‘Himua ang Tanan nga Butang Tungod sa Maayong Balita’
1. Ano ang handa nga himuon sang isa ka manugbantala sang Ginharian para sa iban, kag ngaa?
1 Nagbatyag si Pablo nga may obligasyon sia nga ibantala ang maayong balita sa iban. (1 Cor. 9:16, 19, 23) Sing kaanggid mapahulag man kita nga manikasog gid nga ipaambit sa iban ang maayong balita bangod nagaulikid kita sa ila dayon nga kaayuhan.
2. Ano nga mga pagpasibu ang dapat naton himuon kon nagapanaksi, kag ngaa?
2 Pagbantala sa Duog kag Tion nga may Tawo: Ginaladlad sang isa ka maayo nga mangingisda ang iya pukot, indi sa duog kag tion nga paborable sa iya, kundi sa duog kag sa tion nga madamo sing isda. Kita man “mga mangingisda sing mga tawo.” Gani dapat naton pasibuon ang aton iskedyul agod masapwan naton ang mga tawo kag sa amo magakalipay kita kay matipon naton ang “tanan nga sahi sang isda.” (Mat. 4:19; 13:47) Mahimo bala naton duawon ang mga tawo sa gab-i ukon panaksihan sila sa kaagahon sa dalan? Tulumuron ni Pablo nga “magpanaksi sing maid-id [tuhoy] sa maayong balita,” kag ginpanginpuslan niya ang mga kahigayunan agod mahimo ini.—Binu. 17:17; 20:20, 24.
3, 4. Kon nagapanaksi kita paano naton mapasibu ang mensahe nga dala naton, kag ano ang mga resulta sini?
3 Ipasibu ang Imo Presentasyon Depende sa Kahimtangan: Masami nga ginapasibu sang mga mangingisda ang ila mga paagi agod makuha ang sahi sang isda nga luyag nila. Sa pihak nga bahin paano naton ipaambit sa mga tawo ang maayong balita sang Ginharian nga mahapos nila ini batunon? Dapat ang topiko nga ihambal naton amo gid ang ginakabalak-an nila. Dayon pamatii sing maayo ang ila ginapabutyag tuhoy sini. (Sant. 1:19) Mahimo man naton pamangkuton ang ila pagtamod tuhoy sa topiko nga aton ginaistoryahan. (Hulu. 20:5) Kon himuon naton ini matandog gid sila sang maayong balita nga dala naton. Si Pablo, nangin ‘tanan nga butang sa tanan nga sahi sang mga tawo.’ (1 Cor. 9:22) Ang pagpasibu sang aton presentasyon makabulig gid agod malab-ot ang tagipusuon sang mga tawo.
4 Nalipay gid kita nga ipaambit ang “maayong mga balita” sa mga tawo! (Isa. 52:7) Kabay nga ‘himuon naton ang tanan nga butang tungod sa maayong balita’ agod mapanaksihan ang mas madamo nga tawo.—1 Cor. 9:23.