaatubang kita sing negatibo nga mga reaksion. Magabulig ini sa aton nga makapadayon sa pagbantala sing masidla kag malipayon.—Binu. 4:29-31; 5:40-42; 13:50-52.
4. Paano ang maayo nga paghanda nagabulig agod magdugang ang aton kalipay sa pagbantala, kag ano ang pila ka praktikal nga mga paagi nga makahanda kita?
4 Maghanda Sing Maayo: Ang isa ka praktikal nga paagi agod madugangan ang aton kalipay kon nagapakigbahin sa ministeryo amo nga nagahanda kita sing maayo. (1 Ped. 3:15) Ini nga paghanda wala nagakinahanglan sing madamo nga tion. Pila lamang ka minuto ang mahinguyang sa pagrepaso sang ginpanugda nga mga presentasyon para sa bag-o nga mga magasin ukon sang isa ka presentasyon nga nagakabagay sa literatura nga ginaplano mo nga itanyag. Para sa nagakaigo nga introduksion, sarang mo matan-aw ang Reasoning nga libro ukon ang nagliligad nga mga isyu sang Ang Aton Ministeryo sa Ginharian. Ang pila ka manugbantala sang Ginharian nakasapo nga mabuligon kon isulat ang isa ka malip-ot nga presentasyon sa magamay nga papel. Sa pulupanag-on, ila ginatan-aw ini agod madumduman nila liwat. Nagabulig ini agod indi sila pagkulbaan kag nagahatag ini sing kompiansa sa pagbantala sing masidla.
5. Paano ang kalipay nagadala sing benepisyo sa aton kag sa iban?
5 Ang kalipay nagadala sing madamo nga mga benepisyo. Ang malipayon nga panimuot nagapadugang sang ganyat sang aton mensahe. Ang kalipay nagapalig-on sa aton nga makabatas. (Neh. 8:10; Heb. 12:2) Labaw sa tanan, ang malipayon naton nga pag-alagad nagahimaya kay Jehova. Busa, ‘alagaron naton si Jehova nga may kasadya.’—Sal. 100:2.