Branch Letter

Pinalangga nga mga Manugbantala Sang Ginharian:

Nalipay gid kami sa pagsugid sa inyo nga sang nagligad nga tuig, ang isa ka bag-o nga imprintahan nga Hantscho gin-instalar sa Bethel sa Quezon City.

Nag-abot ining bag-o nga imprintahan sa sanga gikan sa Mexico sang Agosto 11, 2005. Nagsugod ang pag-instalar sang Agosto 22, 2005 kag natapos sang Disiembre 23, 2005. Nag-abot sa pagbulig sa mga kauturan diri ang pito ka utod halin sa Mexico kag anom halin sa Colombia agod i-instalar ang imprintahan. Nalipay gid ang tanan sang gin-imprinta sa sini ang Pebrero 1, 2006 nga Watchtower.

Ining bag-o nga imprintahan nagabug-at sing 50 toneladas kag nagakinahanglan sing pundasyon nga 35 sentimetro nga kadamulon. Nagalaba ini sing 28 metros kag 4.39 metros ang pinakamataas sini nga bahin. Mahimo ini makaimprinta sing 40,000 ka magasin kada oras, nga nagakahulugan sing 12 ka magasin kada segundo. Ang tagsa ka rolyo sang papel nga nagabug-at sing mga 500 kilos maubos sa sulod sang 25 minutos lamang kon paandaron ini sa iya bug-os nga kadasigon. Agod mahatagan kamo sing ideya kon daw ano kadamo nga papel ang magamit sa pag-imprinta sang aton magasin, kon humlaron kag sugpunon sing matadlong ang tanan nga papel nga magamit sa isa ka tuig, mahimo sini malibot ang bug-os nga duta sing duha ka beses.

Sang Abril, 2006, may kabug-usan nga 873,198 ka magasin ang napahamtang, ang pinakamadamo nga napahamtang halin sang una. Ipadayon naton ang lapnag nga pagpanagtag sang Ang Lalantawan kag Magmata! sa sining bag-o nga tuig sang pag-alagad. Huo, padayon naton nga “himuon ini sing labi kag labi pa.”—1 Tes. 4:1.

Ang inyo kauturan,

Sanga Talatapan sa Pilipinas