Tudlui ang Inyo Kabataan sa Pagdayaw kay Jehova
1. Mahimo bala madayaw sang kabataan si Jehova?
1 Ginapalig-on sang Salmo 148:12, 13 ang mga bata nga lalaki kag babayi nga ‘dayawon ang ngalan ni Jehova.’ Ang Kasulatan nagaunod sing madamong halimbawa sang kabataan nga naghimo sini. Halimbawa, “si Samuel nag-alagad sa atubangan ni Jehova, subong isa ka bata.” (1 Sam. 2:18) Isa ka “bata nga babayi” ang nagsiling sa asawa ni Naaman nga masarangan ayuhon sang manalagna ni Jehova ang aro ni Naaman. (2 Hari 5:1-3) Sang nagsulod si Jesus sa templo kag naghimo sing gamhanan nga mga buhat, “ang mga bata nga lalaki” amo ang nagsinggit: “Luwasa, nagapangamuyo kami, ang Anak ni David!” (Mat. 21:15) Paano matudluan sang mga ginikanan ang ila kabataan sa pagdayaw kay Jehova?
2. Ngaa importante para sa mga ginikanan nga magpahamtang sing maayong halimbawa sa ila kabataan?
2 Mangin Halimbawa: Antes ipatudok ang kamatuoran sa tagipusuon sang ila kabataan, ang mga amay nga Israelinhon gintudluan nga higugmaon anay nila si Jehova kag mangin yara sa ila mismo tagipusuon ang iya mga sugo. (Deut. 6:5-9) Kon maghambal ka sing makapalig-on tuhoy sa ministeryo kag himuon ini nga bahin sang inyo iskedyul kada semana, mas mahuyog ang inyo kabataan nga tamdon ang ministeryo nga importante kag makaalayaw.
3. Paano nakabenepisyo ang isa ka utod nga babayi sa halimbawa sang iya mga ginikanan?
3 Malipayon nga nagsaysay ang isa ka utod nga babayi: “Sang bata pa ako, nalakip sa iskedyul sang amon pamilya ang pagpakigbahin sa ministeryo sa latagon kada talipuspusan sang semana. Nakita ko nga nalipay gid ang akon mga ginikanan sa pagbantala. Nagdinalagku kami nga ginatamod ang pagministeryo nga makalilipay.” Nangin di-bawtismado nga manugbantala ini nga utod sa edad nga siete anyos kag malapit na sa 33 ka tuig sia nga nagaalagad subong bug-os tion.
4. Ano ang buot silingon sang paghanas sa kabataan sing progresibo?
4 Progresibo nga Paghanas: Ilakip ang inyo kabataan sa inyo pagpakigbahin sa ministeryo. Ayhan sila ang inyo papinduton sang doorbell, magtunghol sing isa ka tract ukon magbasa sing isa ka teksto sa tagbalay. Madugangan sini ang ila kalipay kag mabuligan sila nga makatigayon sing pagsalig sa ila ikasarang sa pagpaambit sang mensahe sang Ginharian. Samtang nagadinalagku sila, dapat madugangan ang ila partisipasyon sa ministeryo. Busa, buligi sila nga mangin progresibo kag buligi sila nga makapili sang ila espirituwal nga mga tulumuron.
5. Ano ang ginakinahanglan agod mangin kalipikado ang isa ka bata subong di-bawtismado nga manugbantala?
5 Sugilanuna gilayon ang mga gulang kon sa banta ninyo kalipikado na nga mangin di-bawtismado nga manugbantala ang inyo kabataan kag kon nagpabutyag na sila sang ila handum nga mangin di-bawtismado nga manugbantala. Kon mangin manugbantala na sila, mapatudok sa ila ang ila personal nga responsibilidad sa pagdayaw kay Jehova. Hunahunaa pirme nga indi kinahanglan sang bata nga mahibaluan ang pareho kadamo nga ihibalo sang bawtismado nga mga adulto agod mangin kalipikado. Nahibaluan bala sang inyo bata ang panguna nga mga panudlo sa Biblia? Ginasunod bala niya ang moral nga mga talaksan sang Biblia? Handum na bala niya nga makigbahin sa ministeryo kag makilala subong isa sa mga Saksi ni Jehova? Kon amo, mahimo nga pat-uron sang mga gulang kon kalipikado sia subong di-bawtismado nga manugbantala.—Tan-awa ang Organisado sa Paghimo Sang Kabubut-on ni Jehova, p. 79-82.
6. Ngaa mapuslanon gid nga hanason sang mga ginikanan ang ila kabataan?
6 Ang pagtudlo sa kabataan nga dayawon si Jehova sing tinagipusuon nagakinahanglan sing pagpanikasog. Apang, daku katama nga kalipay ang mabatyagan sang mga ginikanan kon makita nila ang ila mga kabataan nga nagauswag sa espirituwal. Labaw sa tanan, nahamuot si Jehova kon magasugid ang kabataan tuhoy sa iya makatilingala nga mga binuhatan.