Ang Cristianong Ministeryo—Ang Aton Panguna nga Hilikuton
1 Tanan kita may nagkalainlain nga hilikuton nga dapat himuon. Ang pag-aman para sa pamilya isa sang ginapatuman sang Dios. (1 Tim. 5:8) Apang, ang hilikuton nga nadalahig sa sinang ginapatuman sang Dios indi dapat mangin mas importante sangsa hilikuton nga magbantala sang Ginharian kag maghimo sing disipulo.—Mat. 24:14; 28:19, 20.
2 Si Jesus naghatag sing sulundan agod ilugon naton sa “pagpangita anay sang ginharian.” (Mat. 6:33; 1 Ped. 2:21) Bisan diutay sa materyal, masako gid sia sa paghimo sing kabubut-on sang iya Amay. (Luc. 4:43; 9:58; Juan 4:34) Nanikasog gid sia nga makapanaksi sa tagsa ka kahigayunan. (Luc. 23:43; 1 Tim. 6:13) Ginpalig-on man niya ang iya mga disipulo nga mangin interesado gid sa pagpangani nga hilikuton.—Mat. 9:37, 38.
3 Pag-ilog kay Jesus Karon: Mailog naton ang halimbawa ni Jesus paagi sa pagtinguha nga magkabuhi sing simple nga nasentro ang kabuhi sa Cristianong ministeryo. Kon may mga kinahanglanon na kita sa kabuhi, sundon naton ang laygay sang Biblia nga indi na magtipon sing dugang kag dugang pa nga materyal sining kalibutan. (Mat. 6:19, 20; 1 Tim. 6:8) Mas maayo gid kon tinguhaan naton nga pasangkaron ang aton pagpakigbahin sa pagbantala nga hilikuton! Kon nagaatubang kita sang mabudlay nga mga kahimtangan, kabay nga manikasog kita kaangay ni Jesus, nga wala nagatugot nga mangibabaw ang mga kabalaka sa kabuhi sa aton panguna nga hilikuton nga amo ang pagbantala sing maayong balita sang Ginharian.—Luc. 8:14; 9:59-62.
4 Bisan yadtong may madamo nga responsabilidad nag-una sang pagbantala nga hilikuton. Ang isa ka utod nga lalaki nga may daku nga pamilya, may daku nga palangakuan sa trabaho, kag isa ka gulang sa Cristianong kongregasyon nagsiling: “Ginakabig ko nga karera ang ministeryo.” Ang isa ka payunir nga utod nga babayi nagsiling: “Mas bilidhon gid ang pagpayunir sangsa isa ka madinalag-on nga sekular nga trabaho.”
5 Walay sapayan sang aton mga kahimtangan, kabay nga sundon naton ang halimbawa ni Jesus. Paano? Paagi sa paghimo sang Cristianong ministeryo nga amo ang aton panguna nga hilikuton.