Pamangkot

◼ Ano ang mga bentaha sa pagtambong sa kongregasyon nga ang teritoryo nagasakop sang aton ginapuy-an?

Paagi sa kahimusan sang kongregasyon, nakabaton kita sing pagpalig-on nga ‘nagapukaw sa aton sa gugma kag maayong mga buhat.’ (Heb. 10:​24, 25) Paagi sa kongregasyon natun-an naton ang kamatuoran kag nasangkapan kita nga matuman ang aton mga asaynment nga maghimo sing mga disipulo. (Mat. 28:​19, 20) Ginapalig-on man kita nga mabatas ang mga pagtilaw kag ginaamanan sing mahigugmaon nga mga manugtatap agod mabuligan kita nga malandas ang nagadugang nga mga pag-ipit kag mga kahuol. Sing maathag, importante ang kongregasyon sa aton kaluwasan sa espirituwal. Apang, may mga bentaha bala sa pagtambong sa kongregasyon nga ang teritoryo nagasakop sang aton ginapuy-an?

Nanuhaytuhay ang mga kahimtangan sang indibiduwal, kag ang mga kahimtangan subong sang sekular nga trabaho, di-matinuuhon nga tiayon, kag transportasyon mahimo may epekto kon diin nga kongregasyon kita matambong. Apang, may espirituwal kag iban pa nga mga bentaha kon ang isa makig-angot sa kongregasyon nga ang teritoryo nagasakop sang iya ginapuy-an. Madali dayon mapakig-angutan sang mga gulang ang tanan nga mga manugbantala kon may mga emerhensia. Ang nagligad nga mga Pamangkot nagpadaku sang iban pa nga mga bentaha.​​—⁠Hunyo 1991, Mayo 1976, kag Marso 1967.

Sa masami, mas kombeniente kon malapit lang ang mga miting nga aton ginatambungan, sa amo makaabot kita sing mas temprano agod makapakighambal sa iban, maatipan naton ang kinahanglanon nga mga butang, kag makaambit kita sa nagabukas nga ambahanon kag pangamuyo. Kon ang bag-uhan nga mga interesado nagapuyo malapit sa aton, mas madali naton sila makadtuan, madumalahan sing mga pagtuon sa Biblia, kag mapatambong sa mga miting nga kombeniente gid sa ila.

Nagasalig kami nga binagbinagon ini sang mga ulo sang pamilya sing mapinangamuyuon, nga ginatimbangtimbang ang tanan nga butang nga nadalahig agod mapat-od kon ano ang labing maayo para sa espirituwal kag pisikal nga kaayuhan sang ila pamilya.​​—⁠1 Tim. 5:8.