Pagpakita Sing Personal nga Interes—Paagi sa Pagpamangkot kag Pagpamati
1 Madamong tawo ang nalipay sa pagpabutyag sang ila mga pagtamod apang indi nila gusto nga tudluan ukon interogahon. Busa subong Cristianong mga ministro, dapat naton pauswagon ang aton ikasarang sa pagpamangkot agod makapabutyag ang mga tawo.—Hulu. 20:5.
2 Ang aton mga pamangkot dapat nga makapahunahuna, indi makapaugot. Sang nagabantala sa pamalaybalay, ang isa ka utod nga lalaki namangkot, “Sa banta mo maabot pa ayhan ang tion nga ang mga tawo magapadungganay kag magatinahuray?” Depende sa sabat, magapadayon sia, “Ano sa banta mo ang himuon agod matabo ini?” ukon “Ngaa amo sina ang imo ginabatyag?” Kon nagapanaksi sing di-pormal kag kon yara sa publiko nga mga duog, ang isa pa ka utod nga lalaki nagapamangkot sa mga may kabataan, “Ano ang nagapahalipay gid sa imo subong isa ka ginikanan?” Nian nagapamangkot sia, “Ano gid ang nagapabalaka sa imo?” Talupangda nga ini nga mga pamangkot indi makapasaklaw kundi magapukaw sa mga tawo sa pagpabutyag sang ila mga pagtamod. Sanglit ang mga kahimtangan nanuhaytuhay, mahimo naton pasibuon ang topiko kag ang pamaagi sang aton mga pamangkot agod mapahisuno sa mga tawo sa aton teritoryo.
3 Pagpahambal sa mga Tawo: Kon luyag sang mga tawo nga magpabutyag sang ila mga panghunahuna, pamatii sila sing maayo. (Sant. 1:19) Mainayuhon nga pasalamati ang ila mga komento. (Col. 4:6) Mahimo ka magsiling: “Makawiwili gid ina. Salamat gid sa pagsugid sina sa akon.” Dayawa sila sing sinsero. Mainayuhon nga mamangkot sing dugang agod mahibaluan mo kon ano ang ila ginahunahuna kag kon ngaa amo sina ang ila ginabatyag. Maghunahuna sing topiko nga ginaugyunan. Kon luyag mo ipatalupangod sa ila ang isa ka teksto, mahimo ka magsiling, “Sa banta mo posible ayhan ini?” Indi mangin arogante ukon mabaison.—2 Tim. 2:24, 25.
4 Nagadepende sa aton pagpamati ang sabat sang iban sa aton mga pamangkot. Manutaran sang mga tawo kon tinagipusuon kita nga nagapamati. Nagsiling ang isa ka nagalakbay nga manugtatap, “Kon mamati ka gid sing maayo sa mga tawo, may tumalagsahon ini nga pangganyat kag isa ka dalayawon nga pagpabutyag sing sinsero kag personal nga interes.” Ginapadunggan naton sila kon nagapamati kita, kag magapahulag ini sa ila sa pagpamati sang maayong balita nga ginatinguhaan naton nga ipaambit.—Roma 12:10.