Isa ka Video nga Magahatag sing Kasanagan kag Magapahulag sa Imo!

Abril 1951 sadto. Linibo ka mga Saksi ni Jehova sa anay Unyon Sobyet​—⁠mga pamilya⁠​—⁠ang gindakop, ginpasakay sa mga bagon, kag gintapok sa Siberia. Ngaa determinado ang gamhanan nga panguluhan sang Sobyet nga dulaon sila? Paano nakalampuwas ang aton mga kauturan kag nagdamo pa gani walay sapayan sang padayon nga paghingabot sa sulod sang mga dekada? Masapwan mo ang mga sabat sa video nga Faithful Under Trials​​—⁠Jehovah’s Witnesses in the Soviet Union. Tan-awa ini, kag tuguti nga ang impormatibo nga mensahe sini magapahulag sa imo nga huptan ang imo katutom kay Jehova bisan ano man ang matabo!

Masabat mo bala ining mga pamangkot? (1) San-o una nga ginkilala sing opisyal ang mga Saksi ni Jehova sa Rusya? (2) Antes kag pagkatapos sang Bug-os Kalibutan nga Inaway II, paano nagdamo pa sing linibo ang mga pamilya sang mga Saksi sa Unyon Sobyet? (3) Paano ang ila mga pagpati supak gid sa pilosopiya ni Lenin? (4) Ano ang Operation North, kag ano ang ginlauman ni Stalin nga himuon paagi sa sini? (5) Ano ang kahulugan sang pagkatapok para sa mga Saksi, kag ano ang ginpahimo sa ila agod indi sila matapok? (6) Sa malawig nga pagbiyahe sakay sa tren pakadto sa Siberia, paano nagpalig-unanay ang mga kauturan nga nagpakibot sa mga nagdakop sa ila? (7) Anong mga kabudlayan ang ginbatas sang mga Saksi sa Siberia? (8) Anong espirituwal nga aman ang ginpakabahandi gid sang katawhan ni Jehova, kag ngaa? (9) Ngaa handa ang aton mga kauturan nga irisgo ang ila kabuhi agod lang mabaton ang ila mga literatura, kag paano sila nagmadinalag-on walay sapayan sang padayon nga panikasog sang mga awtoridad nga indi nila ini mabaton? (10) Paano ginpadayon ni Khrushchev ang pagsalakay sa katawhan sang Dios? (11) Paano gintinguhaan sang mga awtoridad nga gub-on ang pagtuo sang kabataan nga mga Saksi? (12) Ano ang maathag nga paghangop sang aton mga kauturan tuhoy sa rason kon ngaa ginahingabot sila? (2002 Yearbook, pahina 203-⁠4) (13) Paano nagbalandra ang bug-os nga paghingabot sa organisasyon sang Dios? (2002 Yearbook, pahina 220-⁠1) (14) Anong mga butang ang natabo nga daw damgo lamang anay para sa mga Saksi sa anay Unyon Sobyet? (15) Ano ang nagbulig sa aton mga kauturan nga mabatas ang mga pagtilaw sa ila, kag paano ang katapusan nga danyag sa video nagapakita sang pagkamaminatud-on sang Jeremias 1:⁠19? (16) Isaysay ang isa sa matuodtuod nga mga eksperiensia sang katutom sa idalom sang pagtilaw nga labi gid nga nagtandog kag nagpahulag sa imo.