Tudlui ang mga Mahagop sa Paglakat sa Dalanon sang Dios

1. Ano ang nadalahig sa paghimo sing mga disipulo?

¹ Ginpatuhuyan ang unang siglo nga mga disipulo ni Cristo nga iya sang “Dalan.” (Binu. 9:2) Ang matuod nga Cristianismo nagadalahig sa bug-os nga pagkabuhi sang isa ka tawo. (Hulu. 3:5, 6) Busa, kon nagadumala sang mga pagtuon sa Biblia, indi lamang pagpaalinton sang sibu nga ihibalo sa panudlo sang Biblia ang aton himuon. Dapat man naton buligan ang mga estudyante sa Biblia nga maglakat sa dalanon ni Jehova.—⁠Sal. 25:8, 9.

2. Ano ang magapahulag sa mga estudyante sa Biblia nga sundon ang mga sugo sang Dios?

² Gugma kay Jehova kag kay Jesus: Mabudlay gid para sa di-himpit nga mga tawo nga ipahisuno ang ila panghunahuna, panimuot, panghambal, kag paggawi sa kabubut-on sang Dios! (Roma 7:21-23; Efe. 4:22-24) Apang, ang gugma sa Dios kag sa iya Anak magapahulag sa mga mahagop sa pag-atubang sini nga mga kabudlayan. (Juan 14:15; 1 Juan 5:3) Paano naton mabuligan ang aton mga estudyante sa Biblia nga mapalambo ini nga gugma?

3. Paano naton mabuligan ang mga estudyante sa pagpalambo sang gugma kay Jehova kag kay Jesus?

³ Buligi ang imo mga estudyante sa paghibalo kon ano nga sahi sang persona si Jehova. Ang isa ka utod nga lalaki nagpaathag, “Indi mahimo mahigugma sang mga tawo ang isa ka tawo nga wala nila makilala, gani sugod gid sa pagtuon, ginatudluan ko sila sang ngalan sang Dios gikan sa Biblia, kag nagapangita ako sing mga kahigayunan nga mapadaku ang mga kinaiya ni Jehova.” Ang pagpadaku sang mga halimbawa ni Jesus amo ang pinakamaayo nga paagi agod mahimo ini. (Juan 1:14; 14:9) Dugang pa, gamita ang mga kahon para sa repaso sa katapusan sang kada kapitulo sang Ginatudlo Sang Biblia nga libro sa pagbulig sa mga estudyante nga mapabanaag ang dalayawon nga mga kinaiya sang Dios kag sang iya Anak.

4. (a) Ngaa madamo nga mga estudyante ang nabudlayan sa pagbantala? (b) Paano naton mabuligan ang aton mga estudyante sa ila una nga pagpakigbahin sa Cristianong ministeryo?

⁴ Magtudlo Paagi sa Halimbawa: Subong mga manunudlo kag manugtuytoy, ginapakita naton sa iban paagi sa aton paggawi kon ano ang kahulugan sang paglakat sa dalanon sang Dios. (1 Cor. 11:1) Halimbawa, wala naanad ang kalabanan nga mga estudyante sa Biblia sa pagpalapit sa mga indi nila kilala agod ipaambit ang ila mga pagpati. Busa, mahimo nga kinahanglan ang pagkamapinadayunon kag ikasarang sa pagbulig sa ila agod mapalambo ang gugma, pagtuo, kag kaisog sa pagpakigbahin sa pagbantala kag paghimo disipulo. (2 Cor. 4:13; 1 Tes. 2:2) Ang aton handum nga pagtuytoy sa aton mga estudyante magapahulag sa aton nga updan sila sa ila una nga pagpakigbahin sa Cristianong ministeryo.

5. Paano ang maayong halimbawa magabulig sa mga estudyante sa pagtalupangod kon ano ang nadalahig sa pagsunod sa mga sugo sang Dios?

⁵ Matudluan mo sa iban nga bahin sang Cristianong pagkabuhi ang imo estudyante paagi sa imo halimbawa. Kon nagaduaw ka sa nagabalatian ukon sinsero nga nagatamyaw sa iban sa tion sang mga miting sa kongregasyon, makita nila ang pagpanghikot sang gugma. (Juan 15:12) Kon nagapaninlo ka sa Kingdom Hall ukon nagabulig sa iban, ginatudluan mo sila kon paano magpangalagad. (Juan 13:12-15) Kon matalupangdan nila nga ginahuptan mo ang imo pagkabuhi nga simple, mahangpan nila kon ano ang buot silingon sang ‘pagpadayon sa pagpangita sang ginharian.’—⁠Mat. 6:⁠33.

6. Ano ang resulta sang pagbulig sa mga mahagop nga makaalagad kay Jehova?

⁶ Nagakinahanglan gid sang panikasog ang pagtudlo sa iban sang Pulong sang Dios kag ang paghimo sing disipulo. Apang makalilipay gid nga makita ang mga mahagop nga “padayon nga nagalakat sa kamatuoran”!—⁠3 Juan 4.