Manginpulos sa Aton Pagtuon sa Ano Gid ang Ginatudlo Sang Biblia?
1 Ang makakulunyag nga bahin sang “Diosnon nga Pagkamatinumanon” Distrito nga Kombension amo ang pagpagua sang libro nga Ano Gid ang Ginatudlo Sang Biblia? Sa indi madugay, gamiton naton ini pirme sa aton pagministeryo, ilabi na kon magadumala kita sing mga pagtuon sa Biblia sa puluy-an. Busa, dapat nga mangin pamilyar kita sa sining bag-o nga publikasyon. Posible gid ini bangod tun-an naton ini sa Pagtinuon Sang Kongregasyon sa Libro sugod sa semana sang Abril 17, 2006.
2 Ang manugtatap sang Pagtinuon Sang Kongregasyon sa Libro magapatalupangod sa mga pamangkot nga masapwan sa pamuno sang tagsa ka kapitulo. Nian ang pagtuon dumalahan paagi sa paggamit sang mga pamangkot sa ubos sang pahina. Basahon kag binagbinagon ang yabi nga mga teksto, kag ang kahon nga “Kon Ano ang Ginatudlo Sang Biblia” sa katapusan sang kapitulo makabulig sa pagrepaso sang gintun-an bangod nagaunod ini sang Makasulatanhon nga mga sabat sa nagabukas nga mga pamangkot sa kapitulo. Malipay ka gid sa pagsabat, bangod ginapaathag sang libro ang topiko sing maathag, simple, kag makawiwili.
3 Ang apendise sini nga libro nagaaman sang mga detalye sa nanuhaytuhay nga mga topiko. Mahimo naton magamit ini kon luyag pa gid sang estudyante sa Biblia ang dugang nga impormasyon sa topiko. May mga bahin sang apendise nga tuptupan kon kaisa sa Pagtinuon Sang Kongregasyon sa Libro. Ang tanan nga apendise sang topiko basahon sang manugbasa sang pagtuon, kag ang mas malawig nga mga artikulo mahimo tuptupan sa mga seksion. Wala sing pamangkot sa apendise. Apang mahimo nga pakomentuhon sang manugtatap ang mga nagtambong paagi sa pagpamangkot nga nagapadaku sang pangunang mga punto.
4 Madasig lang ang pagtuon sa Ginatudlo Sang Biblia nga libro sa Pagtinuon Sang Kongregasyon sa Libro. Apang indi subong sini kadasig kon ginatun-an naton ang iban sa sini nga libro, ilabi na kon diutay ukon wala sila sing ihibalo sa Biblia. (Binu. 26:28, 29) Sa mga pagtuon sa Biblia sa puluy-an, dapat nga mas maid-id ang aton pagbinagbinag sa mga teksto, pagpaathag sa mga laragway, kag iban pa. Gani magtambong gid kada semana kag magpakigbahin sing bug-os sa pagtuon sa libro nga Ano Gid ang Ginatudlo Sang Biblia?