Iskedyul sang Pamilya—Ang Pagtuon sang Pamilya
1 Ang labing daku nga dulot nga mahatag ninyo sa inyo kabataan subong isa ka Cristianong ginikanan amo ang inyo gugma kay Jehova. Ang isa ka importante nga kahigayunan nga mahimo ini amo kon “nagapungko ka sa imo balay” para sa semanal nga pagtuon sang pamilya. (Deut. 6:5-7) Bisan pa nga may tumuluo ka nga tiayon, nagapuyo sa nabahinbahin sa relihion nga panimalay, ukon nagasolo nga ginikanan, mabuligan mo ang imo kabataan nga mangin suod sa imo kag kay Jehova paagi sa regular nga pagtuon sang pamilya.
2 Pagsugod: Ang una nga tikang amo ang himuon nga batasan ang pagtuon subong pamilya. Kon indi mo pat-od kon san-o magtuon, ngaa indi ini paghinun-anunan upod sa imo pamilya? (Hulu. 15:22) Kon may magagmay ka nga kabataan, basi luyag mo ang pila ka malip-ot nga pagtuon. Hibalua kon san-o ang nagakabagay sa imo panimalay sa bilog nga semana. Magtalana sing tion para sa pagtuon sa inyo iskedyul sang pamilya, kag sundon gid ini.
3 Ano ang sarang ninyo tun-an? Ang pila nagahanda sing tulun-an nga pagabinagbinagon sa Pagtinuon Sang Kongregasyon sa Libro ukon sa Pagtinuon sa Ang Lalantawan. Ginabinagbinag sang iban ang materyal nga gindesinyo ilabi na sa mga pamatan-on. Ang amay sang isa ka bata nga lalaki kag isa ka bata nga babayi nagsiling: “Ang naluyagan gid nga himuon sang kabataan sa amon pagtuon sa sina nga semana amo ang pagdrama sang mga danyag gikan sa Ang Akon Libro Sang mga Sugilanon sa Biblia. Ang epekto kag paghangop nga natigayon mas madalom pa sangsa kon pila ka parapo ang amon natapos.”
4 Magtuon Kada Semana: Ang pagtuon sang pamilya dapat hiwaton sing regular kag dapat ginakalangkagan sang tagsa ka katapo sang pamilya. Ang pila ka pagpasibu sa adlaw kag oras sarang mahimo agod maatipan ang wala ginapaabot nga mga kahimtangan. May mga okasyon man nga dapat bag-uhon ang ginahinun-anunan. Apang ang bisan ano nga pagpasibu indi dapat magpauntat sa permanente nga iskedyul sang pagtuon sang pamilya. Sa isa ka panimalay, ang isa ka bata nga babayi nagkomento: “Kon bag-uhon ang oras sang amon pagtuon, pirme ginabutang ni Tatay ang pahibalo sa puertahan sang repridyeretor agod mahibaluan namon tanan kon san-o ini.” Daw ano ka makadalayaw ining mga panikasog nga mahuptan ang regular nga pagtuon sang pamilya! Samtang padayon mo nga ginapadaku ang imo kabataan “sa disiplina kag sa nagatadlong nga panghunahuna ni Jehova,” ginapasundayag mo ang imo gugma sa ila kag sa aton langitnon nga Amay.—Efe. 6:4.