Pamangkot

◼ Ano ang aton himuon nga pangandam kon nagapanaksi sa mga priso?

Indi magnubo sa walo ka milyon ang priso sa bug-os nga kalibutan, kag ang pila sa ila nagpakita sing interes sa maayong balita. (1 Tim. 2:4) Ang isa ka sanga nagabaton sing mga 1,400 ka sulat kada bulan halin sa mga priso kag sa mga katapo sang ila mga pamilya nga nagapangabay sing literatura ukon luyag duawon. Bisan pa ang interes sang madamo nga priso sinsero, ginapakita sang eksperiensia nga ang iban nagapakunokuno, kag nagatinguha nga gamiton ang katawhan sang Dios para sa makagod nga mga tinutuyo. Bangod sini, ang tanan dapat magsunod sa pila ka mga paandam tuhoy sa pagpanaksi sa mga priso.

Sa madamo nga kaso ginapanaksihan ang mga priso paagi sa sulat. Ginapanugda gid nga ang mga utod nga babayi indi magsulat sa mga priso nga lalaki, bisan pa nga ang tuyo amo ang pagbulig sa espirituwal. Ini nga responsabilidad dapat himuon lamang sang kalipikado nga mga utod nga lalaki. Ang kalipikado nga mga utod nga babayi sarang maasayn nga magsulat sa mga priso nga babayi nga nagpakita sing sinsero nga interes sa kamatuoran sang Biblia. Ang kuarta ukon mga dulot indi dapat pag-ipadala sa mga priso, bisan pa nga magpangabay sila.

Kon may priso nga magpakita sing interes, ang iya ngalan kag direksion dapat ihatag sa kongregasyon nga malapit sa prisuhan. Masami nga nahibaluan sang kalipikado nga mga kauturan sa amo nga duog kon ano ang himuon sa pila ka sitwasyon. Kon indi mahibaluan ang kongregasyon, ang impormasyon dapat ipadala sa sanga talatapan.

Wala ginadilian nga maghiwat sing mga miting ang gin-asayn nga mga utod nga lalaki sa mga priso agod madamo ang makatuon sing dungan. Apang, indi dapat paghiwaton sa prisuhan ang pinasahi nga mga okasyon diin hilway nga makig-upod ang mga priso sa mga manugbantala. Dugang pa, indi maalamon nga magkadto ang mga manugbantala sa prisuhan nga wala anay ini ginplano sing maayo kag makig-upod pirme sa mga priso.

Kabay nga mangin ‘maalam kita subong sang mga man-ug apang inosente subong sang mga salampati’ samtang ginapaambit naton ang maayong balita sa mga priso.​—Mat. 10:16.