Iskedyul sang Pamilya—Pag-alagad sa Latagon sang Pamilya
1 Nalipay si Jehova nga makita ang mga lamharon nga nagadayaw sang iya ngalan. (Sal. 148:12, 13) Sang panahon ni Jesus, bisan ang ‘kabataan kag mga nagasuso nagadayaw’ sa Dios. (Mat. 21:15, 16) Amo man ang nagakatabo karon. Mga ginikanan, paano ninyo mabuligan ang inyo kabataan nga mangin makugi nga mga manugdayaw ni Jehova sa Cristianong ministeryo? Sa liwat, subong sang ginpadaku sa artikulo tuhoy sa mga miting sa kongregasyon, importante gid ang inyo halimbawa. Ginpabutyag sang isa ka amay ang kalabanan nga sentimiento sang mga ginikanan sang sia nagsiling: “Wala ginasunod sang kabataan ang imo ginasiling; kundi ginasunod nila ang imo ginahimo!”
2 Ang isa ka utod nga babayi nga ginpadaku sang mahinadlukon sa Dios nga mga ginikanan naghinumdom: “Wala gid kami nagapamangkot kon Sabado sing aga kon bala mabantala kami. Nahibaluan na namon.” Sing kaanggid, sarang mo mapatudok sa imo kabataan ang importansia sang pagbantala paagi sa tayuyon nga pag-alagad sa latagon subong pamilya kada semana. Indi lamang nga makatuon sila paagi sa pagtan-aw sa imo kundi sarang mo man mapanilagan ang ila panimuot, batasan, kag mga ikasarang.
3 Progresibo nga Paghanas: Agod malipay ang kabataan sa ministeryo, kinahanglan mangin handa sila sa pagpakigbahin sing epektibo. Ang utod nga babayi nga ginkutlo bag-o lang nagsiling man: “Wala lamang kami nagasunodsunod sa amon mga ginikanan sa ila hilikuton. Nahibaluan namon nga may bahin kami, bisan pa nga manugpindot lamang sing doorbell kag maghatag sing handbill. Paagi sa maayo nga paghanda para sa mga hilikuton sa talipuspusan sang semana, nahibaluan na namon ang amon isiling.” Mahanas mo ang imo kabataan paagi sa paghinguyang sing pila ka minuto kada semana agod maghanda sa ministeryo, sa pagtuon man sang pamilya ukon sa iban nga tion.
4 Ang pagbantala sing tingob subong pamilya nagahatag sa imo sing dugang nga kahigayunan nga mapatudok sa imo kabataan ang kamatuoran. Ginaupod sang isa ka Cristianong amay ang iya bata nga babayi kon maglakat sia sing napulo ka kilometro agod magpanagtag sing mga tract sa mga pumuluyo sa masunod nga nalupyakan. “Samtang nagalakat,” malipayon nga hinumdom sining bata nga babayi, “ginapatudok ni Tatay ang kamatuoran sa akon tagipusuon.” (Deut. 6:7) Kabay nga pakamaayuhon man ikaw kay nangin bahin sang imo semanal nga iskedyul sang pamilya ang pag-alagad sa latagon.