Pagtipon sing Tingob Agod Dayawon si Jehova
1. Ano ang tema sang kombension, kag ngaa takus si Jehova nga dayawon naton?
1 Si Jehova labing gamhanan, indi matungkad sa kaalam, himpit sa hustisya, kag personipikasyon sang gugma. Subong Manunuga, Manughatag-Kabuhi, kag Soberano sa Bug-os nga Uniberso, sia lamang ang takus nga simbahon naton. (Sal. 36:9; Bug. 4:11; 15:3, 4) Sini nga tuig ang “Himayaa ang Dios” Distrito nga Kombension magapalig-on sang aton pamat-od nga dayawon sia subong ang lamang matuod nga Dios.—Sal. 86:8-10.
2, 3. Paano ang maayo nga pagplano magabulig sa aton nga makabenepisyo sing bug-os?
2 Kinahanglan ang Maayo nga Pagplano: Agod makabenepisyo kita sing bug-os gikan sa espirituwal nga piesta nga ginhanda ni Jehova, kinahanglan ang maayo nga pagplano. (Efe. 5:15, 16) Nakahimo ka na bala sing mga kahimusan para sa dalayunan, transportasyon, kag pagbakasyon gikan sa trabaho ukon eskwelahan? Indi pagpabuyanbuyani ini nga mga butang. Kon magpalantang ka sa pagpangayo sing bakasyon, basi mawasi mo ining makalilipay nga okasyon. Dapat naton tanan tambungan ang tagsa ka sesyon.
3 Himud-usi nga makaabot sing temprano sa duog sang kombension kada adlaw agod makapungko ka na antes sang nagabukas nga ambahanon. Magabulig man ini sa imo nga mapahamtang kag mahanda ang imo hunahuna sa pagbaton sa ginapresentar nga instruksion. Ang programa magasugod sa alas 8:30 sa aga sa Biernes kag Sabado, kag alas 9:00 sa aga sa Domingo. Palihug indi magtigana sing mga pulungkuan magluwas lamang sing para sa katapo sang imo pamilya ukon sa imo mga kaupod sa salakyan.
4. Ngaa ginapangabay nga magbalon kita sing palanyagahon sa kombension?
4 Ginapangabay nga ang tanan magbalon sing palanyagahon sa baylo nga magbiya sa duog sang kombension agod magbakal sing pagkaon. Ang imo kooperasyon sa sining kahimusan nagabulig agod mangin matawhay ang kahimtangan kag nagahatag sing kapin pa nga tion sa pagpakig-upod sa mga masigkatumuluo. (Sal. 133:1-3) Dumduma nga ang mga suludlan nga botelya kag ang makahulubog nga mga ilimnon wala ginatugot sa mga pasilidad sang kombension.
5. Paano naton mahanda ang aton tagipusuon para sa kombension?
5 Mamati kag Magtuon: Mapinangamuyuon nga ginhanda ni Esdras ang iya tagipusuon sa pagbaton sa pulong sang Dios. (Esd. 7:10) Ginpahamtang niya ang iya tagipusuon sa mga panudlo ni Jehova. (Hulu. 2:2) Sarang naton mahanda ang aton tagipusuon para sa kombension bisan antes kita magbiya sa puluy-an paagi sa pagpamalandong sa tema sang kombension kag hambalan ini upod sa aton pamilya.
6. Ano ang makabulig sa aton nga mahuptan ang aton igtalupangod sa programa? (Tan-awa ang kahon.)
6 Sa isa ka daku nga awditoryum, may madamo nga talan-awon kag mga tunog nga sarang makaagaw sang aton atension. Ining mga tublag mahapos nga makaagaw sang aton igtalupangod sa humalambal. Kon matabo ini, madula ang malahalon nga impormasyon. Ang mga panugda nga masapwan sa kaupod nga kahon sarang makabulig sa aton nga mapauswag ang aton konsentrasyon.
7, 8. Paano kita makapakita sing konsiderasyon sa iban?
7 Ipakita ang Konsiderasyon sa Iban: Ang mga kamera kag mga camcorder sarang magamit samtang may programa, apang agod indi matublag ang iban, himua lamang ini sa imo pulungkuan. Ang mga cell phone kag mga pager indi dapat makatublag sa iban. Wala sing personal nga kagamitan ang iangot sa koryente ukon sa sound system sa duog sang kombension.
8 Ginapaabot gid naton ang pagtipon sing tingob sa pagdayaw kay Jehova! Kabay nga mangin determinado kita sa paghimaya sa iya paagi sa pagtambong sa tagsa ka sesyon, paagi sa pagpamati sing maukod, kag paagi sa pag-aplikar sang aton natun-an.—Deut. 31:12.
[Kahon sa pahina 3]
Pagpamati sa mga Kombension
▪ Hunahunaa ang tig-ulo sang mga pamulongpulong
▪ Tan-awa ang mga kasulatan
▪ Magkuha sing malip-ot nga mga nota
▪ Maghimo sing pinasahi nga nota sa mga punto nga iaplikar
▪ Repasuha ang imo natun-an