Gamita ang Ulihi nga mga Hitabo sa Pagpukaw sing Interes
1 Luyag mo bala makatigayon sing dalayon nga suplay sang maayong mga ideya nga magahupot sang imo ministeryo nga lab-as kag magapukaw sang interes sang mga tawo sa mensahe sang Biblia? Nian gamita ang nagakatabo sa kalibutan kag sa inyo komunidad sa pagsugod sing mga paghambalanay. Mahimo nimo magamit ang lokal kag pungsudnon ukon internasyonal nga mga balita. Ini nga mga butang pirme nagabalhin. (1 Cor. 7:31) Binagbinaga ang masunod nga mga halimbawa.
2 Ang mga problema sa pangabuhi kag sa balaklon amo ang ginakabalak-an gid sang mga tawo. Sa amo, mahimo ka makasiling:
◼ “Nabalitaan mo na bala nga ang mga bili [sambita ang butang] nagasaka liwat?” Ukon mahimo ka magkomento tuhoy sa pagkawalay palamugnan kon ang isa ka daku nga kompanya nagpamuhin sing madamong mamumugon. Depende kon ano ang luyag mo nga padulungan sang paghambalanay, masundan mo ini paagi sa pagpamangkot sing “Napaligban mo na bala kon ngaa kabudlay gid mangabuhi?” ukon “Sa banta mo mabudlay gid bala pirme nga mangabuhi?”
3 Ang mga balita tuhoy sa kasingki, subong sang mga trahedya sa mga pamilya ukon sa mga estudyante sang eskwelahan, nagahatag sing sadsaran para sa isa pa ka paghambalanay. Makapamangkot ka:
◼ “Nabasa mo bala sa pamantalaan nga [sambita ang trahedya sa komunidad]?” Nian mamangkot sing “Ano sa banta mo ang kabangdanan sang tuman kadamo nga kasingki sa kalibutan?” ukon “Sa banta mo magaabot gid bala ang tion nga magabatyag kita nga may kalig-unan?”
4 Ang balita tuhoy sa makahalapay nga mga baha, mga linog, ukon sibil nga mga kagamo sa nagkalainlain nga mga bahin sang kalibutan nagahatag man sing materyal nga nagapukaw sing interes. Halimbawa, mahimo ka mamangkot:
◼ “Ang Dios bala amo ang may salabton sa [sambita ang kinaugali nga kalamidad]?” Ukon mahimo nimo matudlo ang pinakaulihi nga pagdabdab sang sibil nga kagamo kag magsiling: “Kon ang tanan maluyag sang paghidait, ngaa tuman gid ini kabudlay matigayon?”
5 Magpabilin nga alisto sa ulihi nga mga hitabo nga magamit mo sa imo introduksion. Ang mapuslanon nga mga panugda masapwan sa ubos sang “Current Events,” sa pahina 10-11, sa Reasoning nga libro. Apang, likawi nga magdampig sa politikal ukon sosyal nga mga isyu. Sa baylo, ipatuhoy ang igtalupangod sa mga Kasulatan kag sa Ginharian sang Dios subong ang lamang permanente nga solusyon sa mga problema sang katawhan.