Mangin Kontento sa Kon Ano ang Yara sa Imo
1 Ang Kasulatan nagalaygay sa aton nga dapat kita mag-aman sing materyal sa aton panimalay, apang indi ini dapat mangin pangunang tulumuron sa kabuhi. Dapat gid pirme unahon ang espirituwal nga mga butang. (Mat. 6:33; 1 Tim. 5:8) Ang nagakaigo nga pagbalanse sa sini isa ka hangkat sa sining “makahalanguyos nga mga tion nga mabudlay pakigbagayan.” (2 Tim. 3:1) Ano ang magabulig sa aton sa pagbalanse?
2 Sunda ang Pagtamod sang Biblia: Ang Pulong sang Dios nagapaandam sa aton nga ang paghingamo sing manggad makadul-ong sa espirituwal nga kalaglagan. (Manugw. 5:10; Mat. 13:22; 1 Tim. 6:9, 10) Sa sining ital-ital nga panahon, malaglagon gid para kay bisan sin-o sa aton nga mangin masako katama sa sekular nga trabaho ukon magkabalaka sa pinansial nga ang espirituwal nga mga hilikuton—mga miting, pagtuon, kag pag-alagad—mangin ikaduha na lamang sa aton kabuhi. (Luc. 21:34-36) Sa kabaliskaran, ang Biblia nagalaygay: “Kon may pagkaon kag panapton, mangin kontento na kita sa sining mga butang.”—1 Tim. 6:7, 8.
3 Indi ini buot silingon nga ang mga Cristiano dapat magkabuhi sing hungod sa kaimulon. Apang ining laygay nagabulig sa aton nga kilalahon kon ano gid bala ang aton materyal nga mga kinahanglanon—pagkaon, panapton, kag puluy-an nga nagakaigo sa duog nga ginapuy-an naton. Kon may yara na kita sing mga kinahanglanon sang kabuhi, indi na kita dapat nga manikasog sing walay untat sa pagtigayon sing mas madamo kag mas maayo pa nga mga butang. Kon may ginaplano nga baklon ukon magbaton sing dugang pa nga trabaho, pamangkuton naton anay ang aton kaugalingon, ‘Kinahanglanon gid bala ini?’ Ang paghimo sini magabulig sa aton sa pagtuman sa inspirado nga laygay: “Likawi ninyo ang gugma sa kuwarta, samtang kontento kamo sa mga butang karon.”—Heb. 13:5.
4 Kon magsalig kita kay Jehova, sakdagon niya kita. (Hulu. 3:5, 6) Bisan pa nagapangabudlay kita sing lakas sa pagtigayon sing mga kinahanglanon sa matag-adlaw, wala naton ginasentro ang aton kabuhi sa sini nga mga butang. May yara man kita diutay ukon madamo, nagasandig kita kay Jehova sa pagpaayaw sa aton mga kinahanglanon. (Filip. 4:11-13) Subong resulta, may diosnon kita nga pagkakontento upod ang madamo pa nga mga pagpakamaayo.
5 Iluga ang Pagtuo sang Iban: Ang isa ka nagasolo nga ginikanan nga nagapadaku sa iya anak nga babayi sa dalanon sang kamatuoran ang amat-amat nga nagpasimple sang iya kabuhi. Bisan pa masulhay ang iya pagkabuhi sa iya anay puluy-an, nagsaylo sia sa mas magamay nga balay kag sang ulihi sa isa ka apartment. Sa amo nabuhinan niya ang mga oras sang iya sekular nga trabaho agod makahinguyang sia sing kapin nga tion sa ministeryo. Sang nagdaku na ang iya bata kag namana, nagretiro sing temprano ang iloy, bisan pa nagakahulugan ini sang pagbuhin sang iya kuluhaon. Ang aton utod nga babayi yara na karon sa ikapito nga tuig subong isa ka regular payunir kag wala gid naghinulsol sa mga materyal nga pagsakripisyo nga ginhimo niya sa pag-una sang mga intereses sang Ginharian sa iya kabuhi.
6 Ang isa ka gulang kag ang iya asawa nagpayunir sa madamo nga tinuig samtang nagapadaku sa tatlo ka kabataan. Subong isa ka pamilya, natun-an nila kon paano mangin kontento sa pagtigayon sang ila mga kinahanglanon sa baylo nga paayawan ang ila mga luyag. Nagkomento ang utod nga lalaki: “Ginpasimple pa gid namon ang amon pagkabuhi. Bisan pa may kabudlayan kon kaisa, pirme gid ginaaman ni Jehova ang amon kinahanglanon. . . . Kon makita ko nga ginauna sang akon pamilya ang espirituwal nga mga intereses, nagabatyag ako nga husto gid ang ginahimo namon, kag nagbatyag ako nga may hinimuan.” Ang iya asawa nagdugang: “Kon makita ko [ang akon bana] nga masako sa espirituwal nga mga butang, nagbatyag ako sing daku nga nasulod nga pagkakontento.” Malipayon man ang kabataan sa desisyon sang ila mga ginikanan nga mag-alagad sing bug-os tion.
7 Para sa mga nagpili sang isa ka kurso sang diosnon nga debosyon sa baylo sang paghingamo sing materyal nga mga butang, ang Biblia nagsaad sing bugana nga mga pagpakamaayo karon kag sa kabuhi sa palaabuton.—1 Tim. 4:8.