Iluga si Cristo sa Inyo Pagministeryo
1 Nagpahamtang si Jesus sing halimbawa agod ilugon naton sa aton pagministeryo. Ginpakita niya sa madamong kahimtangan kag madamong paagi ang iya tudok nga gugma sa Dios kag sa mga tawo. Gintudluan niya ang mga mahagop sing kamatuoran kag nagpakita sing mga buhat sang mahigugmaon nga kaayo sa mga ginasit-an kag mga ginapigos.—Mat. 9:35.
2 Ang Halimbawa kag mga Panudlo ni Jesus: Wala nagpatublag si Jesus paagi sa pagpasilabot sa politika ukon sa dalayawon nga mga buhat sang kaluoy para sa kaayuhan sang katilingban. Wala man niya gintugutan ang maayo sing katuyuan nga mga hilikuton nga magtublag sa iya ukon mangibabaw sa iya panguna nga hilikuton. (Luc. 8:1) Naghugod gid sia sa pagbantala sang maayong balita sang Ginharian sang Dios subong amo lamang ang permanente nga solusyon sa mga problema sang katawhan. Importante ang hilikuton ni Jesus kag limitado lamang ang iya tion sa paghimo sa sini. Sang ginhawiran si Jesus sang mga tawo sa Capernaum nga magpabilin, nagsiling sia sa iya mga disipulo: “Makadto kita sa iban nga duog . . . agod makabantala man ako didto, kay sa sini nga katuyuan nagkari ako.”—Mar. 1:38.
3 Pagkatapos niya mahanas ang iya mga disipulo, ginpadala sila ni Jesus nga may espesipiko nga mga instruksion: “Magbantala, nga nagasiling, ‘Ang ginharian sang langit malapit na.’” (Mat. 10:7) Gintudluan niya ang iya mga sumulunod nga dapat unahon nila sa ila kabuhi ang mga intereses sang Ginharian. (Mat. 6:33) Ang pamilinbilin ni Jesus sa iya mga disipulo antes sia magkayab sa langit nagapaathag kon ano ang ila himuon. Nagsiling sia: “Busa lakat kamo kag maghimo sang mga disipulo sa mga tawo sang tanan nga pungsod.”—Mat. 28:19.
4 Ang Importansia Sang Ginharian: Ang panguna nga topiko ni Jesus sa iya pagbantala amo ang Ginharian sang Dios, kag ginpalig-on niya ang iya mga disipulo nga sundon ang iya halimbawa. Indi gid magmadinalag-on ang mga panikasog sang mga tawo sa pagsolbar sang mga problema sang katawhan. (Jer. 10:23) Ang Ginharian lamang sang Dios ang magapakabalaan sa ngalan sang Dios kag permanente nga magapaumpaw sa katawhan. (Mat. 6:9, 10) Ang pagtudlo sang mga kamatuoran tuhoy sa Ginharian sa mga tawo “nga nagapanghayhay kag nagabakho sa tanan nga kalangil-aran nga ginahimo” makabulig sa ila nga magmalipayon kag magmadinalag-on sa ila pagkabuhi karon kag makapanguyapot sa masaligan nga paglaum sa palaabuton.—Ezeq. 9:4.
5 Nagpadayon si Jesus sa iya aktibo nga bahin sa pagbantala sang maayong balita sang Ginharian sang Dios, kag ginpasalig niya kita sang iya pagsakdag. (Mat. 28:20) Tubtob sa anong kasangkaron nga nagapahisuno kita sang aton ministeryo sa modelo nga ginpahamtang ni Jesus para sa aton? (1 Ped. 2:21) Sa sining importante nga katapusan nga mga adlaw, kabay pa nga himuon naton suno sa aton masarangan ang pagsunod sing suod sa halimbawa nga ginpahamtang ni Jesus sa ministeryo!