Mga Ulo sang Pamilya​—⁠Hupti ang Isa ka Maayo nga Rutina sa Espirituwal

¹ Bisan pa nga nagakabuhi sa tunga sang idolatriya kag kagarukan sang Babilonia sa sulod sang mga dekada, nakilal-an si Daniel nga nagaalagad kay Jehova “sing padayon.” (Dan. 6:​16, 20) Paano niya nahuptan ang iya espirituwalidad? Ginapakita sang rekord sang Biblia nga may organisado sia nga rutina sa iya mga hilikuton tuhoy sa matuod nga pagsimba. Halimbawa, batasan na niya nga mangamuyo sing tatlo ka beses sa isa ka adlaw sa iya hulot sa atop. (Dan. 6:10) Wala sing duhaduha nga may rutina man sia sa iban nga mga hilikuton sa espirituwal, subong sang pagbasa sa Kasuguan. Sa amo, sang nakaatubang sang pagtilaw nga nagbutang sa katalagman sang iya kabuhi, wala mationg si Daniel sa iya debosyon kay Jehova, kag naluwas sia sing milagruso.​​—⁠Dan. 6:​4-​22.

² Sing kaanggid karon, dapat panikasugan naton nga “magpabilin nga nagamata nga may bug-os nga pagkamapinadayunon.” (Efe. 6:18) Ang kalibutan nga aton ginapuy-an “yara sa gahom sang isa nga malauton.” (1 Juan 5:19) Ang pagpamatok ukon mga pagtilaw sarang mag-utwas sing hinali kag tilawan ang aton pagtuo. Sa dakung kapipit-an, mangin sentro sang bug-os nga pagsalakay ni Gog sang Magog ang mga alagad sang Dios, diin daw wala kita sing mapalagyuhan. Nagakinahanglan ini sing bug-os nga pagsalig kay Jehova.​—⁠Ezeq. 38:14-​16.

³ “Ang isa ka importante nga butang amo ang tayuyon nga pagbasa, pagtuon, kag paghinun-anon sang pamilya sa Biblia.” Amo sini ang ginsiling sang introduksion sa drama sang 1998 distrito nga kombension nga gintig-uluhan “Mga Pamilya​—⁠Ugalia ang Adlaw-adlaw nga Pagbasa sa Biblia!” Ini nagpadayon: “Kon sundon sang mga pamilya ini nga programa sing regular kag sa paagi nga mangin buhi ang Biblia, ining nasentro sa Biblia nga rutina may daku gid nga epekto sa pamilya. Nagadugang ini sang aton ihibalo. Ginapalig-on sini ang aton pagtuo. Kag nagahatag ini sa aton sing mga huwaran​—⁠matutom gid nga mga lalaki kag babayi sang dumaan nga mga tion⁠​—⁠nga makapapagsik sa aton kag makapahulag sa aton nga sakdagon ang kamatuoran.” Samtang ginabinagbinag naton ang pila ka bahin sang isa ka maayo nga rutina sa espirituwal, dapat mangita sing isa ukon duha ka paagi ang mga ulo sang pamilya agod mapauswag ang espirituwal nga programa sang ila pamilya.

⁴ Binagbinaga ang Pulong sang Dios Adlaw-adlaw: “Kon ang Ginharian sang Dios nagagahom nga wala sing nagapamatok kag ang iya kabubut-on himuon sa duta kon paano sa langit, wala na sing mabangis nga mga tawo​—⁠wala, bisan sing mga sapat— nga ‘magahimo sing bisan ano nga halit ukon makatuga sing bisan ano nga kagulub-an.’ (Isa. 11:⁠9; Mat. 6:​9, 10)” Ining mga pinamulong nagguwa sa Pag-usisa sa Kasulatan sa Adlaw-adlaw​—⁠2001 sa komento sa teksto sang Septiembre 11. Daw ano ka makapalig-on ini nga pahanumdom! Subong ulo sang pamilya, batasan mo na bala nga binagbinagon ang teksto sa Biblia kag ang mga komento upod sa imo pamilya? Mapuslanon gid ini. Kon indi praktikal nga magtipon kon aga, sarang ninyo ini mahimo sa gab-i. Ang isa ka amay nagsiling: “Ang panihapon amo ang nagakaigo nga tion para sa amon nga hambalan ang matag-adlaw nga teksto sa Biblia.”

