Isa ka Pinasahi nga Pagpalig-unanay
1 Ginatilawan ang pagtuo sang katawhan ni Jehova kada adlaw. Nakahibalo nga malip-ot na lang ang iya tion, ginalunsar sang Yawa ang iya katapusan nga pagsalakay agod bungkagon ang aton integridad kay Jehova. (Bug. 12:12) Importante gid nga ‘magpadayon kita sa pagtigayon sing kusog sa Ginuo kag sa gahom sang iya kusog’ agod nga ‘mabatuan naton ang malaut nga adlaw kag, sa tapos naton mahimo sing bug-os ang tanan nga butang, makatindog kita sing malig-on.’—Efe. 6:10, 13.
2 Isa ka aman halin kay Jehova ang pagtilipon upod sa mga masigkatumuluo kag makabulig ini sa aton nga makatigayon sing kusog. Gin-apresyar gid ini ni apostol Pablo. Luyag gid niya makaupod pirme ang iya Cristianong mga kauturan agod nga “mapalig-on sila tanan” kag “mangin malig-on.” (Roma 1:11, 12, Rbi8, ftn.) Agod mapalig-on kita sa paghimo sang kabubut-on sang Dios, ang Nagadumala nga Hubon mahigugmaon nga naghimo sing kahimusan agod makabenepisyo kita sa pagpalig-unanay sa nagapakari nga “Diosnon nga Pagkamatinumanon” Distrito nga Kombension.
3 Magtambong Agod Makabenepisyo: Tulumuron naton nga makatambong sing tatlo ka adlaw. ‘Makabenepisyo kita’ kon mag-abot kita antes sang nagabukas nga ambahanon kag magpabilin tubtob sa aton tinagipusuon nga “Amen” sa nagatakop nga pangamuyo. (Isa. 48:17, 18) Madamo ang dapat mag-iskedyul sing maayo kag abanse sa ila trabaho agod makatambong sa bug-os nga tatlo ka adlaw. Matuod, mahimo nga mabudlay mangayo sing bakasyon sa imo amo sa sina nga tion, apang makasalig kita nga buligan kita ni Jehova sa paghimo sang iya kabubut-on. (1 Juan 5:14, 15) Kon wala pa naton mahimo ini, karon na ang tion nga maghimo sing pat-od nga mga kahimusan sa transportasyon kag dalayunan, indi kay magpasimpalad lang. Makasalig gid kita nga pakamaayuhon ni Jehova ang aton panikasog nga makatambong sa bug-os nga tatlo ka adlaw.—Hulu. 10:22.
4 Paabuta ang Pagpalig-on: May isa bala ka distrito nga kombension nga sang natapos ini nakasiling ka: “Amo gid ini ang pinakamaayo sa tanan!” Ngaa ayhan subong sina ang imo ginbatyag? Ini bangod subong di-himpit nga mga tawo mahimo nga amat-amat kita nga malapyo, kag nagakinahanglan sing espirituwal nga pagpalig-on. (Isa. 40:30) Nagsiling ang isa ka utod nga babayi: “Ginapaluya ako sining sistema, kag ang kombension nagabulig sa akon nga mapokus liwat sa akon espirituwal nga tulumuron, nagapabakod gid ini sa akon sa espirituwal. Daw kaangay ini nga ang pagpalig-on nag-abot sa tion nga kinahanglan ko gid.” Mahimo nga amo man sini ang imo ginabatyag.
5 Makatigayon kita sing pagpalig-on indi lamang sa pamulongpulong kag mga interbyu kundi paagi man sa iban pa nga bahin sang aton kombension. Nagsiling ang isa ka utod nga lalaki: “Naapresyar ko gid ang maathag, praktikal nga aplikasyon sa mga prinsipio sa Biblia. Sa pagkamatuod, ang drama importante gid agod mapakita kon paano kita makabenepisyo sa nagligad nga mga halimbawa, maayo man ini ukon malain. Ang ginapagua nga mga publikasyon amo pirme ang ginapaabot ko, kag nalipay ako sa pagbasa sini.”
6 Ang mga kombension importante gid nga aman ni Jehova sa sining “makahalanguyos nga mga tion nga mabudlay pakigbagayan.” (2 Tim. 3:1) Ginabuligan kita sini nga pamatian ang inspirado nga laygay: “Magpabilin kamo nga nagamata, magtindog kamo sing malig-on sa pagtuo, magpakalalaki kamo, magpakabakod kamo.” (1 Cor. 16:13) Busa, tambungan gid naton ang tanan nga sesyon kag magpalig-unanay sa aton “Diosnon nga Pagkamatinumanon” Distrito nga Kombension!
[Kahon sa pahina 3]
Plano Agod Makatambong sa Bug-os nga Tatlo ka Adlaw
■ Mangabay sing bakasyon sa trabaho.
■ Magpareserba sing dalayunan sa duog sang kombension, kon kinahanglanon.
■ Maghimos sing transportasyon pakadto sa kombension.