Paglab-ot sa Mas Madamo nga Tawo Tubtob Posible

1. Ano ang ginhimo sang una nga mga Cristiano agod mapalab-utan sang maayong balita ang madamo nga tawo tubtob posible?

¹ Gintinguhaan gid sang una nga mga sumulunod ni Jesus nga ipalapnag ang mensahe sang Ginharian. Naghimo sila sing praktikal nga mga tikang agod mapalab-ot ang maayong balita sa madamo nga tawo tubtob posible. Ang Cristianong mga manunulat sang Biblia nagsulat sang ila inspirado nga mga sinulatan sa kinaandan nga Griego, nga amo sadto ang internasyonal nga lenguahe sang Emperyo sang Roma. Dugang pa, ang makugi nga mga manugbantala sang ikaduha kag ikatlo nga siglo C.⁠E. padayon, mahimo nga amo ang nagpanguna sa paggamit sing codex, nga mas mahapos gamiton sangsa linukot sa pagpangita sang mga reperensia.

2, 3. (a) Paano ang Isaias 60:16 natuman karon? (b) Paano ang teknolohiya gingamit sa pagpasangkad sang putli nga pagsimba?

² Paggamit sang Teknolohiya: Paagi kay manalagna Isaias, nagtagna si Jehova: “Susuhon gid nimo ang gatas sang mga pungsod.” (Isa. 60:16) Bilang katumanan sini nga tagna karon, ang mga alagad ni Jehova nagagamit sing mapuslanon nga mga pagkabutang gikan sa mga pungsod agod pasangkaron ang pagbantala. Halimbawa, sang 1914, mga tinuig sa wala pa nangin lapnag ang mga pelikula ukon sine, ang mga Estudyante sang Biblia nagpasalida na sang sine nga “Photo-Drama of Creation.” Ining otso-oras nga pelikula kag slide nga presentasyon, de-kolor na kag may tunog pa, naghatag sing mabaskog gid nga panaksi sa minilyon ka tawo.

³ Sa karon, ang katawhan sang Dios nagagamit sang madasig nga mga imprintahan kag mga kagamitan nga ginamaniobra sang kompyuter agod ibalhag ang mga Biblia kag mga literatura sang Biblia sa ginatos ka lenguahe. Ang madasig nga pagpangdul-ong sang mga literatura sang Biblia sa kaukbungan sang duta, naglab-ot sa mga tawo sa 235 ka kadutaan. Paagi sa iya espiritu, ginpahulag ni Jehova ang iya mga alagad sa paggamit sina nga mga teknolohiya sing epektibo, amo nga karon lang natabo nga ang kamatuoran sang Biblia matigayon sang mas madamo pa nga mga tawo.

4. Ano nga mga pagpasibu ang ginhimo sang iban agod mapalab-utan ang mas madamo pa nga tawo sang maayong balita?

⁴ Personal nga Pagpasibu: Ang matuod nga mga sumilimba ginapalig-on man nga magpasibu agod mapalab-ot ang maayong balita sa mas madamo pa nga mga tawo. Madamo ang nagpasimple sang ila kabuhi agod makapakigbahin sing bug-os sa pagbantala. Ang iban nagsaylo sa duog nga mas daku ang panginahanglan sang mga manugbantala sang Ginaharian. Ang iban nagpasangkad sang ila ministeryo paagi sa pagtuon sang dumuluong nga lenguahe.

5, 6. Ano ang himuon agod malab-ot ang mas madamo pa nga tawo sa inyo teritoryo tubtob posible?

⁵ Dugang pa, malab-ot naton ang mas madamo nga tawo sang maayong balita paagi sa pagbantala sa tion nga yara sila sa ila balay kag kon sa diin sila masapwan. Kon sa inyo teritoryo ang mga tawo masami nga wala sa ila balay kon adlaw, mapasibu mo bala ang imo iskedyul agod mapanaksihan sila sa tion sang kasisidmon? May publiko bala nga mga duog nga puede mapanaksihan? Natilawan mo na bala ang pagbantala paagi sa telepono kag pagpanghikot sa mga duog sang negosyo? Nagakalit ka bala sa pagpanaksi sing di-pormal?

⁶ Pribilehiyo gid naton nga makapakigbahin sa dakung pagpanaksi tuhoy sa ngalan ni Jehova kag sa Ginharian! Kabay nga padayunon naton ang pagpaambit sang nagahatag kabuhi nga kamatuoran gikan sa Pulong sang Dios sa mas madamo pa nga tawo tubtob posible.—⁠Mat. 28:19, 20.