Pinasahi nga Kampanya sa Oktubre 16–Nobiembre 12!
1 “Malapit Na ang Kalaglagan Sang Butig nga Relihion!” Amo ini ang tig-ulo sang Kingdom News Num. 37, nga amo ang ipanagtag sa bug-os nga kalibutan sugod sa masunod nga bulan. Sa unang bahin sang Oktubre, itanyag naton Ang Lalantawan kag Magmata! nga magasin. Sugod sa Lunes, Oktubre 16, tubtob Domingo, Nobiembre 12, ipanagtag naton ang Kingdom News Num. 37. Sa kada talipuspusan sang semana sa tion sang kampanya, itanyag naton ini upod ang bag-o nga mga magasin.
2 Kon Sin-o ang Mahimo Makapakigbahin: Luyag sang tanan nga aktibo nga manugbantala sang maayong balita nga makapakigbahin sing bug-os. Ang iban mahimo maka-auxiliary payunir. May mga kabataan ka bala ukon estudyante sa Biblia nga nagauswag na sa espirituwal? Buligi sila sa pagpalapit sa mga gulang agod mapat-od kon kalipikado sila nga mangin di-bawtismado nga manugbantala. Dapat maghimo sing inisyatibo ang mga gulang agod palig-unon ang mga nagbugnaw sa pagpakigbahin, ayhan, paagi sa pagpaupod sa ila sa hanas nga mga manugbantala.
3 Ang suplay sang Kingdom News Num. 37 ipadala sa tanan nga kongregasyon agod makatigayon sing tig-50 ka kopya ang mga manugbantala kag mga payunir. Kon indi maubos panagtag sang pila ka manugbantala ang 50 ka kopya, mahimo nga ihatag ini sa mga regular payunir. Ang mga interesado nga indi pa manugbantala mahimo makatigayon sing lima ka kopya agod ila mahatag sa katapo sang ila pamilya kag mga abyan. Dapat ilista sang tanan ang ila mapahamtang kag isulat ini sa likod sang ila report sa pag-alagad sa latagon sa katapusan sang Oktubre kag Nobiembre. Totalon sang sekretaryo ang napanagtag sang kongregasyon kag ireport ini sa sanga talatapan sa katapusan sang tagsa ka bulan. Ang mabilin nga mga kopya sang Kingdom News pagkatapos sang kampanya mahimo gamiton sa bisan anong aspekto sang ministeryo.
4 Kon Ano ang Isiling: Lip-uta lang ang imo presentasyon agod mas madamo ka sing mapaambitan sini nga mensahe. Mahimo ka magsiling: “Subong pag-alagad sa publiko, nagapakigbahin ako sa bug-os kalibutan nga pagpalapnag sining importante nga mensahe. Imo na ini nga kopya. Palihug basaha ini.” Mas bentaha kon indi ka na magdala sing bag sa pagpamalaybalay. Pat-ura nga malista ang tanan nga interesado.
5 Kon Paano Tuptupan ang Inyo Teritoryo: Sa baylo nga ipanagtag ang Kingdom News sa dalan, isentro ang inyo pagpanghikot sa mga balay kag duog sang negosyo tubtob sa masarangan. Ilista ang mga balay nga wala sing tawo, kag tinguhai nga mabalikan ini sa iban nga oras sang adlaw ukon iban nga adlaw sang semana. Sugod sa Lunes, Nobiembre 6, isa ka kopya ang mahimo ibilin sa mga balay nga wala sing tawo. Apang, kon daw indi matuptupan ang teritoryo sang kongregasyon sa gintalana nga tion, mahimo mamat-od ang mga gulang nga bilinan sang Kingdom News ang mga balay nga wala sing tawo sa tion sang kampanya.
6 Nagahilapit na gid ang kalaglagan sang “Babilonia nga Daku.” Dapat maggua na ang mga tawo sa iya antes sia laglagon sing bug-os. (Bug. 14:8; 18:8) Magplano na karon agod makapakigbahin ka gid sa sining bug-os kalibutan nga kampanya sa pagpahibalo sa tanan nga malapit na ang kalaglagan sang butig nga relihion!