Pamangkot
◼ Dapat bala ireport ang pagtuon sang pamilya sa Biblia?
Kon ginadumalahan sang isa ka Cristianong ginikanan ang pagtuon sang pamilya sa Biblia kag may yara di-bawtismado nga kabataan, sarang mareport sang ginikanan ang isa lang ka oras sa isa ka semana, isa ka pagbalik duaw sa isa ka semana, kag isa ka pagtuon sa Biblia sa isa ka bulan. Amo sini ang kaso bisan kon ang pagtuon nagalawig sing kapin sa isa ka oras, ginahiwat sing kapin sa isa ka bes kada semana, ukon ginadumalahan ang kada bata.—Tan-awa ang Aton Ministeryo nga libro, p. 104.
Kon ang tanan sa panimalay bawtismado nga mga Saksi, wala sing oras ukon pagtuon ang ireport (magluwas kon ang bata nagatuon pa sang ikaduha nga libro pagkatapos sang bawtismo). Ini bangod ang report sang kongregasyon sa pag-alagad sa latagon nagapakita una sang kon ano ang nahimo sa pagbantala sing maayong balita kag pagtudlo sing kamatuoran sa Biblia sa sadtong indi pa dedikado kag bawtismado nga mga alagad ni Jehova. (Mat. 24:14; 28:19, 20) Apang, wala ini nagadula sang importansia sang paghiwat sing regular nga pagtinuon.
Responsabilidad sang Cristianong mga ginikanan nga magtuon upod sa ila kabataan. Yadtong nagakinahanglan sing bulig agod sugdan ukon pauswagon ang pagtuon sang ila pamilya sarang makapangayo sing bulig sa mga gulang. Kon kinahanglan bangod sang sirkunstansia nga ang iban nga manugbantala amo ang magadumala sing pagtuon sa Biblia upod sa di-bawtismado nga anak sang isa ka Cristianong pamilya nga katapo sang kongregasyon, ang nagadumala nga manugtatap ukon ang manugtatap sa pag-alagad dapat anay pakig-angutan. Kon tugutan ini nga pagtuon, ang isa nga nagadumala sini sarang makareport subong sang ginahimo niya sa iban nga pagtuon.
Ang paghanas sa kabataan sa mga dalanon ni Jehova nagalakip sang madamo pa nga tion kag panikasog sangsa makita sa ginareport. (Deut. 6:6-9; Hulu. 22:6) Ang Cristianong mga ginikanan dapat dayawon bangod sang pag-abaga sang ila mabug-at nga responsabilidad sa pagpadaku sa ila kabataan “sa disiplina kag sa pagtudlo sang Ginuo.”—Efe. 6:4.