Bag-o nga Programa sa Adlaw sang Pinasahi nga Asambleya

Ginpabakod sang balaan nga espiritu, ang mga Cristiano sang una nanikasog gid sa pagbantala sang maayong balita sing lapnag tubtob sa ila masarangan. (Binu. 1:8; Col. 1:23) Ang bag-o nga programa sa adlaw sang pinasahi nga asambleya nga, ‘Mangin Masako Kaayo sa Pagbantala Sing Pulong,’ magabulig sa aton agod mailog ang ila ekselente nga halimbawa. (Binu. 18:5) Ini nga programa magasugod sa Pilipinas sa Pebrero, 2007.

Nagsiling si Hari David tuhoy sa pulong sang Dios: “Ang pahanumdom ni Jehova masaligan, nga nagapaalam sa isa nga indi eksperiensiado.” (Sal. 19:7) Ang nahanda sing maayo nga programa para sa 2007 nga adlaw sang pinasahi nga asambleya magapatalupangod sang kapuslanan sang Kasulatan “sa pagtadlong sing mga butang” kag magapalig-on sa aton nga gamiton ang Pulong sang Dios sa pagbantala kag pagtudlo upod ang pagbatyag sing pagkahilingagawon. (2 Tim. 3:16, 17) Ipaathag sa bag-o nga programa kon paano naton malikawan ang mga tugalbong kag ang kapuslanan sang pag-aplikar sang mga prinsipio sang Biblia sa aton matag-adlaw nga pagkabuhi. Ginabuligan man kita sini sa paggamit sang Pulong sang Dios agod buligan ang mga pamatan-on kag mga bag-uhan nga mag-uswag sa espirituwal.

Pat-ura nga presente ka sa pagsugod sang programa, kag mamati gid sing maayo. Isulat ang mga punto nga mahimo mo maaplikar sing personal. Ipakita ang apresasyon sa mga instruksion kag mga pahanumdom nga imo nabatian, kag pamalandungi kon paano mo maaplikar ang mga butang nga imo natun-an.

Ang programa sa adlaw sang pinasahi nga asambleya magadugang sang aton apresasyon sa Pulong sang Dios, magapahanumdom sa aton nga magpadayon sa pagbantala sang maayong balita sang Ginharian sing makugi, kag magapakita sa aton kon paano mabuligan ang iban nga himuon man ini. Busa pat-ura nga indi mo mawasi ang bisan anong espirituwal nga panuytoy kag instruksion nga ginaaman ni Jehova sa sining paagi!—Isa. 30:20b, 21.