“Dayawon Naton sing Tingob ang Iya Ngalan”

1. Ano ang aton kahigayunan nga madayaw sing tingob ang ngalan sang Dios, kag ano ang mahimo naton karon bilang paghanda?

¹ “O pakadakua ninyo si Jehova upod sa akon, kag dayawon naton sing tingob ang iya ngalan,” amba sang salmista. (Sal. 34:3) Ang aton nagapakari nga “Maglakat Upod sa Dios” Distrito nga Kombension magahatag sa aton sing kahigayunan nga madayaw naton sing tingob ang ngalan ni Jehova upod sa aton mga kauturan sa madamo nga kongregasyon. May mga kahimusan na bala kamo sa dalayunan, transportasyon, kag bakasyon sa trabaho? Maalamon nga atipanon naton ini sing abanse.​—⁠Hulu. 21:5.

2. Ngaa mapuslanon ang pagplano nga mag-abot sing temprano sa duog sang kombension?

2 Pag-abot sa Duog Sang Kombension: Kon temprano kita magbiyahe, malikawan naton ang wala ginapaabot nga pagkaatrasar kag may tion kita nga mangita sing pulungkuan agod makapakigbahin sing bug-os tagipusuon sa nagabukas nga ambahanon kag pangamuyo. (Sal. 69:30) Pila ka minutos antes sang pagsugod sang sesyon, ang tsirman magapungko na sa plataporma samtang ginapatokar ang nagabukas nga musika tuhoy sa Ginharian. Tanan kita dapat nakapungko na sa sina nga tion agod makasugod ang programa sing solemne.​​—⁠1 Cor. 14:​33, 40.

3. Paano kita makapakita sing konsiderasyon sa iban kon nagapangita sing mga pulungkuan?

³ Ginalaygayan kita sang Pulong sang Dios nga ‘himuon naton ang tanan naton nga hilikuton nga may gugma.’ (1 Cor. 16:14) Kon mag-abot kita sa duog sang kombension, ang konsiderasyon sa iban magapugong sa aton nga magdalagan, magdalidali, mangtiklod, ukon mangwahig agod maunahan naton ang iban sa luyag naton nga pulungkuan. Mahimo lamang ireserba ang mga pulungkuan para sa mga kaupod mo nga nagabiyahe ukon sa mga kaupod mo sa balay.​​—⁠1 Cor. 13:⁠5; Fil. 2:4.

4. Ano ang mga kahimusan sa udto, kag paano ini mapuslanon?

⁴ Palihug magbalon sa baylo nga magbiya sa duog sang kombension agod magbakal sing palanyagahon. Magahatag ini sing kahigayunan sa tanan para sa makapalig-on nga pagpakig-upod kag mangin presente sa pagsugod sang sesyon sa hapon. Kon kinahanglan, sarang makagamit sing gamay nga talaguan sang pagkaon nga sarang mabutang sa idalom sang pulungkuan. Ang dalagku nga mga bulutangan, mga botelya, kag makahulubog nga mga ilimnon wala ginatugutan sa duog sang kombension.

5. Paano kita ‘magbuhat sing maayo’ sa mga tigulang kag may sablag?

⁵ Sa aton mga kombension, may pinasahi nga pulungkuan para sa mga tigulang ukon may sablag. Ginpahanumdom ni apostol Pablo ang mga kongregasyon sa Galacia nga ‘magbuhat sing maayo sa tanan, apang labi na gid sa mga may labot sa [ila] sa pagtuo.’ (Gal. 6:10) Ang mga tigulang ukon may sablag nga mga kauturan, nagasolo nga ginikanan, ukon yadtong sa bug-os tion nga pag-alagad mahimo nga indi magpabulig sa imo, apang mahimo nga may mga problema nga dapat nila landason agod makakadto sa kombension. Posible bala nga ‘magbuhat ikaw sing maayo’ sa ila kag magtanyag sing bulig?

6. Paano naton mahanda ang aton tagipusuon sa instruksion nga pagabatunon naton?

⁶ Isa ka Espirituwal nga Bangkete ang Nagahulat sa Aton: Si Hari Jehosapat ‘naghanda sang iya tagipusuon sa pagpangita sa matuod nga Dios.’ (2 Cron. 19:3) Paano naton mahanda ang aton tagipusuon antes sang kombension? Ang artikulo sa panghapin sa likod sang Nobiembre 8 nga isyu sang Magmata! may abanse nga impormasyon tuhoy sa espirituwal nga bangkete nga iaman. Ngaa indi maghinguyang sing tion sa pagbinagbinag sini nga artikulo, nagapalambo sang pagpaabot sa kon ano ang ginhanda ni Jehova para sa aton? Ang paghanda sang aton tagipusuon nagalakip man sa pagpangayo sing bulig kay Jehova agod mahangpan kag maaplikar naton ang instruksion nga aton mabaton.​​—⁠Sal. 25:​4, 5.

7. Ano ang aton handum, kag ngaa?

⁷ Handum gid naton nga matun-an pa ang Pulong sang Dios, nakahibalo nga paagi sa sini magatubo kita padulong sa kaluwasan. (1 Ped. 2:2) Busa, tambungan naton ang aton “Maglakat Upod sa Dios” Distrito nga Kombension kag ‘dayawon sing tingob ang ngalan ni Jehova.’​—⁠Sal. 34:3.

[Kahon sa pahina 3]

Mga Paagi sa Pagdayaw sa Ngalan Sang Dios

◼ Abanse nga pagplano

◼ Ipakita ang gugma sa iban

◼ Ihanda ang imo tagipusuon