⁵ Kon may maayo na kamo nga rutina sa paghinun-anon sang matag-adlaw nga teksto subong isa ka pamilya, dapat kamo hatagan sing komendasyon. Ayhan makabenepisyo pa gid kamo kon ilakip man ninyo basa ang isa ka bahin sang Biblia. Ugali sang pila nga basahon ang bug-os nga kapitulo diin ginkuha ang teksto sina nga adlaw. Ginapasunod sang iban ang pagbasa tubtob matapos ang ginpili nga tulun-an sa Biblia. Ang adlaw-adlaw nga pagbasa sa Biblia makabulig sa imo pamilya nga mapalambo ang mapuslanon nga kahadlok nga indi mapahamut-an si Jehova kag makapatudok pa gid sang ila handum nga himuon ang iya kabubut-on.​—⁠Deut. 17:18-​20.

⁶ Ang programa sang imo pamilya sa pagbasa sa Biblia kag pagbinagbinag sa teksto kada adlaw labi pa gid nga mapuslanon kon maghinguyang ka sing pila ka minuto sa paghinun-anon sang praktikal nga importansia sang impormasyon. Ang libro nga Eskwelahan Para sa Ministeryo, sa pahina 60, nagapanugda: “Mahimo kamo magpili sing pila ka bersikulo gikan sa gin-iskedyul para sa semana nga pagbasa sa Biblia, hinun-anunan ang kahulugan sini, kag nian mamangkot sing subong sini: ‘Paano ini nagahatag sing panuytoy sa aton? Paano naton magamit ini nga mga bersikulo sa ministeryo? Ano ang ginapahayag sini tuhoy kay Jehova kag sa iya paagi sa paghimo sing mga butang, kag paano ini nagapalambo sang aton apresasyon sa iya?’” Ining paghambalanay sa espirituwal makabulig sa bug-os mo nga pamilya nga ‘padayon nga hangpon kon ano ang kabubut-on ni Jehova.’​—⁠Efe. 5:⁠17.

⁷ Pagtinuon sang Pamilya: Ang pagdumala sing pagtinuon sang pamilya kada semana isa ka maayo nga paagi agod ipakita sang mga ulo sang pamilya sa ila kabataan nga dapat unahon ang espirituwal nga mga butang. Ang isa ka lamharon nga lalaki nagsiling: “Kon kaisa kapoy gid si Tatay sa trabaho nga daw matulog na gid sia, apang ginahiwat gihapon ang pagtuon, kag nakabulig ini sa amon nga mahangpan ang pagkaserioso sini.” Makabulig man ang kabataan agod magmadinalag-on ang kahimusan. Isa ka pamilya nga may siam ka kabataan ang nagabugtaw sing alas singko kada aga para sa pagtinuon sang pamilya kay wala na sing iban nga tion para sa sini.

⁸ Agod mangin epektibo ang pagtinuon sang pamilya, dapat ang ulo sang pamilya ‘maghatag sing dalayon nga igtalupangod sa iya panudlo.’ (1 Tim. 4:16) Ang libro nga Eskwelahan Para sa Ministeryo, pahina 32, nagsiling: “Masiling gid nga ang epektibo nga pagtinuon sang pamilya nagasugod paagi sa pagtuon mismo sa imo pamilya. Kamusta ang espirituwal nga pag-uswag sang mga katapo sang imo pamilya? . . . Kon yara kamo sang imo kabataan sa ministeryo sa latagon, mahapos bala para sa ila nga ipakilala ang ila kaugalingon subong mga Saksi ni Jehova sa ila mga katubotubo? Naluyagan bala nila ang inyo programa sa pagbasa kag pagtinuon sang pamilya sa Biblia? Ginahimo gid bala nila nga dalanon sang ila kabuhi ang dalanon ni Jehova? Ang pagpanilag sing maayo magapakita kon ano ang kinahanglan mo himuon subong ulo sang pamilya agod matukod kag mapalig-on ang espirituwal nga mga kinaiya sa tagsa ka katapo sang pamilya.”

⁹ Mga Miting sa Kongregasyon: Ang paghanda kag pagtambong sa mga miting sa kongregasyon dapat mangin importante nga bahin sang imo rutina kada semana. (Heb. 10:​24, 25) Kon kaisa, sarang kamo makahanda subong isa ka pamilya para sa mga miting. Sa baylo nga maghulat tubtob subol na sa tion, sarang bala kamo makahanda sing abanse? Ang organisado nga rutina tuhoy sa sini magapauswag sang kalidad sang inyo paghanda kag sang mga benepisyo nga inyo matigayon sa mga miting.​—⁠Hulu. 21:5.

