Isa ka Paagi nga Mabuligan Sila

Ang matuod nga mga Cristiano nagapakigbahin sa publiko nga ministeryo nga pagpalapnag sing maayong balita. (Fil. 2:17) Agod mahimo ini, pila ka brosyur, tract, kag mga artikulo sa 20 ka lenguahe ang ginbutang sa Internet sa www.watchtower.org. Ini nga Web site wala gindesinyo agod magpanagtag sing bag-o nga mga publikasyon sa mga Saksi ni Jehova. Ang tulumuron sini amo nga matigayon sang publiko ang sibu nga impormasyon tuhoy sa ginatudlo sang mga Saksi ni Jehova gikan sa Biblia.

Sining karon lang, may talalupangdon nga gindugang sa aton opisyal nga Web site. Ini amo ang brosyur nga Ano ang Ginapatuman Sang Dios sa Aton? sa kapin sa 220 ka lenguahe. Subong man, sugod sa mga isyu sang Enero 1 kag Enero 8, 2004, nga Ang Lalantawan kag Magmata! sa tanan nga lenguahe, may direksion na ini sang aton Web sa katapusan nga pahina.

Paano mo magamit ini nga kagamitan? Ti, basi may masugilanon ka nga tawo nga daw interesado apang iban nga lenguahe ang iya mahangpan. Kon nagagamit sia sang Internet, sarang mo mapakita sa iya ang direksion sa katapusan nga pahina sang Ang Lalantawan ukon Magmata! Sa sining paagi sarang niya mausisa ang Ginapatuman nga brosyur sa iya mismo lenguahe tubtob makabalik ka nga dala ang literatura sa iya lenguahe. Ukon sarang mo matugyan ang pagduaw sa kongregasyon ukon sa grupo nga nagaatipan sang mga tawo nga nagahambal sang iya lenguahe.