Ibantala ang Mensahe sang Ginharian
1 “Dapat ko ibantala ang maayong balita sang ginharian sang Dios, kay sa sining katuyuan ginpadala ako.” (Luc. 4:43) Paagi sa sadtong mga pinamulong, ginpakilala ni Jesus ang tema sang iya ministeryo—ang Ginharian sang Dios. Ang mensahe nga aton ginabantala karon nasentro man sa Ginharian, subong sang gintagna sa Mateo 24:14: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” Ano nga mga kamatuoran tuhoy sa Ginharian sang Dios ang dapat mabatian sang mga tawo?
2 Ang Ginharian sang Dios nagagahom na karon gikan sa mga langit kag magabulos sa dili madugay sa tanan nga pagginahom sang mga tawo. Natabog na ang Yawa gikan sa langit, kag ang malaut nga sistema sang mga butang karon yara na sa katapusan nga mga adlaw sini. (Bug. 12:10, 12) Pagalaglagon sing bug-os ang malaut nga daan nga sistema ni Satanas, apang ang Ginharian sang Dios indi malingkang. Magapabilin ini sing dayon.—Dan. 2:44; Heb. 12:28.
3 Ang Ginharian magapaayaw sang maayong mga handum sang tanan nga matinumanon nga mga tawo. Dulaon sini ang pag-antos nga tuga sang inaway, krimen, pagpigos, kag kaimulon. (Sal. 46:8, 9; 72:12-14) Mangin bugana ang pagkaon para sa tanan. (Sal. 72:16; Isa. 25:6) Mangin mga butang na lamang sang nagligad ang mga balatian kag mga kasablagan. (Isa. 33:24; 35:5, 6) Samtang nagapadulong sa kahimpitan ang mga tawo, ang duta himuon nga paraiso, kag ang mga tawo magapuyo sing tingob nga may paghilisugot.—Isa. 11:6-9.
4 Ginapakita naton nga luyag naton mangin mga sakop sang Ginharian sang Dios paagi sa aton pagkabuhi karon. Ang mensahe sang Ginharian dapat mag-impluwensia sang bug-os naton nga dalanon sang pagkabuhi, lakip ang aton mga tulumuron kag mga prioridad. Halimbawa, bisan pa may obligasyon kita nga amanan ang aton panimalay, indi naton pagtugutan nga lumsan sang mga kabalaka sa materyal ang mga intereses sang Ginharian. (Mat. 13:22; 1 Tim. 5:8) Sa baylo, dapat pamatian naton ang laygay ni Jesus: “Padayon, nian, nga pangitaa anay ang ginharian kag ang iya pagkamatarong, kag ining tanan iban pa nga mga butang [mga kinahanglanon nga materyal sa kabuhi] idugang sa inyo.”—Mat. 6:33.
5 Hilingagawon gid nga dapat mabatian kag maghulag ang mga tawo sa mensahe sang Ginharian samtang may tion pa. Kabay nga buligan naton sila nga himuon ini paagi sa ‘pagbuyok sa ila may kaangtanan sa ginharian sang Dios.”—Binu. 19:8.