Pagbantala sa Nagabulubag-o nga Kalibutan
1 Madasig gid magbag-o ang mga butang! Sa isa lang ka gab-i, ang kinaugali nga kalamidad, krisis sa ekonomiya, kinagamo sa politika, ukon bantog nga trahedya mangin topiko na nga ginahambalan. Apang, subong man sini kadasig magbag-o ang igtalupangod sang mga tawo. (Binu. 17:21; 1 Cor. 7:31) Sa sining nagabulubag-o nga kalibutan, paano naton makuha ang igtalupangod sang mga tawo agod mapaambit naton sa ila ang mensahe sang Ginharian?
2 Hantupa ang mga Ginakabalak-an sang Iban: Ang isa ka paagi agod makuha naton ang igtalupangod sang mga tawo amo ang pagsambit sa mga hitabo karon. Sang nagapalig-on sa iya mga tagpalamati nga hunahunaon sing maayo ang ila tindog sa Dios, ginsambit ni Jesus sang isa ka okasyon ang bag-o lang nga trahedya nga ila ginahunahuna. (Luc. 13:1-5) Sing kaanggid, kon nagapresentar sang maayong balita, maayo kon sambiton naton ang bag-o nga mga balita ukon lokal nga isyu nga nagahilabot sa kabuhi sang mga tawo sa aton teritoryo. Apang, kon nagahinun-anon sining mga butang, dapat kita mag-andam nga wala kita sing nadampigan sa mga isyu sa politika ukon sa katilingban.—Juan 17:16.
3 Paano naton mahibaluan kon ano ang ginahunahuna sang mga tawo sa sina nga tion? Ayhan ang labing maayo nga paagi amo ang pagpamangkot lamang kag nian mamati. (Mat. 12:34) Ang interes sa mga tawo magapahulag sa aton nga talupangdon ang pagtamod sang iban kag mataktikanhon nga mamangkot sing dugang. Ang sabat sang tagbalay mahimo magpakita sang kabalaka nga ginabatyag sang madamo nga tagbalay sa sina nga duog kag mahimo makabukas sing dalan agod makapanaksi.
4 Paghanda sing Isa ka Presentasyon: Kon nagahanda para sa pag-alagad sa latagon sa nagabulubag-o nga kalibutan, sarang naton magamit ang libro nga Reasoning. Ang mabuligon nga mga panugda kon paano ipasibu ang karon nga mga hitabo sa aton presentasyon masapwan sa pahina 10-11, sa idalom sang “Crime/Safety” kag “Current Events.” Ang kaanggid nga impormasyon masapwan sa Septiembre 2000 nga Ang Aton Ministeryo sa Ginharian, pahina 4. Kon nagahanda sang imo presentasyon, pat-ura nga ilakip ang isa ka nagakaigo nga teksto.
5 Samtang ginatalupangod naton ang nagabulubag-o nga mga ginakabalak-an sang mga tawo sa aton teritoryo, kinahanglan nga pasibuon naton ang aton presentasyon sang maayong balita. Sa sina nga paagi, mahambal naton sa mga tawo ang nagaapektar gid sa ila kabuhi. Sa amo, mabuligan naton ang madamo pa nga makilala ang Isa nga wala nagabag-o sa iya mga kinaiya kag mga talaksan.—Sant. 1:17.