¹⁰ Ang kalidad kag pagkamapinadayunon amo ang palatandaan sang epektibo nga rutina sa espirituwal. Ano abi kon ang mga sirkumstansia magapabudlay sa imo nga ihanda ang tanan nga miting? Ang libro nga Eskwelahan Para sa Ministeryo, pahina 31, nagapanugda: “Likawi ang mga siod sang padali nga mga pagtuon sa materyal agod matapos lamang ini ukon, malain pa, sang indi pagtuon sa bisan ano man sini bangod indi mo na ini maarapalan. Sa baylo, pat-ura kon daw ano kadamo ang imo matun-an, kag himua ini sing maayo. Himua ini kada semana. Sa ulihi, tinguhai nga pasangkaron ini sa paglakip sa iban nga mga miting.”

¹¹ Kon temprano nga mag-abot ang mga pamilya sa mga miting, mangin maayo ang ila panghunahuna sa pagdayaw kay Jehova kag makabenepisyo gikan sa mga instruksion nga ginahatag niya. Amo bala sini ang batasan sang imo pamilya? Nagakinahanglan ini sing maayo nga pagplano kag kooperasyon sang tagsatagsa sa panimalay. Kon nakita mo nga pirme lang nagadali ang imo pamilya ukon ginahul-an sa mga miting kon gab-i, makahimo bala kamo sing mga pagbag-o sa inyo rutina? May mga butang bala nga dapat atipanon sing abanse? Kon ang isa ka katapo sang pamilya madamo sing hilikuton, makabulig bala ang iban? Mabuhinan bala ang kahuol kon mas temprano sing pila ka minuto ang pagkadto sa miting? Ang maayo nga pagplano makaamot sa paghidait sang pamilya kag sang kongregasyon.​—⁠1 Cor. 14:​33, 40.

¹² Pag-alagad sa Latagon: Ang pagtalana sing tion para sa ministeryo isa pa ka bahin sang maayo nga rutina sa espirituwal. Ang pamatan-on nga si Jayson naghinumdom: “Sa akon pamilya, ang Sabado sang aga amo pirme ang ginahinguyang sa pag-alagad sa latagon. Maayo ini sa akon bangod samtang pirme ako nagaguwa sa ministeryo, mas makita ko pa gid ang kaayuhan sini kag labi nga nalipay ako sa sini.” Madamo sang mga nagdaku sa mga panimalay sang Saksi ang nagsiling man nga ang pagtalana sing tion para sa ministeryo kada semana nakabulig sa ila nga mag-uswag subong Cristianong mga ministro.

¹³ Ang organisado nga rutina makabulig man agod mangin makalilipay kag mabungahon ang mga tinion nga ginahinguyang sang imo pamilya sa pag-alagad sa latagon. Paano ini himuon? Ang Hulyo 1, 1999, nga Lalantawan, pahina 21, naghatag sining masunod nga panugda: “Ginagamit mo bala kon kaisa ang tion sa inyo pagtuon sang pamilya agod buligan ang mga katapo sang inyo panimalay sa paghanda para sa pag-alagad sa latagon sa sina nga semana? Ang paghimo sini makabulig sing daku. (2 Timoteo 2:15) Makabulig ini agod may yara katuyuan kag bunga ang ila pag-alagad. Kon kaisa, mahimo ninyo gamiton ang bug-os nga sesyon sang pagtuon para sa sina nga paghanda. Sing masami, mahimo ninyo hambalan ang mga bahin sang ministeryo sa latagon sa mas malip-ot nga mga paghambalanay pagkatapos sang pagtuon sang pamilya ukon sa iban pa nga tion sa sulod sang isa ka semana.” Natilawan na bala ini sang imo pamilya?

¹⁴ Magpadayon sa Pag-uswag: Pasad sa sining pagbinagbinag, nakita mo bala kon diin nga bahin nagahimo sing maayo ang imo pamilya? Hatagi sila sing komendasyon, kag panikasugi nga mag-uswag pa sa sining mga bahin. Kon nakita mo ang pila ka bahin nga nagakinahanglan sing pag-uswag, magpili anay sing isa ukon duha ka bahin agod pangabudlayan. Kon mangin bahin na ini sang imo espirituwal nga rutina, isunod naman ang isa ukon duha pa gid. Mangin positibo kag rasonable. (Fil. 4:​4, 5) Ang pagpahamtang sing isa ka maayo nga rutina sa espirituwal para sa imo panimalay nagakinahanglan gid sing daku nga panikasog, apang takus ini, kay si Jehova nagapasalig sa aton: “Sa isa nga nagapabilin sa napahamtang nga dalan, ipakita ko sa iya ang pagluwas sang Dios.”​—⁠Sal. 50:23.