Dumduma ang Matutom nga mga Tigulang
1 Bisan pa balo kag tigulang na, ang 84-anyos nga si Ana “wala gid nagapalya sa templo.” Ang iya katutom nagpahulag kay Jehova nga hatagan sia sing pinasahi nga pagpakamaayo. (Luc. 2:36-38) Sa karon, madamo nga kauturan ang nagapakita sing espiritu kaangay ni Ana bisan pa nagaatubang sa makahalangkat nga mga sirkunstansia. Kon ining mga matutom nagaatubang sing mga problema sa panglawas ukon mga limitasyon bangod sang katigulangon, mahimo maluyahan sila sang buot kon kaisa. Binagbinagon naton ang pila ka praktikal nga paagi diin sarang naton sila mapalig-on kag mabuligan agod mahuptan nila ang isa ka maayo nga rutina sa espirituwal.
2 Mga Miting kag ang Ministeryo: Kon may mahigugmaon nga magtanyag sing transportasyon, madamo sang matutom nga mga tigulang ang mahapos nga makatambong sing regular sa Cristianong mga miting. Ginapalig-on sini sa espirituwal ining matutom kag madugay na nga mga alagad kag makabenepisyo man ang kongregasyon. Nagapakigbahin ka bala sa sining maayo nga buhat?—Heb. 13:16.
3 Ang pagpakigbahin sing regular sa ministeryo nagadala sing kalipay kag kaayawan sa matuod nga mga Cristiano. Apang ang paghimo sini mangin isa ka hangkat sa mga tigulang kag may mga sablag sa lawas. Posible bala nga ang isa sining mga pinalangga magaupod sa imo subong “masigkamanugpangabudlay” sa pila ka sahi sang pagpanaksi nga hilikuton? (Roma 16:3, 9, 21) Ayhan maagda mo sia nga makigbahin upod sa imo sa pagpanaksi sa telepono ukon mag-upod sa imo sa isa ka pagduaw liwat ukon isa ka pagtuon sa Biblia. Kon indi makahalin ang tigulang sa puluy-an, posible bala nga ang isa ka estudyante sa Biblia magakadto sa iya balay agod magtuon?
4 Pagtuon kag Pagpakig-upod: Sa pulupanag-on, ginaagda sang iban ang isa ka tigulang ukon may sablag sa lawas nga magtambong sa ila pagtinuon sang pamilya, nagahiwat pa gani sing pagtuon sa balay sang tigulang ukon may sablag sa lawas. Gindala sang isa ka iloy ang iya duha ka magamay nga kabataan sa balay sang isa ka tigulang nga utod nga babayi para sa ila pagtuon sa Ang Akon Libro Sang mga Sugilanon sa Biblia, kag ang tanan napalig-on bangod sang pagpakig-upod. Ginaapresyar man sining mga indibiduwal ang pag-agda sa ila nga magkaon upod sa iban ukon sa iban pa nga okasyon. Kon ang mga may sablag sa lawas tuman kaluya para sa malawig nga pagduaw, ayhan matawgan mo sila ukon maagyan sing makadali agod magbasa sa ila, mangamuyo upod sa ila, ukon magpaambit sing makapalig-on nga eksperiensia.—Roma 1:11, 12.
5 Ginapakabahandi ni Jehova ang matutom nga mga tigulang. (Heb. 6:10, 11) Mailog naton sia paagi sa pagpabutyag sang aton apresasyon sa ila kag sa pagbulig sa ila nga mahuptan ang isa ka maayo nga rutina sa espirituwal.