“Ginbag-o Ninyo ang Akon Pagkilala sa mga Saksi ni Jehova”
AMO sina ang reaksion sang isa ka Polaco nga opisyal sang prisuhan sa isa ka artikulo nahanungod sa hilikuton sang mga Saksi ni Jehova, suno sa ginreport sa amon Oktubre 15, 1998 nga guwa. Ang artikulo, “Kon ang Tulad-Bato nga mga Tagipusuon Magpamati,” nagpamatuod sang kadalag-an sang mga Saksi ni Jehova sa pagbulig sa mga priso sa Wołów, Poland.
Antes ipaguwa sa publiko ang ginhinambitan sa ibabaw nga Lalantawan nga magasin, gin-organisar ang isa ka pinasahi nga miting agod ihatag ini sa mga priso sang Septiembre 13, 1998, sa bilangguan sang Wołów. Lakip sa mga gin-agda amo ang lokal nga mga Saksi, bawtismado kag iban nga interesado nga mga bilanggo, kag pila ka opisyal sang bilangguan. Ang masunod amo ang pila sang mga komento sang mga nagtambong.
Si Jerzy, isa sang mga Saksi ni Jehova nga nabawtismuhan sa prisuhan kapin sa lima ka tuig na ang nagligad, nagsiling: “Malipayon gid ako, kay mabasa ko karon kon daw ano ka daku nga panikasog ang ginhimo sang mga kauturan halin sa kaiping nga mga kongregasyon agod buligan kami.” Nagdugang sia: “Padayon ko nga ginapanikasugan nga mag-uswag, kag makita ko kon paano ako ginadihon ni Jehova.”
Ang isa pa ka bilanggo, si Zdzisław, nagsiling tuhoy sa hilikuton nga pagpanaksi sa prisuhan: “Sa karon, apat ka bilanggo ang nagahanda para sa bawtismo, kag ang bag-o nga mga interesado padayon nga nagatambong sa mga miting sa amon tilipunan. Ginpahulag gid kami sining artikulo para sa dugang nga hilikuton sa sini nga latagon.” Isa gid ka positibo nga panimuot, walay sapayan nga si Zdzisław magatener pa sing 19 ka tuig sa prisuhan!
Sa tapos mabasa ang artikulo tuhoy sa bilangguan sa Wołów, ang isa ka opisyal sang prisuhan nagsiling: “Ginpadunggan kami ilabi na. Wala gid ako maghunahuna nga makabaton ini nga bilangguan sing subong sini kaayo nga publisidad sa 130 ka lenguahe sa bug-os nga kalibutan. Naluyagan ko kamo, kag ginaapresyar ko ang inyo mga panikasog para sa mga bilanggo.” Ang isa pa ka opisyal nagdugang: “Ginbag-o ninyo ang akon pagkilala sa mga Saksi ni Jehova. Sang una, gintamod ko kamo nga mga panatiko sa relihion. Karon nakita ko nga mga tawo kamo nga may prinsipio.”
Ang direktor sang prisuhan sa Wołów, si Marek Gajos, nagyuhum kag nagsiling: “Sang primero abi namon diutay kaayo ang inyo mahimo. Abi namon isa lamang kamo ka relihion nga nagahandum sa pagbulig sa mga bilanggo paagi sa Biblia. Apang, bangod nakita namon ang mga resulta sang inyo una nga nahimo, namat-od kami nga magbulig sa inyo. Nagakadto kamo diri nga wala ginakapoy sa sulod sang siam ka tuig na, kag ginaapresyar ko gid ang inyo nahimo.”
Apang, paano ginbaton sang kalabanan nga mga priso sa Wołów ang artikulo? Daku gid ka tama ang interes sa tunga sang mga priso amo nga naubusan sing suplay sang magasin ang mga Saksi sa prisuhan. Nagpakita man sing interes ang mga opisyales sang prisuhan paagi sa pagpangabay sing 40 pa ka kopya para sa ila kaugalingon. Agod mahatag ang dugang nga kinahanglanon, ang lokal nga mga kongregasyon nagbulig kag naghatag sing 100 pa ka kopya para sa mga kauturan sa prisuhan. Sa amo man nga tion, nagdamo ang tumalambong sa prisuhan.
Si Piotr Choduń, isa ka opisyal sang prisuhan nga nagbulig sing maayo sa mga Saksi ni Jehova, nagsiling: “Namat-od kami nga ipasundayag ining artikulo sa tanan nga showcase sa amon bilangguan. Nagalaum kami nga mabasa sang tanan nga priso nga wala pa nagatuon sing Biblia sa inyo ang magasin.”
Ang maayo nga halimbawa sang mga Saksi kag ang ila determinado nga panikasog sa pagbantala padayon nga may maayo nga mga resulta. Dugang sa 15 ka bilanggo nga nag-uswag tubtob sa bawtismo, 2 ka opisyal sang prisuhan ang nagdedikar sang ila kabuhi kay Jehova, kag isa pa ka opisyal sang prisuhan ang nagpangabay sing pagtuon sa Biblia. Sa pagkamatuod, ang mga kauturan nga nagabantala sa prisuhan sa Wołów nagahatag sang tanan nga kadayawan kay Jehova nga Dios sa ila kadalag-an.—Ipaanggid ang 1 Corinto 3:6, 7.
[Laragway sa pahina 28]
Tatlo ka Saksi kag isa ka priso sa tion nga ginpresentar ang magasin sa lecture hall sang prisuhan