Mga Pamatan-on—Magtukod sing Isa ka Maayo nga Sadsaran Para sa Palaabuton
1. Ngaa dapat palambuon sang Cristianong mga pamatan-on ang mabakod nga pagtuo?
1 Ano ang panguna nga butang sa imo hunahuna? Ano ang imo ginapamensaran? Ang panguna mo bala nga ginakabalak-an nasentro sa mga butang karon, ukon nagalakip ini sa palaabuton kag nasentro sa ginsaad sang Dios? (Mat. 6:24, 31-33; Luc. 8:14) Ang mabakod nga pagtuo kinahanglanon agod manghikot suno sa mga saad sang Dios, subong sang aton makita sa mga halimbawa ni Abraham kag ni Moises. (Heb. 11:8-10, 24-26) Paano mo mapalambo ini nga sahi sang pagtuo kag matukod ang “maayo nga sadsaran para sa palaabuton”?—1 Tim. 6:19.
2. Ano ang matun-an naton gikan sa halimbawa ni Hari Josias?
2 Pangitaa si Jehova: Kon may rutina ka sang espirituwal nga hilikuton upod sa imo pamilya, dalayawon gid ina. Apang indi magdahom nga ina nga rutina makapatubas dayon sang mabakod nga pagtuo. Agod masapwan ang “ihibalo mismo sa Dios,” dapat ikaw mismo ang magpangita kay Jehova. (Hulu. 2:3-5; 1 Cron. 28:9) Amo sina ang ginhimo sang lamharon nga si Hari Josias. Walay sapayan nga nagdaku sia sa kahimtangan nga indi maayo sa espirituwal, “ginsugdan niya nga pangitaon ang Dios ni David nga iya katigulangan” sang 15 anyos sia.—2 Cron. 34:3.
3. Paano mapangita karon sang lamharon nga mga Cristiano si Jehova?
3 Paano mo mapangita si Jehova? Paagi sa pag-usisa sing mahalungon sa imo ginapatihan kag ‘pamatud-an sa imo kaugalingon’ nga amo gid ini ang kamatuoran. (Roma 12:2) Halimbawa, mapaathag mo bala kon ano ang ginasiling sang Biblia tuhoy sa dugo ukon mapamatud-an mo bala nga ang Ginharian sang Dios nagsugod sa paggahom sa mga langit sang 1914? Ang pagtigayon sing “sibu nga ihibalo sang kamatuoran” importante nga bahin sang pagtukod sing maayo nga sadsaran sa palaabuton.—1 Tim. 2:3, 4.
4. Paano mapadayag sang di-bawtismado nga mga manugbantala ang ila pag-uswag?
4 Ang pagpangita ni Josias sa Dios nagbunga sing maayong mga resulta. Antes sia mag-20 anyos, nanghikot sia sing maisugon sa pagdula sing butig nga pagsimba. (2 Cron. 34:3-7) Sing kaanggid, ang imo pag-uswag sa espirituwal sarang makita sa imo mga buhat. (1 Tim. 4:15) Kon ikaw isa ka di-bawtismado nga manugbantala, panikasugi nga mapauswag ang kalidad sang imo ministeryo. Indi lamang mangin kontento nga magtanyag sing literatura. Himua nga tulumuron ang paggamit sing Biblia, ang pagpangatarungan sa mga tawo, kag ang pagpalambo sa interes nga imo masapwan. (Roma 12:7) Makabulig ini sa imo nga magtubo sa espirituwal.
5. Ano nga mga kahigayunan sa pagpasangkad sang ila ministeryo ang bukas sa bawtismado nga mga Cristiano?
5 Ihatag kay Jehova ang Imo Pinakamaayo: Sang ginsimbuluhan mo ang imo dedikasyon kay Jehova paagi sa pagpabawtismo, nangin ordenado ka nga ministro sang Dios. (2 Cor. 3:5, 6) Nagabukas ini sang mga kahigayunan nga maalagad mo si Jehova sing bug-os tion. Nagalakip ini sa pagpayunir subong man sa pag-alagad sa Bethel, pagmisyonero, ukon pag-alagad sa internasyonal nga hilikuton. Ang iban pa nga paagi sa pagpasangkad sang imo ministeryo amo ang pagtuon sang iban nga lenguahe ukon pagsaylo agod mag-alagad sa kon diin mas daku ang kinahanglanon.
6. Paano kita tanan makatukod sing maayo nga sadsaran para sa palaabuton?
6 Sa pagkamatuod, indi tanan makapakigbahin sa sining mga pribilehiyo sang pag-alagad, apang ang kada isa sa aton makahatag sang aton pinakamaayo kay Jehova. (Mat. 22:37) Ano man ang imo mga kahimtangan, isentro ang imo kabuhi sa pag-alagad kay Jehova. (Sal. 16:5) Sa paghimo sini, nagatukod ka sing maayo nga sadsaran para sa palaabuton.